قارۋلى كۇشتەر ۇلتتىق اسكەري-پاتريوتتىق ورتالىعىنىڭ اسكەري-تاريحي مۇراجايىندا جىل سايىنعى حالىقارالىق عىلىمي-پراكتيكالىق كونفەرەنسيا ءوتتى، دەپ حابارلايدى aqshamnews.kz
وعان اسكەري تاريح، ارحەولوگيا، ەتنوگرافيا، مۇراعات ءىسى، مۇراجايتانۋ سالاسىن زەرتتەۋشلەر، قوعام قايراتكەرلەرى، سونداي-اق رەسەي، قىرعىزستان، پولشا، ازەربايجان جانە يتاليا ەلدەرىنىڭ وكىلدەرى قاتىستى.
زەرتتەۋشىلەر اسكەري مۇرانى زەردەلەۋ مەن مۇراعات جۇمىسىنىڭ پروبلەمالىق اسپەكتىلەرىن قوزعادى. سونداي-اق، قازاق حالقىنىڭ ۇلت-ازاتتىق قوزعالىسى، قازاقستاندىق جاۋىنگەرلەردىڭ فاشيستىك باسقىنشىلاردى جەڭۋگە قوسقان ۇلەسى جانە اسكەري تاريحتىڭ باسقا دا ماسەلەلەرى تۋرالى ايتىلدى.
– ۇلى وتان سوعىسىنداعى قازاقستاندىقتاردىڭ داڭقى مەن ءرولى تاريحىمىز بەن ۇرپاق ءۇشىن وتە ماڭىزدى. قازاق حالقى ەجەلگى زاماننان بەرى بارلىق شايقاستاردا ەرلىك پەن تاباندىلىقتىڭ لايىقتى ۇلگىسى بولعان. ماسەلەن، شىعىس حالىقتارىنىڭ اراسىندا قازاقتار كەڭەس وداعىنىڭ باتىرلارىنىڭ سانى بويىنشا ءبىرىنشى ورىندا تۇر. تاريحتا ءالى دە كوپتەگەن اق اقتاڭداقتار بار. حابارسىز كەتكەن ادامدار ءالى دە كوپ. ءبىز قانشا قازاقستاندىق تۇتقىندا بولعانىن بىلمەيمىز. سوندىقتان ۇلى وتان سوعىسى تاريحىنا ءالى نۇكتە قويىلعان جوق، – دەپ اتاپ ءوتتى عىلىم جانە جوعارى ءبىلىم مينيسترلىگى مەملەكەت تاريحى ينستيتۋتى ديرەكتورىنىڭ ورىنباسارى تاريح عىلىمدارىنىڭ دوكتورى اياعان بۇركىتباي.
بۇل تۇرعىدا عالىمدى استانا قالاسىنداعى ءازىربايجانداردىڭ «حازار» ەتنومادەني بىرلەستىگى» قوعامدىق بىرلەستىگىنىڭ ءتوراعاسى ماحير مۇحتاروعلى قولدادى. ول ۇلى وتان سوعىسىنىڭ تاريحىن جانە قازاقستاننىڭ جەڭىسكە قوسقان ۇلەسىن تەرەڭ زەرتتەۋ قاجەتتىگىن اتاپ ءوتتى.
پولشا رەسپۋبليكاسىنىڭ اسكەري اتتاشەسى پودپولكوۆنيك الەكساندر سۋحەنەك قازاقستاندىق تاراپقا تىعىز ىنتىماقتاستىق ءۇشىن العىسىن ءبىلدىرىپ، اسكەري تاريح ماسەلەلەرىنىڭ وتانداستارى ءۇشىن ماڭىزدىلىعىن اتاپ ءوتتى.
ۆارشاۆادان ونلاين رەجيمدە دوكتور ەۆا كوۆالسكا «ۇلتتىق ەستە ساقتاۋ ينستيتۋتىنىڭ ىزدەۋ جانە سايكەستەندىرۋ بولىمىندە جۇرگىزىلگەن شىعىستاعى پولياكتاردىڭ ەسكەرىلمەگەن جەرلەۋ ورىندارىن زەرتتەۋ» اتتى بايانداما جاسادى.
كونفەرەنسيادا اسكەري مۇراجايلاردى دامىتۋ جانە قارۋلى كۇشتەردىڭ جاۋىنگەرلىك داستۇرلەرى نەگىزىندە جاستاردى اسكەري-پاتريوتتىق تاربيەلەۋ ماسەلەلەرى تالقىلاندى.