قاتاردا فۋتبولدان ءوتىپ جاتقان الەم چەمپيوناتىندا ەكىنشى تۋر ويىندارى ۆ توبىندا ۋەلس – يران ماچىمەن باستالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
توپتىق باسەكەنىڭ باستاپقى تۋرىندا ۋەلس اقش-پەن تەڭ ويناسا، ازيادا رەيتينگىندە كوش باستاپ تۇرعان يران انگلياعا ءىرى ەسەپپەن (2:6) ەسە جىبەرگەن ەدى.
قوس كومانداعا دا ۇپاي اسا قاجەت ەكەندىگى تۇسىنىكتى. روب پەيدج جاتتىقتىراتىن ۋەلس سوڭعى ويىنىن انگليامەن وتكىزەتىندىكتەن، يراننان قالايدا ءۇش ۇپايدى جۇلىپ الۋدى كوزدەيدى. ءبىرىنشى كەزدەسۋىندە جانكۇيەرلەرىن جەرگە قاراتقان يراندىقتاردىڭ ءتىپتى شەگىنەر جەرى جوق ەدى. سوندىقتان بولسا كەرەك، پورتۋگاليالىق مامان كارلۋش كەيرۋش شابۋىل شەبىنە مەحدي تارەميدىڭ قاسىنا رەسەي چەمپيوناتىندا ونەر كورسەتكەن سەردار ازمۋندى قوستى.
باسەكەنى ءتىم-تاۋىر باستاعان يراندىقتار 15-مينۋتتا قارسىلاستار قاقپاسىنا دوپ تا ەنگىزدى. ءبىراق الي گوليزادە ويىننان تىس قالعاندىقتان، گول ەسەپتەلمەدى.
ەكىنشى كەزەڭدە 51-مينۋتتا س.ازمۋن، ىلە-شالا ا.گوليزادە تەپكەن دوپ قاقپا جاقتاۋىنان كەرى سەرپىلدى. جول بولماۋ دەگەن وسى شىعار. ۋەلس قاقپاشىسى ۋەين حەننەسسي يراندىقتاردىڭ سوققىسىن الدەنەشە رەت قايتاردى. 84-مينۋتتا العا ۇمتىلعان م.تارەميگە قارسى ويىن ءتارتىبىن ورەسكەل بۇزعان ۋ.حەننەسسي الاڭنان قۋىلدى. بۇل بيىلعى بىرىنشىلىكتە فۋتبولشىعا كورسەتىلگەن العاشقى قىزىل قاعاز ەدى.
قوسىمشا 9-مينۋتتا ەكىنشى تايمدا الاڭعا قوسىلعان رۋزبە چەشميدىڭ الىستان قاقىراتا تەپكەن دوبى قاقپا بۇرىشىنان ءبىر شىقتى – 1:0. سودان كەيىن م.تارەميدەن پاس العان رامين رەزاەيان نۇكتە قويدى.
وسىلايشا، اسا تارتىستى ماچتا يران 2:0 ەسەبىمەن جەڭىسكە جەتتى. يران قورجىنىندا ءۇش، ۋەلستە ءبىر عانا ۇپاي بار.
بۇگىن سونداي-اق بۇل توپتا انگليا – اقش قۇرامالارى مىقتىنى انىقتايدى.