ايەل ەسكى اسكەري پوليگوننىڭ جانىنان تابىلدى
13 مامىردا پانفيلوۆ اۋدانىندا ۇيىنەن شىعىپ كەتكەن زەينەتكەردى ىزدەۋ شارالارى ءۇش كۇننەن استام ۋاقىتقا سوزىلدى. ابدەن قاجىعان 72 جاستاعى ايەل ءوزىنىڭ تۋعان لەسنوۆكا اۋىلىنان 15-20 شاقىرىم جەردە ەسكى اسكەري پوليگوننىڭ جانىنان تابىلدى، دەپ حابارلايدى Almaty-akshamy.kz.
پوليسەيلەر قارت ايەلدى ىزدەۋ جۇمىستارىنا تۋىستارىنان بولەك ەرىكتىلەردى، شەكاراشىلاردى جانە جەرگىلىكتى حالىقتى - بارلىعى 100-گە جۋىق ادامدى تارتتى.
"ىزدەستىرۋ توبىنىڭ ءبىرى قالىڭ توعاي اراسىنان اجەيدىڭ ورامالىن تاۋىپ، ىزدەۋ باعىتىن انىقتاي الدى. جالعىز ءوزى جۇرگەن ايەلدى جەرگىلىكتى شوپاندار بايقاپ، ونىڭ ىزىنە ءتۇسىپ كەلە جاتقان ىزدەۋشىلەرگە حابارلاعان. تاماق پەن سۋسىز ول قاتتى السىرەپ قالعان"، - دەلىنگەن پوليسيا حابارلاماسىندا.
مەديسينالىق كومەك كورسەتىلگەننەن كەيىن تۋىستارى ونى ۇيىنە الىپ كەتكەنى دە ناقتىلانادى.