الماتىدا وتەتىن فورۋم پايدالى ءارى قىزىقتى بولۋى ءۇشىن ۇيىمداستىرۋشىلار جاسوسپىرىمدەردىڭ فوكۋس-توبىنا ارنايى زەرتتەۋ جۇرگىزدى
27-قاراشا، ياعني وسى جەكسەنبى كۇنى يۋنفپا (بۇۇ-نىڭ رەپرودۋكتيۆتى دەنساۋلىق جانە قۇقىقتار جونىندەگى جەتەكشى اگەنتتىگى) قولداۋىمەن جاسوسپىرىمدەرگە ارنالعان I “speak up” فورۋمى وتەدى، دەپ حابارلايدى Almaty-akshamy.kz.
شارا بارىسىندا موبيلوگرافيا، وراتورلىق ونەر سىندى شەبەرلىك ساعاتتارى ۇيىمداستىرىلىپ، بىلىكتى ساراپشىلار جاسوسپىرىمدەرگە ارنالعان قىزىق ءارى پايدالى ءدارىس وتكىزەدى. سونداي-اق، فورۋمعا قاتىسۋشى جاستار كوكەيكەستى سۇراقتارىنا جاۋاپ الۋى ءۇشىن پسيحولوگتان كەڭەس الۋ مۇمكىندىگىن دە قاراستىردىق.
جاسوسپىرىمدەر “اتا-انالارىمەن جانە قۇرداستارىمەن قارىم-قاتىناس داعدىلارىن قالاي جاقسارتا الادى؟”، “ەرىكتىلەر قاتارىنا قالاي قوسىلا الامىز؟”، “ستارت اپ ۇيىمداستىرۋدىڭ قىر-سىرى.”، “ماماندىق تاڭداۋدا نەنى ەسكەرۋ كەرەك؟”، “اكتەرلىك مانساپتى قالاي باستاۋ كەرەك؟”. وسى جانە باسقا دا ماڭىزدى سۇراقتاردىڭ جاۋابىن 27-قاراشا كۇنى وتەتىن “speak up” فورۋمىنان بىلە الاسىزدار. سونداي-اق، سىزدەر ءۇشىن موبيلوگرافيا، قارجىلىق ساۋاتتىلىق، بلوگەرلىك، وراتورلىق ونەر سىندى شەبەرلىك ساعاتتارىن ۇيىمداستىرامىز!
فورۋمنىڭ ۇيىمداستىرۋشىلارى “بوپە” قق جانە بۇۇ-نىڭ رەپرودۋكتيۆتى دەنساۋلىق جانە قۇقىق جونىندەگى جەتەكشى اگەنتتىگىنىڭ ماقساتى (يۋنفپا) جاسوسپىرىمدەردىڭ كەزدەسىپ، بىر-بىرىمەن تانىسىپ، وزەكتى تاقىرىپتاردى تالقىلاپ، كوكەيىندەگى سۇراقتاردىڭ جاۋابىن الا الاتىنداي مۇمكىندىك جاساۋ. فورۋم پايدالى ءارى قىزىقتى بولۋى ءۇشىن ۇيىمداستىرۋشىلار جاسوسپىرىمدەردىڭ فوكۋس-توبىنا ارنايى زەرتتەۋ جۇرگىزدى. ناتيجەسىندە جاسوسپىرىمدەردىڭ قانداي تاقىرىپتا سويلەسكىسى كەلەتىنىن ساراپشىلارمەن بىرگە انىقتادى.
شارا سپيكەرلەرى قاتىسۋشىلارعا اتا-انامەن قارىم-قاتىناستى قالاي قۇرۋ كەرەكتىگى، الەۋمەتتىك كاسىپكەرلىك پەن ۆولونتەرلىك تۋرالى ايتىپ قانا قويماي، كامەرا الدىندا ءوزىن ەركىن سەزىنۋدىڭ قىر-سىرىن ۇيرەتەدى. سونداي-اق، بلوگ جۇرگىزۋدىڭ باستاعاندا نەنى ەسكەرۋ كەرەك ەكەنى جايلى دا ايتادى. ال يۋنفپا ساراپشىلارى جاستارعا ارنالعان ارنايى دەنساۋلىق ورتالىقتارى تۋرالى اقپارات بەرەدى جانە جاسوسپىرىمدەردىڭ رەپرودۋكتيۆتى دەنساۋلىعى تۋرالى ماڭىزدى ماسەلەلەردى قوزعايدى. YPEER حالىقارالىق جەلىسىنىڭ ۆولونتەرلەرى جاسوسپىرىمدەردىڭ كوشباسشىلىق قابىلەتى، زورلىق-زومبىلىققا قارسى تۇرۋ جانە ومىرلىك داعدىلارعا نەگىزدەلگەن ءبىلىم بەرۋ ماسەلەلەرىن كوتەرەدى.
شارا بارىسىندا تاۋەكەل ءمۇسىلىم، سەرىك ءشارىپ (شاكو)جانە گۇلناز جولانوۆا سىندى تانىمال جۇلدىزدار وزدەرىنىڭ ءجاسوسپىرىم شاعىن ەسكە ءتۇسىرىپ، تۇلعا بولىپ قالىستاستۋداعى اتالمىش كەزەڭنىڭ ماڭىزى جايلى ايتادى.
Speak فورۋمى جاسوسپىرىمدەر مەن ولاردىڭ دەنساۋلىعى، قىزىعۋشىلىقتارى، حوببيلەرى جانە ولاردىڭ مۇمكىندىكتەرى تۋرالى تالقىلاۋلار وتەتىن اشىق الاڭ. سونداي-اق، Speak Up – شەبەرلىك ساباقتارى، پسيحولوگيالىق كەڭەستەر، جاڭا تانىستار جانە جەكسەنبىنى كوڭىلدى ءارى پايدالى وتكىزۋ مۇمكىندىگى!