مەدەۋ شاتقالىنان جوعارى گورەلنيكتەگى تابيعي ىستىق سۋ شىعاتىن باستاۋدىڭ جاڭارعان ءارى كەڭەيتىلگەن الاڭى قولدانىسقا بەرىلدى. جوندەۋ جۇمىستارى كاسىپكەر سەرگەي سپيسىننىڭ ءوز قاراجاتى ەسەبىنەن جۇرگىزىلدى.
ايتا كەتكەن ءجون، گورەلنيك الاڭىنداعى اباتتاندىرۋ جۇمىستارى العاش رەت 2016 جىلى مەسەنات س.سپيسىننىڭ ءوز قاراجاتى ەسەبىنەن جۇرگىزىلگەن بولاتىن. ناتيجەسىندە سۋ راسىمدەرى، دەمالۋ جانە سپورتپەن شۇعىلدانۋ ءۇشىن قولايلى جاعدايلار جاسالدى.
بۇگىن جاڭارعان الاڭنىڭ ىسكە قوسىلۋىنا وراي ونىڭ اشىلۋ سالتاناتى ءوتتى. ءىس-شاراعاالماتى قالاسى تۋريزم باسقارماسىنىڭ باسشىسى سابينا امانكەلدى، كاسىپكەر، ەكواكتيۆيست سەرگەي سپيسىن، الماتى قالاسى ەكولوگيا جانە قورشاعان ورتا باسقارماسىنىڭ «مەدەۋ» مەملەكەتتىك وڭىرلىك تابيعي پاركىنىڭ ديرەكتورى الماس اتتاپحانوۆ جانە قالا تۇرعىندارى مەن قوناقتارى قاتىستى.
- ىستىق سۋ شىعاتىن باستاۋدىڭ قۇبىرلارىن، سۋعا تۇسۋگە ارنالعان بوشكەلەردى جانە سپورت الاڭىن جاڭارتتىق. بۇرىڭعىعا قاراعاندا سپورت الاڭى ءۇش ەسە ۇلكەيدى. ادامدارعا جايلى دەمالىس ورىندارىن جاساپ، ىڭعايلىلىق ءۇشىن كوپتەگەن جەردى جاساندى شوپپەن جاپتىق. بارلىق الماتىلىقتاردى مۇندا كەلىپ سپورتپەن اينالىسۋعا، سۋعا ءتۇسىپ دەنساۋلىقتارىن كۇشەيتۋگە شاقىرامىن. ءبارى تەگىن. تەك ءبىر وتىنەرىم – جاڭارتىلعان ايماقتى ايالاپ ۇستايىق، – دەدى سەرگەي سپيسىن.
الماتى قالاسى تۋريزم باسقارماسىنىڭ وكىلدەرى س.سپيسىنعا ازاماتتىق بەلسەندىلىك تانىتىپ، قالا كوركەيتۋگە ۇلەس قوسقانى ءۇشىن العىس ايتتى.