قازاقستان قۇراماسى تۇركىستان وتكەن «Turan barysy» ازيا كۋبوگىنىڭ جەڭىمپازى اتاندى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇگىن تۇركىستان قالاسىندا العاش رەت قازاق كۇرەسىنەن «Turan Barysy» ازيا كۋبوگى ءوتتى. جارىسقا تۇركى مەملەكەتتەرى ۇيىمىنىڭ مۇشەلەرى – قازاقستان، تۇركيا، وزبەكستان، ازەربايجان، قىرعىزستان جانە ماجارستان بالۋاندارى قاتىسىپ، ءوزارا مىقتىنى انىقتادى.
بالۋاندار ەكى توپقا ءبولىنىپ، جەتى سالماق ساناتىندا اينالمالى جۇيەدە كۇرەستى. ەكى توپتان ىرىكتەلگەن قازاقستان، ازەربايجان، قىرعىزستان جانە وزبەكستان قۇراما كوماندالارى جۇلدەلى ورىندارعا تالاستى.
ازەربايجان ەلىنىڭ وكىلدەرىن قاپى قالدىرعان قىرعىز ورەندەرى قولا جۇلدەنى يەلەندى. ال تارتىسقا تولى كۇرەس باسەكەسىنىڭ اقتىق ايقاسى قازاقستان مەن وزبەكستان قۇرامالارى اراسىندا ءوتتى. ايتۋلى دودانىڭ اقتىق باسەكەسىندە 4:3 ەسەبىمەن قازاقستان بالۋاندارى جەڭىسكە جەتىپ، «Turan Barysy» دوداسىنىڭ چەمپيونى اتاندى.
العاش رەت ۇيىمداستىرىلعان كۇرەس سايىسىندا ءبىرىنشى ورىن العان كوماندا 10 000 000 تەڭگە كولەمىندە قارجىلاي سىيلىق السا، ەكىنشى ورىنعا — 6 000 000، ءۇشىنشى ورىنعا — 4 000 000 تەڭگە تابىستالدى. سونداي-اق جەڭىمپاز كوماندالارعا كۋبوك رەتىندە تۇركىستان سيمۆولى – تايقازان بەرىلدى.
ايتا كەتەيىك، ءىس-شارا ق ر مادەنيەت جانە سپورت مينيسترلىگى مەن تۇركىستان وبلىسى اكىمدىگىنىڭ، سونداي-اق «Qazaq kuresi» قاۋىمداستىعىنىڭ، «Qazaqstan Barysy» قازاق كۇرەسىن قولداۋ جانە دامىتۋ قورىنىڭ ۇيىمداستىرۋىمەن ءوتتى.
