الماتىدا حالىقارالىق گاستروفەستيۆال ءوتىپ جاتىر

اباي اتىنداعى الاڭدا Almaty Food Fest 2022 حالىقارالىق گاسترونوميالىق فەستيۆالى ءوتىپ جاتىر

تۋريزم باسقارماسى مۇنىڭ قالانى حالىقارالىق ءىس-شارا ءتۋريزمىنىڭ نەگىزگى باعىتىنىڭ ءبىرى رەتىندە تانىتۋ ءۇشىن ۇيىمداستىرىلعانىن ايتادى.

Almaty Food Fest 2022 اياسىندا مادەني جانە ويىن-ساۋىق باعدارلاماسى قاراستىرىلعان. وندا الەمنىڭ ءتۇرلى ەلىنىڭ ۇلتتىق اسى ۇسىنىلعان. فەستيۆالگە كەلۋشىلەر مەكسيكا، گرۋزين، امەريكا، ازيا جانە قازاق تاعامدارىنان ءدام تاتادى. دەسەرت اۋەسقويلارىنىڭ تالعامى دا ەسكەرىلىپ، ولار ءۇشىن ارنايى «تاتتىلەر كوشەسى» ۇيىمداستىرىلدى.

سونىمەن بىرگە قوناقتار اسپاز بايقاۋلارى مەن ۇتىس ويىندارىنا قاتىسىپ، حالىقارالىق دەڭگەيدەگى ارنايى شاقىرىلعان اسپازداردىڭ live cooking شوۋىن تاماشالاپ، اۋىل شارۋاشىلىعى ونىمدەرى مەن قولونەر بۇيىمدارىن ساتىپ الا الادى. قازاقستاندىق ەسترادا جۇلدىزدارى اسەرلى شوۋدى جاندى اۋەنمەن تەربەتتى.

فەستيۆال كۋۆەيت، باحرەين، ءۇندىستان جانە باسقا ەلدەردەن كەلگەن تانىمال شەتەلدىك بلوگەرلەردى دە بەي-جاي قالدىرمادى. ولار ءوز ەلىندەگى ۇلتتىق تاعامداردىڭ ەرەكشەلىكتەرىنە توقتالىپ، قازاقستاننىڭ ءداستۇرلى تاعامدارىنا شولۋ جاسادى.

«مەن ناعىز گۋرمانمىن. وتانىم ءۇندىستاندا 500-گە جۋىق مەيرامحاناعا باردىم. سىزدەردىڭ ۇلتتىق تاعامدارىڭىز تۋرالى كوبىرەك ءبىلىپ، جاڭا گاسترونوميالىق تاجىريبە الۋ ءۇشىن الماتىعا Almaty Food Festival 2022-گە ارنايى كەلدىم،- دەپ ءۇندىستاندىق فۋد-بلوگەر روحيت ماۆلە اسەرىمەن ءبولىستى.

فەستيۆال اباي اتىنداعى الاڭدا (رەسپۋبليكا سارايىنىڭ الدى) 29-30 قازان كۇندەرى وتەدى. ءار كەش سوڭىندا قوناقتار قازاقستاندىق ارتىستەردىڭ ونەرىن تاماشالايدى:

29 قازان – Orda توبى؛

30 قازان – قايرات نۇرتاس.