قالا ءماسليحاتى بەكىتكەن جاڭا نورماتيۆتىك اكت قۇقىقتىق مارتەبەسى مەن شارۋاشىلىق قىزمەت نىساندارىنا قاراماستان زاڭدى تۇلعالاردى، سونداي-اق اۋلا مەن قوعامدىق اۋماقتاردى اباتتاندىرۋعا جاۋاپتى لاۋازىمدى تۇلعالاردى قوسا العاندا، بارلىق قالا تۇرعىندارى ءۇشىن قالا اۋماقتارىن اباتتاندىرۋ ءتارتىبىن ايقىندايدى.
الماتىنىڭ كوممۋنالدىق ينفراقۇرىلىمدى دامىتۋ باسقارماسىنىڭ باسشىسى دۋلات اشكەنوۆ اتاپ وتكەندەي، مەگاپوليستە 2013 جىلدان بەرى قولدانىلماعان ارنايى پاسپورتتاردى پايدالانۋ قايتا باستالادى. قۇجاتتا تروتۋارلاردىڭ، كوگالداردىڭ، قاسبەتتەردىڭ جاي-كۇيىنە، سونداي-اق ۋرنالار، پاندۋستار، قورشاۋلار، كوشە جيھازدارى سياقتى ەلەمەنتتەرمەن جابدىقتاۋعا قويىلاتىن تالاپتار بەكىتىلەدى.
بۇل رەتتە، باسقارمادا اتاپ وتكەندەي، قالانى اباتتاندىرۋ پاسپورتى – بۇل يمپەراتيۆتى نورما ەمەس. قۇجاتقا اۋدان اكىمدىگى مەن ناقتى كاسىپكەر ەكى جاقتى قول قويادى. بۇل رەتتە، ول بۇرىن كوزدەلمەگەن ۋچاسكەلەردى اباتتاندىرۋ بولىگىندە قوسىمشا شىعىنداردى كوتەرمەيدى.
كاسىپكەرلەردىڭ قۇجات نورمالارىن ساقتاۋىن باقىلاۋدى اۋدان اكىمدىكتەرى جۇزەگە اسىراتىن بولادى، ءبىراق ولاردى ورىنداماعانداردى پوليسيا دەپارتامەنتى جاۋاپقا تارتاتىن بولادى.
سونىمەن قاتار، جاڭا ستاندارتتارعا سايكەس، بۇقارالىق ءىس-شارالاردى ۇيىمداستىرۋشىلار كونسەرتتەردەن، فەستيۆالدەردەن، جارمەڭكەلەردەن جانە باسقا دا ءىس-شارالاردان كەيىن تازالاۋعا مىندەتتەلەدى.
جاڭاشىلدىققا تۇسىنىكتەمە بەرە وتىرىپ، الماتى ءماسليحاتىنىڭ دەپۋتاتى سەرگەي كوزلوۆ بۇعان دەيىن قولدانىستا بولعان ەرەجەلەر 2007 جىلى قابىلدانعانىن، وسى ۋاقىت ىشىندە ولارعا تولىقتىرۋلار مەن وزگەرىستەر قاجەت بولعانىن اتاپ ءوتتى.
«قالا وسى جىلدار ىشىندە ۇلكەن جۇمىس اتقاردى. سونىمەن قاتار، مەگاپوليسكە قوسىمشا ۋچاسكەلەر مەن اۋماقتار قوسىلدى. كوپتەگەن جاڭا اۋلالار جوندەلىپ، جاسالدى، كوگالداندىرۋ جۇرگىزىلدى، كىشى ساۋلەت نىساندارى ورناتىلدى، جالپى دەمالىس ورىندارى، سپورت الاڭدارى، مەكتەپ اۋلالارى اباتتاندىرىلدى جانە تاعى باسقالار. مۇنىڭ ءبارى ءبىزدىڭ ازاماتتارىمىزدىڭ ءال-اۋقاتى مەن جايلىلىعىنا باعىتتالعان. ءبىز ءبارىمىز قالانىڭ تازا ءارى جايلى بولعانىن قالايمىز. ارينە، مۇنىڭ ءبارىن جاقسى جاعدايدا ۇستاۋ كەرەك»، - دەپ اتاپ ءوتتى سەرگەي كوزلوۆ.
ونىڭ ايتۋىنشا، قازىرگى ەرەجەلەر قالادا جاسالعان جاقسى ىستەردىڭ ساقتالۋىنا باعىتتالعان. ەنگىزىلەتىن جاڭا وزگەرىستەر قالالىق كوممۋنالدىق قىزمەتتەردىڭ دە، بيزنەستىڭ دە، قاراپايىم ازاماتتاردىڭ دا جاۋاپكەرشىلىگىن كۇشەيتەدى.
«ەرەجەدە ينكليۋزيۆتى ورتا قۇرۋ، قالالىق سۋبۇرقاقتاردىڭ جۇمىسىن ۇيىمداستىرۋ، ءۇي جانۋارلارىن ۇستاۋ جانە سەرۋەندەتۋ ماسەلەلەرى قاراستىرىلعان. مەگاپوليس ءومىرىنىڭ بارلىق اسپەكتىلەرى قامتىلعان. مۇنىڭ ءبارى مەگاپوليستى دامىتۋعا، ونىڭ بارىنشا تازا ءارى جايلى بولۋىنا باعىتتالعان. قۇجات مۇنى قالاي جاساۋ كەرەكتىگىن جانە ونى قالاي قولداۋعا بولاتىنىن انىقتايدى»، - دەپ تۇيىندەدى قالالىق ءماسليحات دەپۋتاتى.
ەستەرىڭىزگە سالا كەتەيىك، 2024 جىلعى 19 شىلدەدە VIII سايلانعان ءماسليحاتتىڭ كەزەكتەن تىس ءححى سەسسياسىندا دەپۋتاتتار الماتى قالاسىنىڭ اۋماعىن اباتتاندىرۋدىڭ جاڭا ەرەجەلەرىن بەكىتتى. بۇل شارالار «تازا قازاقستان» رەسپۋبليكالىق اكسياسىنىڭ ماقساتتارىنا سايكەس كەلەتىن ءقاۋىپسىز، ىڭعايلى جانە ەكولوگيالىق قولايلى قالالىق ورتانى قۇرۋعا باعىتتالعان.
جاڭا ەرەجەلەرمەن سىلتەمە ارقىلى تانىسۋعا بولادى https://legalacts.egov.kz/npa/view؟id=15095011.