Instagram قولدانۋشىلارى فولگامەن ورالعان روۋتەر كورسەتىلگەن ۆيدەونى كورگەن بولار . روليك اۆتورىنىڭ ايتۋىنشا، بۇل قاراپايىم ءادىس ينتەرنەتتىڭ ساپاسىن جاقسارتۋعا كومەكتەسەدى-مىس.
فولگا شاعىلىستىرعىش قىزمەتىن اتقارىپ، سيگنالدى قاجەت جاققا باعىتتايدى، سونىمەن قاتار ەلەكتروماگنيتتىك ساۋلەلەنۋدى ءىشىنارا بلوكتايدى ەكەن. بۇل راس پا، جوق پا ەكەنىن Stopfake.kz انىقتاپ كوردى، دەپ حابارلايدى aqshamnews.kz.
يىلگىش مەتالل پاراقشا تۋرالى كونسپيرولوگتار كوپتەن بەرى ايتىپ ءجۇر. فولگادان جاسالعان باس كيىمدەر ەستەرىڭىزدە بولار. ول ميدى ەلەكتروماگنيتتىك ساۋلەلەنۋدەن قورعاۋ ءۇشىن كيۋگە ۇسىنلعان ەدى. شىندىعىندا، مۇنداي قاسيەتتەرگە يە باس كيىمدەر جوق.
رەسەيدەگى تەحنولوگيالار تۋرالى ەڭ ءىرى جوبالاردىڭ ءبىرى Hi-Tech Mail پىكىرىنشە، روۋتەردى فولگاعا وراعان دۇرىس ەمەس.
«فولگا بىردەڭەنى بۇعاتتاسا دا، ول زياندى ساۋلەلەنۋمەن بىرگە سيگنالدىڭ ءوزىن دە بۇعاتتايتىن ەدى»، – دەيدى ساراپشىلار.
سونىمەن قاتار، فولگاداعى ەلەكتر جابدىقتارىندا تابيعي سالقىنداتۋ بولمايدى. قىزىپ كەتۋدىڭ سالدارىنان ول ىستەن شىعادى، ءتىپتى دانىپ كەتۋى دە مۇمكىن.
Wi-Fi تەحنولوگياسى 1997 جىلى جاسالعان، سودان بەرى ونىڭ ادام دەنساۋلىعى مەن قورشاعان ورتاعا اسەرىنە قاتىستى بىرنەشە رەت عىلىمي زەرتتەۋلەر جۇرگىزىلدى. الايدا، ولاردىڭ ەشقايسىسى Wi-Fi دەنساۋلىققا ءقاۋىپ توندىرەتىنىن راستاعان جوق. تەحنولوگيا قولدانىلىپ كەلە جاتقان 27 جىلدا ول ادامداردىڭ اۋرۋىنا سەبەپ بولعان ەمەس، سونداي-اق ادامداردىڭ ءال-اۋقاتىنا تەرىس اسەر ەتكەن جاعدايلار تىركەلگەن جوق.
مامانداردىڭ ەسەپتەۋىنشە، تەلەفونمەن سويلەسكەن 20 مينۋتتىڭ ىشىندە ادام Wi-Fi-دى ءبىر جىل قولدانعانداعى ميكروتولقىندى ساۋلەلەنۋ اسەرىنە كوبىرەك تۇسەدى. ال 20 نوۋتبۋك پەن ەكى روۋتەر بىرگە ءبىر ۇيالى تەلەفونمەن بىردەي مولشەردە ساۋلە شىعارادى.
وسىلايشا، رۋتەردى فولگاعا وراۋ سيگنالدىڭ ساپاسىن جاقسارتپايدى، كەرىسىنشە ونى بۇعاتتاپ، قۇرىلعىنىڭ قىزىپ كەتۋىنە اكەلۋى ىقتيمال. ال Wi-Fi-دان شىعاتىن ەلەكتروماگنيتتىك ساۋلەلەنۋگە كەلەتىن بولساق، بۇعان قاتىستى سەنىمدى عىلىمي دالەلدەر جوق.