وسى جىلعى 10 ايدا ءۇشىنشى ەلدەرمەن تاۋار اينالىمى 43،6%-عا ءوستى
جىل باسىنان بەرى مەملەكەتتىك بيۋدجەتكە سالىق تۇسىمدەرى بويىنشا جوسپار 103،4% ورىندالدى، دەپ حابارلايدى Almaty-akshamy.kz.
مەملەكەتتىك كىرىستەر كوميتەتىنىڭ مالىمەتىنشە، جوسپار 11 316،8 ملرد تەڭگەگە بەلگىلەنىپ، 382 ملرد تەڭگەگە اسىرا ورىنداۋمەن 11 698،8 ملرد تەڭگە تۇسكەن. بۇل وتكەن جىلعى ۇقساس كەزەڭمەن سالىستىرعاندا 1،4 ەسە نەمەسە 3 400،2 ملرد تەڭگەگە وسكەنىن كورسەتەدى.
«مۇنىڭ ىشىندە رەسپۋبليكالىق بيۋدجەت 101،1% ورىندالدى، وتكەن جىلعى ۇقساس كەزەڭىمەن سالىستىرعاندا 1،5 ەسە نەمەسە 2 518،5 ملرد تەڭگەگە ءوستى. جەرگىلىكتى بيۋدجەت 108،5% ورىندالدى بىلتىرعى ۇقساس كەزەڭمەن سالىستىرعاندا 30،8% نەمەسە 881،7 ملرد تەڭگەگە ءوستى»، - دەپ جازدى ۆەدومتۆودان.
تۇسىمدەردىڭ وسۋىنە مىناداي فاكتورلار اسەر ەتتى: 2022 جىلى 10 ايدا وتكەن جىلعى ۇقساس كەزەڭمەن سالىستىرعاندا نەگىزگى ەكسپورتتىق پوزيسيالارعا، ونىڭ ىشىندە مۇنايعا 46،9%، مىرىشقا 21،9%، اليۋمينييگە 13،9% جانە التىنعا 0،6% باعانىڭ ءوسۋى بايقالادى. شيكى مۇنايعا سالىناتىن كەدەندىك اكەتۋ باجىنىڭ مولشەرلەمەسى 43،1%-عا ءوستى.
«وسى جىلعى 10 ايدا ءۇشىنشى ەلدەرمەن تاۋار اينالىمى 43،6%-عا ءوستى (ەكسپورت 48،3%-عا، يمپورت 32،5%-عا ءوستى). وتكەن جىلعى ۇقساس كەزەڭمەن سالىستىرعاندا جىل باسىنان بەرگى وتكىزۋ بويىنشا اينالىم 22 %-عا ۇلعايدى»، - دەلىنگەن حابارلامادا.