الماتىدا ۆولونتەرلىك قوزعالىستى دامىتۋعا جانە قالالىقتاردى الەۋمەتتىك جوبالارعا تارتۋعا باعىتتالعان اۋقىمدى باستاما - «يگى ىستەر مارافونى» باستالدى.
وڭىرلىك كوممۋنيكاسيالار قىزمەتى الاڭىندا مارافوننىڭ باستالۋى تۋرالى الماتى قالاسى جاستار ساياساتى باسقارماسىنىڭ وكىلدەرى اڭگىمەلەپ بەردى، دەپ حابارلايدى aqshamnews.kz.
باسپا ءسوز كونفەرەنسياسىندا ءسوز سويلەگەن باسقارما باسشىسى ورىنباسارىنىڭ مىندەتىن ۋاقىتشا اتقارۋشى نۋرسۋلتان بەككايىروۆ الماتى ءاردايىم ءوزىنىڭ بەلسەندى جاستارىمەن جانە قامقور تۇرعىندارىمەن تانىمال ەكەنىن اتاپ ءوتتى. قالانىڭ ەرىكتىلەر قوزعالىسى جىل سايىن الەۋمەتتىك كومەكتەن باستاپ ەكولوگيالىق باستامالارعا دەيىنگى ءتۇرلى سالالاردى قامتىپ، ءوز ۇستانىمىن نىعايتىپ كەلەدى.
«بۇگىندە الماتىدا 30-دان استام ءىرى ەرىكتىلەر ۇيىمى جۇمىس ىستەيدى، ال ەرىكتىلەردىڭ جالپى سانى 50 000 ادامنان اسادى. 2024 جىلى ەرىكتىلەر ءتۇرلى باستامالاردى قولداۋعا باعىتتالعان 1200-دەن استام ءىس-شارا وتكىزدى»، - دەدى ن.بەككايىروۆ.
«يگى ىستەر مارافونى» جاستار ساياساتى باسقارماسىنىڭ قولداۋىمەن الماتى ەرىكتىلەرىنىڭ فرونت-وفيسىمەن ۇيىمداستىرىلدى. بيىل مارافون 1 ناۋرىزدان 1 جەلتوقسانعا دەيىن جالعاسادى، ال ءىس-شارالار جۇيەلەنىپ، بۇكىل كۇنتىزبەلىك جىلعا بولىنەدى.
مارافون اياسىندا ماڭىزدى كۇندەر مەن مەرەكەلەرگە ارنالعان 100-دەن استام ءىس-شارا جوسپارلانعان. ولاردىڭ ىشىندە «ستاروست ۆ رادوست» سياقتى ءىس-شارالار-قارت ادامدارعا بوس ۋاقىت پەن قامقورلىق ۇيىمداستىرۋ (پانسيوناتتارداعى شىعارماشىلىق كەشتەر)، «جۇرەكتەن جۇرەككە» اكسياسى، قان تاپسىرۋ اكسيالارى، «العاشقى كومەك مەكتەبى»، ەكو-دارماركالار، اشىق اسپان استىنداعى كينو كورسەتىلىمدەرى جانە ت. ب.
العىس ايتۋ كۇنى 13 اكسيا («ەڭبەگىڭىز ءۇشىن مىڭ العىس»، «بىرلىككە 30 جىل» چەللەندجدەرى، «مەيىرىمدىلىك كوپىرى»، «العىس اعاشى»، «العىس ايتۋ قابىرعاسى» جانە ت.ب.) وتكىزىلدى، وعان 3000-نان استام ادام قاتىستى.
سونىمەن قاتار، الەۋمەتتىك جەلىلەر مەن باق-تا ەرىكتىلەر قوزعالىسىن ناسيحاتتاۋعا جانە جاڭا قاتىسۋشىلاردى تارتۋعا باعىتتالعان كەڭ كولەمدى مەدياكامپانيا جۇرگىزىلۋدە.
الماتى ەرىكتىلەرى ءفرونت-وفيسىنىڭ باسشىسى باعدات اناربايەۆا دا ەرىكتىلەر قىزمەتىنىڭ ماڭىزدىلىعى تۋرالى ايتىپ بەردى.
«ەرىكتىلىك - بۇل جاي عانا قايىرىمدىلىق ەمەس، اينالاداعى الەمدى وزگەرتۋ مۇمكىندىگى. 2024 جىلى الماتى ەرىكتىلەرى 592 توننا گۋمانيتارلىق كومەك جينادى، ال 700-دەن استام جاس وقىتىلىپ، قۇندى داعدىلارعا يە بولدى»، - دەپ اتاپ ءوتتى اناربايەۆا.
بيىل ۆولونتەرلىك ءىس-شارالار سانى ارتتىرىلىپ قانا قويماي، ءبىلىم بەرۋ باعدارلامالارىمەن تولىقتىرىلاتىن بولادى. ەرىكتىلەر تەك كومەكتەسىپ قانا قويماي، وزدەرىنىڭ كاسىبي داعدىلارىن دامىتا الۋى ءۇشىن العاشقى كومەك، كوشباسشىلىق، ءىس-شارالاردى ۇيىمداستىرۋ جانە جوبالىق باسقارۋ بويىنشا ارنايى كۋرستار مەن ترەنينگتەر ىسكە قوسىلدى.
ۇيىمداستىرۋشىلار الماتىنىڭ بارلىق تۇرعىندارىن، بيزنەس-قاۋىمداستىقتى جانە قوعامدىق ۇيىمداردى قاتىسۋعا شاقىرادى. تىركەۋدەن الماتى ەرىكتىلەرىنىڭ ءفرونت-وفيسى ارقىلى وتۋگە بولادى.
«الماتى - بەلسەندى جانە ماقساتتى ادامداردىڭ قالاسى. بىرلەسكەن كۇش-جىگەر ارقىلى ءبىز مۇقتاج جاندارعا كومەكتەسىپ قانا قويماي، قالامىزدى ودان ءارى جايلى، تازا ءارى دوستىق قارىم-قاتىناستا ەتەمىز»، - دەپ تۇيىندەدى مارافوندى ۇيىمداستىرۋشىلار.