ماقان ەسبولاتوۆ اتىنداعى ءىىم الماتى اكادەمياسىندا «ينتەرنەت – زاڭ كەڭىستىگى» اتتى كيبەرقاۋىپسىزدىككە باعىتتالعان بايقاۋ ءوتىپ جاتىر.
شارانىڭ باستى ماقساتى – جاستاردىڭ سيفرلىق ساۋاتتىلىعىن ارتتىرۋ، كيبەرگيگيەنا ماسەلەسىنە نازار اۋدارۋ جانە ينتەرنەتتەگى الدىن الۋ جۇمىستارىن جانداندىرۋ.
بايقاۋعا اكادەميا كۋرسانتتارى، ەرىكتى جاستار مەن كيبەرۆولونتەرلەر قاتىستى. جالپى سانى 50-گە جۋىق قاتىسۋشى ءقاۋىپسىز سيفرلىق كەڭىستىك قالىپتاستىرۋ ىسىنە ءوز ۇلەستەرىن قوستى.
بايقاۋ بەس نوميناسيانى قامتيدى:
- «ۇزدىك كيبەرگيگيەنا پوستى» – ەڭ كوپ قارالىم جيناعان كرەاتيۆتى اقپاراتتىق جازبا؛
- «ۇزدىك بەينەروليك» – كەڭ اۋديتورياعا ارنالعان مازمۇندى بەينەجازبا؛
- «جىلدىڭ انتيفەيكى» – مەملەكەتتىك نەمەسە قارجىلىق قۇرىلىمدار اتىن جامىلىپ جۇمىس ىستەيتىن جالعان اككاۋنتتاردى انىقتاۋ؛
- «كيبەر-كومەكشى» – ونلاين جانە وفلاين فورماتتا بەلسەندى ءتۇسىندىرۋ جۇمىستارىن جۇرگىزگەنى ءۇشىن (بروشيۋرا تاراتۋ، بايانداما وقۋ، الەۋمەتتىك جەلىلەردە جازبا جۇرگىزۋ جانە ت.ب.)؛
- «سيفرلىق ءىزىشار» – الاياقتىق سحەمالاردى تالداپ، ينتەرنەتتەگى ساندىق ىزدەر ارقىلى تەرەڭ زەرتتەۋ جۇرگىزۋ.
بايقاۋ قازاقستان رەسپۋبليكاسى ىشكى ىستەر مينيسترلىگىنىڭ باستاماسىمەن، مەملەكەت باسشىسىنىڭ تاپسىرماسىنا سايكەس جۇزەگە اسىرىلىپ جاتقان «زاڭ مەن ءتارتىپ» رەسپۋبليكالىق باعدارلاماسى اياسىندا ۇيىمداستىرىلدى. بۇل باستاما – جاستاردىڭ قۇقىقتىق مادەنيەتى مەن سيفرلىق ساۋاتتىلىعىن ارتتىرۋعا باعىتتالعان مەملەكەتتىك كەشەندى ساياساتتىڭ ءبىر بولىگى.
ۇيىمداستىرۋشىلار بايقاۋ بارىسىندا كيبەرۆولونتەرلەردىڭ ەرەكشە بەلسەندىلىك تانىتقانىن اتاپ ءوتتى. ولار پوليسيامەن تىعىز ىنتىماقتاستىقتا جۇمىس ىستەيدى: فەيك اككاۋنتتاردى انىقتايدى، ينتەرنەت پايدالانۋشىلارعا كەڭەس بەرەدى، اقپاراتتىق ناۋقاندار مەن فورۋمدارعا قاتىسادى. بۇگىندە ولاردىڭ سيفرلىق قاۋىپسىزدىككە قوسىپ جاتقان ۇلەسى ايتارلىقتاي ماڭىزدى.
سونىمەن قاتار، بايقاۋ اياسىندا كۋرسانتتار ونداعان جالعان پاراقشالار مەن الاياقتىق سايتتاردى انىقتادى. ولاردىڭ ءبىرقاتارى جەدەل بۇعاتتالدى. بۇل – جاستاردىڭ كيبەركەڭىستىكتەگى ناقتى ناتيجەلى جۇمىسىن دالەلدەيتىن كورسەتكىش.
«سيفرلىق گيگيەنا – بۇل ءار ازامات ءۇشىن قاجەتتى داعدىعا اينالۋى ءتيىس. بۇگىنگى جاستاردىڭ ينتەرنەت تەحنولوگيالارىن تەرەڭ مەڭگەرىپ قانا قويماي، ونى قوعام يگىلىگىنە پايدالانىپ وتىرعانىن كورۋ – ءبىز ءۇشىن ۇلكەن قۋانىش. مۇنداي باستامالار سانالى، سيفرلىق ساۋاتتى ۇرپاقتى قالىپتاستىرادى»، – دەپ اتاپ ءوتتى ماقان ەسبولاتوۆ اتىنداعى الماتى اكادەمياسىنىڭ باستىعى، پوليسيا پولكوۆنيگى قاليجان قوبلاندين.