«Alatay Aqparat» ۇجىمىندا قۇربان ايتقا ارنالعان اق داستارحان جايىلدى.
قۇربان ايت – ورازا ايتتان كەيىن 70 كۇن وتكەن سوڭ كەلەتىن مەيرام. مۇسىلمان قاۋىمى بۇل مەرەكەنى قاتارىنان ءۇش كۇن تويلايدى.
ايت كۇندەرى قۇرباندىق شالىنادى. بۇل كۇندەر ۇلى مەككەگە قاجىلىقپەن اياقتالادى. ال ايت كۇندەرى مۇسىلماننىڭ اتقاراتىن ەڭ جاقسى ءىسى – قۇربان شالۋ.
قۇربان شالۋ اللا تاعالاعا جاقىن بولۋ، كۇنالاردىڭ كەشىرىلۋى، جاراتۋشى يەمىزدىڭ كوپتەگەن نىعمەتتەرىنە شۇكىر ەتۋ، باي مەن كەدەيگە كەڭشىلىك جاساۋ ءۇشىن مىندەتتەلدى. ويتكەنى وسى كۇنى بارلىق ادام اللا تاعالانىڭ قوناعى بولادى، قۇربان ەتىنەن جەيدى، ونى تارتۋ ەتەدى، ودان ساداقا بەرەدى.
الماتىنىڭ قوس بىردەي باسىلىمى «Almaty aqshamy» جانە «ۆەچەرنيي Almaty» گازەتتەرىنىڭ باسىن بىرىكتىرىپ، قاناتىنىڭ استىنا الىپ وتىرعان «Alatay Aqparat» مەدياحولدينگى ءوز جۇمىسىندا تەك شاھاردىڭ تىنىس-تىرشىلىگىن قامتىپ قويماي، ۇلتىمىزدىڭ وتكەن تاريحى مەن تەرەڭ فيلوسوفيالىق ءمانى بار ءداستۇرلى مەرەكەلەرىن دە اسا قۇرمەتپەن اتاپ ءوتۋدى داستۇرگە اينالدىرعان.
جالپى، ۇجىمدا ءدىني جانە ۇلتتىق سانا-سەزىمنىڭ جوعارى دەڭگەيدە قالىپتاسۋىنا، وعان تيىسىنشە قۇرمەت كورسەتۋدە ۇلتتىق ءسالت-داستۇردى ناسيحاتتاپ وتىرۋدىڭ دا ماڭىزى ەرەكشە زور. سوندىقتان بولار، اتالمىش ۇجىمدا ۇزاق ۋاقىتتان بەرى اۋىزاشار تۇراقتى ۇردىسكە اينالىپ، ورازا ۇستاعان قىزمەتكەرلەرگە تۇراقتى تۇردە اۋىزاشار بەرىلەدى. سونىمەن قاتار، ۇزاق جىلدار باسىلىمدا ەڭبەك ەتكەن ارداگەرلەرگە ماتەريالدىق جانە مورالدىق قولداۋ كورسەتىلىپ وتىرادى. وسى ورايدا «Alatay اqparat» مەدياحولدينگى قۇربان ايت مەرەكەسىن دە ەرەكشە اتاپ ءوتتى. قۇربان ايتتىڭ سوڭعى كۇنىندە قۇرباندىق شالىنىپ، اۋلاعا اق داستارحان جايىلدى. باسىلىمنىڭ جاناشىرلارى مەن ادال دوسىنا اينالعان جازىلۋشىلارى دا قۇربان ايتپەن قۇتتىقتاي كەلدى.
قاشاننان-اق قاربالاسىپ جاتاتىن رەداكسيانىڭ اۋلاسى دا تاڭەرتەڭنەن باستاپ قىزۋ تىرلىككە تولدى. دايىندىققا كىرىسكەن قىزمەتكەرلەر وزدەرىنىڭ قالامعا عانا جۇيرىك ەمەس، قازاندى دا قايناتا بىلەتىندىكتەرىن كورسەتتى. مال سويىلىپ، قازان كوتەرىلدى. باۋىرساقتىڭ ءيسى مەن قوس يىنىنەن دەمالعان ساماۋرىن كەلۋشىلەرگە جاقسى كوڭىل-كۇي سىيلادى.
قوناقتاردىڭ تۋرا تۋعان اۋىلىنا كەلگەندەي كوڭىلدەرى كوتەرىلدى. قوس باسىلىمنىڭ بايىرعى وقىرماندارى – دىنمۇحامەد قونايەۆ اتىنداعى مۋزەي-ۇيىنىڭ باسشىسى ديار اسقار ۇلى قونايەۆ، «ايگولەك» بالالار جۋرنالىنىڭ باس رەداكتورى قىمبات ءابىلدينا، بەلگىلى جۋرناليست جانە قوعام قايراتكەرى ەرمۇرات باپي، مەدياحولدينگتىڭ شىعارماشىلىق دامۋى جونىندەگى كەڭەس مۇشەلەرى مەن ءبىزدىڭ تۇراقتى تالىمگەرلەرىمىز – وتاندىق جۋرناليستيكا اكادەمياسىنىڭ پرەزيدەنتى ساعىمباي قوزىبايەۆ جانە حالىقارالىق مادەنيەتتەردى جاقىنداستىرۋ ورتالىعىنىڭ جەتەكشى عىلىمي قىزمەتكەرى ەلجان ءبىرتانوۆ، يۋنەسكو-نىڭ جەتەكشى عىلىمي قىزمەتكەرى ۆالەريي جانداۋلەتوۆ، MedRemZavod كومپانيالار توبىنىڭ باس ديرەكتورى ارىستانبەك جۇماعۇلوۆ، تانىمال وتاندىق بيزنەسمەن جانە مەسەنات ساياحات بورانبايەۆ، سونداي-اق قالا اكىمدىگىنىڭ وكىلدەرى مەن باسقا دا قوناقتار جايىلعان داستارحانعا ريزاشىلىقتارىن ءبىلدىردى. اق داستارحان باسىنا جينالعان قاۋىم الاتاۋ اۋدانىنا قاراستى «مىرزاحمەت» مەشىتىنىڭ نايب-يمامى ولجاس باەزوۆتىڭ ادامگەرشىلىك، ادەپتىلىك تۇرعىسىنداعى ۋاعىزدارىن تىڭداپ، ىشكى جان-دۇنيەلەرىن رۋحاني ازىقپەن تولتىردى.
جاقسى ءسوز – جارىم ىرىس
جۇرت بولىپ داستارحان باسىنا جينالعاندا قۇران وقىپ، باتا بەرۋ – قازاقتىڭ ءداستۇرى. سوندىقتان ءبىزدىڭ ۇجىم دا ءوزىنىڭ اق داستارحانىنا ارنايى الاتاۋ اۋدانىندا ورنالاسقان «مىرزاحمەت» مەشىتىنىڭ يمامى ولجاس باەزوۆتى شاقىردى. ءدىن قىزمەتكەرى اس الدىندا دۇعامەن باتا ايتىپ، جينالعان قاۋىم ءال-اۋقاتتانعان سوڭ، قاسيەتتى قۇران سۇرەلەرىن وقىدى. ۇجىمنىڭ ۇلكەندى-كىشىلى قىزمەتكەرلەرىن ءبىر ورتاعا ۇيىتىپ ۋاعىز ايتتى، «قۇربان ايت» مەرەكەسىنىڭ ءمانىن اشتى. يمامنىڭ ايتۋىنشا، بۇل مۇسىلمان مەرەكەسى تەك اس ءىشىپ، مال باۋىزداۋدى ماقسات تۇتپايدى. مەرەكەنىڭ تۇپكى ءمانى – كوپتەن كورىسپەگەن، اراسىندا ارازدىعى بار ادامداردى تاتۋلاستىرۋ، مۇقتاج ادامدارعا كومەك جاساۋعا سەبەپكەر بولۋ، كوپشىلىكتى يمان مەن مەيىرىمگە شاقىرۋ.
بۇگىنگى كۇنى قازاق باسىنا ءىس تۇسسە عانا قوي سويادى. قايعى كەلسە دە، قۋانىش بولسا دا – سول. الايدا قۇربان ايتتاعى مالدى ءبىز تىرىلەر ءۇشىن، اتا-انامىز بەن وتباسىمىزدىڭ اماندىعى ءۇشىن شالۋعا مىندەتتىمىز. دۇنيەدەن وتكەن سوڭ، جاقىندارىمىزدى جوقتاماي، بارىندا باعالاپ، ءوز پارىزىمدى تۋرا جولمەن اتقارايىق، – دەدى يمام.
سونداي-اق، ءدىن قىزمەتكەرى ايتۋلى مەيرامدا قايىرىمدىلىق جاساۋدىڭ ءمانىن اڭگىمەلەپ بەردى.
«جاسالاتىن جاقسىلىق ءىستىڭ ساداقا بولۋى ءۇشىن ءدىني تۇرعىدان ءۇش ەرەكشەلىككە يە بولۋى كەرەك: مۇقتاج جانعا بەرۋ، اللا رازىلىعى ءۇشىن بەرىلۋى جانە بەرىلگەن ساداقا ءوز مۇلكىنەن، ادال تابىسىنان بولۋى ءتيىس. قۇراندا «ءبىر جاقسىلىق ىستەگەن ادام ون ەسە ساۋاپقا يە بولادى» (6.ءانعام-160) دەلىنگەن. سوندىقتان بىر-بىرىمىزگە جاقسىلىق قىلايىق. پايعامبارىمىز (س.ع.س) ساحابالارىنا ايتقان ءبىر اڭگىمەسىندە «قانداي دا ءبىر ءىس جاساسا (بىرەۋگە جول كورسەتۋ، جولداعى زيان تيگىزەتىن زاتتى الىپ تاستاۋ، ءىلىم الۋ، ۇيرەتۋ ت.ب.)، ول ءۇشىن ءبىر ساداقا» دەپ وسيەت ەتكەن»، – دەپ ايتىپ ءوتتى.