ءۇش عاسىرلىق تاريحى بار، الەمدەگى ەڭ بەدەلدى دانيا كورولدىك تەاترى جايلى ەستىگەن بە ەدىڭىز؟ مۇندا الەمنىڭ تۇكپىر-تۇكپىرىنەن كەلگەن ەڭ تالانتتى ارتىستەر ونەر كورسەتىپ، ەڭ مىقتى حورەوگرافتار ساباق بەرەدى. ال الماتى وبلىسىنداعى اۋىلدان شىققان قاراپايىم جىگىت مەيرامبەك نازارعوجايەۆ وسى كورولدىك تەاتردىڭ ءسوليسى بولىپ ومىرلىك كەلىسىمشارتقا وتىرعان. بۇل - ەكى تاراپتىڭ اراسىندا ءومىر بويى كۇشىندە بولاتىن كەلىسىم. ياعني، مەيرامبەك دانيا كورولدىك تەاترىندا ءومىر بويى جۇمىس ىستەي الادى. الايدا ءارتىس ءوز ەركىمەن جۇمىستان شىعۋىنا بولادى. اqshamnews.kz ءتىلشىسى الەم مويىنداعان تەاتردىڭ ارتىسىمەن سۇحباتتاستى.
سۋرەت: دينا ليتپين/اqshamnews.kz
مەيرامبەك نازارعوجايەۆ 1996 جىلى الماتى وبلىسى ىلە اۋدانى، قاراوي اۋىلىندا دۇنيەگە كەلگەن. ول 2018 جىلدان بەرى دانيا كورولدىك تەاترىندا بالەت ءارتىسى رەتىندە ونەر كورسەتىپ ءجۇر. مەيرامبەك ءتىپتى ەۋروپالىقتاردىڭ وزىنە سيرەك بۇيىراتىن مۇمكىندىككە، ياعني ومىرلىك كەلىسىمشارتقا يە ونەرپاز.
"بالەتتى تاڭداۋىما تاتەم سەبەپكەر بولدى"
بالا كەزىندە بالەتتىڭ ءيىسى مۇرنىنا دا بارماعان اۋىلدىڭ قاراپايىم، دوپ تەۋىپ وسكەن بالاسى ەۋروپاعا اپارار جولدىڭ قالاي قالانعانى جايلى بىلايشا اڭگىمەلەدى.
"كىشكەنتايىمدا بالەت تۋرالى تۇسىنىك مۇلدە بولمادى. ءبىراق اۋىلدا كوپ كونسەرتتە ءان ايتىپ، دومبىرادا وينايتىنمىن. فاريدا ەسىمدى تۋىسقان تاتەم: 'مەيرامبەك، سەن ونەرگە جاقىنسىڭ، ءقازىر ىرىكتەۋ ءجۇرىپ جاتىر، باعىڭدى سىناپ كور" دەپ. الماتى حورەوگرافيالىق ۋچيليششەسىنە جول سىلتەگەن بولاتىن. سولايشا 2006 جىل سول وقۋ ورنىنىڭ ستۋدەنتى اتانىپ، وقۋىمدى قىزىل ديپلوممەن ءبىتىردىم. كوپتەگەن دۇنيەجۇزىلىك كونكۋرس پەن فەستيۆالدىڭ جۇلدەگەرى بولدىم. "، – دەيدى مەيرامبەك نازارعوجايەۆ.
سۋرەت: instagram.com/meiram0l
دانياعا باستاعان داڭعىل
مەيرامبەك 2014 جىلى ۋچيليششەنى ءتامامداپ، 1 جىل رەسەيدە، 2 جىل گەرمانيادا ەڭبەك ەتىپ، دانياعا جول تارتقان.
"باستى ارمانىم - شەتەلدە تاجىريبەلى حورەوگرافتاردان ءبىلىم الۋ ەدى. شەتەلگە كەتۋ مۇمكىندىگى بولسا، قالت جىبەرمەۋگە تىرىساتىنمىن. بىرگە وقيتىن دوسىم دانيا كورولدىك تەاترى جايلى كوپ ايتاتىن. وعان ءتۇسۋ ورىندالماس ارمانداي كورىنەتىن. سەبەبى بۇل تەاترعا مىڭداعان ادام ءوزىنىڭ CVء-ىن (سurriculum vitae - تۇيىندەمە - جۋر.) جىبەرەدى. مەن دە جىبەرىپ كوردىم. باسەكەلەستىكتىڭ كوپتىگىن ەسەپتەپ، شاقىرتۋ كەلمەيتىن شىعار دەگەن ەدىم. الايدا ءبىر كۇنى قاراسام "جابىق قارالىمعا كەلىڭىز" دەگەن حات كەلگەن ەكەن. قۋانا كەتىپ، دوسىممەن بىرگە دانياعا بارىپ باعىمىزدى سىناپ كورەيىك دەدىك" دەيدى ول.
شاقىرتۋعا شارق ۇرا قۋانعان مەيرامبەك تاريحي تەاتردى كەم دەگەندە كوزبەن كورىپ قايتاتىنىن قاناعات تۇتقان. الايدا شىعارماشىلىق سىناقتىڭ ناتيجەسى كۇتپەگەن جەردەن ونىڭ وڭ جامباسىنا تۇسكەن.
"جابىق قارالىمدا كلاسسيكالىق جاتتىعۋلاردى كورسەتتىك. سونان سوڭ، ءبىزدى فيزيوتەراپيەۆتكە جىبەردى. ول ءبىزدىڭ دەنساۋلىعىمىزدى، بۋىندارىمىزدى، جالپى دەنەمىزدى تەكسەرىپ شىقتى. جاۋابىن پوشتاعا جىبەرەمىز دەگەن سوڭ، ءبىز دوسىمىز ەكەۋمىز دانيانى كورىپ قايتقانىمىزعا، كورولدىك تەاتردا باسقا ارتىستەرمەن بىرگە بولعانىمىزعا ريزا بولىپ قايتتىق. شىنى كەرەك، تەاترعا قابىلدانامىن دەپ ويلامادىم. قازاقستانعا بارعان سوڭ ەلەكترون پوشتاما حات كەلدى. سەنەر-سەنبەسىمدى بىلمەدىم. ول كەزدە مەن اعىلشىن ءتىلىن اسا بىلمەيتىنمىن. دوسىما بارىپ، حاتتى وقىتىپ، بوركىمدى اسپانعا اتتىم. سەبەبى بۇل - مىڭنان بىرىنە عانا بۇيىرا بەرەتىن مۇمكىندىك" دەيدى مەيرامبەك.
سۋرەت: instagram.com/meiram0l
تەاترداعى جاڭا ءومىر قالاي باستالدى؟
مەيرامبەك دانياعا كوشكەننەن كەيىن ءومىرى قالاي وزگەرگەنى جايلى اڭگىمەلەپ بەردى.
"دانيالىقتار - ەڭ باقىتتى ادامدار. قيىن كەزدە جانىڭنان تابىلىپ، قولداۋ كورسەتۋگە دايىن تۇرادى. ءومىر دەڭگەيى جاعىنان دا بىزدەن ءبىرشاما الدا تۇر. ءبىر كەمشىلىگى - اۋا رايىنىڭ قۇبىلمالى بولۋى. 5 مينۋت سايىن وزگەرەدى. مەن تەز ۇيرەنىپ كەتتىم. جاڭادان كەلگەندەر "كۇننىڭ كوزىن كورەسىندەر مە؟" دەپ تاڭعالىپ جاتادى. ءوز باسىم قۇبىلمالى اۋا رايىن ۇناتامىن. تەاترداعى تارتىپكە دە بەيىمدەلۋ وڭاي بولدى. باستىسى ۇلكەن ىنتا بولسا بولدى ەكەن" دەدى ول.
سۋرەت: instagram.com/meiram0l
"ساحنادا اياق كيىمىم ءتۇسىپ قالدى"
مەيرامبەك نازارعوجايەۆ ساحنادا ونەر كورسەتۋ كەزىندە بولعان قىزىقتى جايتتاردى اڭگىمەلەپ بەردى.
"ساحنادا قىزىق جايت كوپ بولدى. بىردە بيلەپ جاتىپ، بالەتكە ارنالعان اياق كيىمىم ءتۇسىپ قالعانى بار. ءبارى كۇلىپ جاتتى. مەن ءتۇر بەرمەي، ءبيىمدى جالعاستىرا بەردىم. ساحنانىڭ ورتاسىندا ءبىر اياق كيىم جاتىر. ءبارى مەنىڭ اياعىمنان ءتۇسىپ قالعانىن ءتۇسىندى. بارىپ الايىن دەسەڭ، مۋزىكا ءجۇرىپ جاتىر. امالسىز قويىلىم بىتكەنشە ساحنادا جاتتى" دەيدى مەيرامبەك.
سۋرەت: instagram.com/meiram0l
"بولاشاعىمدى قازاقستاندا كورەمىن"
مەيرامبەك بولاشاعىن قازاقستانمەن بايلانىستىراتىنىن جانە وتباسىن، تۋىستارىن، ءتىپتى ءۇيدىڭ تاماعىن ءجيى ساعىناتىنىن ايتتى. ونىڭ سوزىنشە، ءاربىر قازاقستاندىق قايدا جۇرسە دە، ءوز ەلىنىڭ دامۋىنا ۇلەسىن تيگىزۋى كەرەك. مەيرامبەك ءوزىنىڭ دانياداعى تاجىريبەسىن قازاقستاندا پايدالانۋدى ماقسات ەتىپ، وسىنداي ۇلكەن ارمانىنا العاشقى قادامىن جاسادى. وسىلايشا، ءۇش عاسىرلىق تاريحى بار دانيا كورولدىك تەاترى 27 ماۋسىم كۇنى تۇڭعىش رەت قازاقستانعا كەلىپ، الماتى تەاترىندا قازاقستاندىقتار ءۇشىن ونەر كورسەتتى.
"باسىندا قورقىنىش بولدى، سەبەبى بالەت ەرەكشە تالعامدى قاجەت ەتەتىن ونەر. قويىلىمدى كورەرمەندەر قابىلداي ما، كەلۋشىلەر بولا ما دەگەن سياقتى كۇماندار بولدى. ءبىراق باستىسى – يدەيامىز جۇزەگە اسىپ، دانيا كورولدىك تەاترىنىڭ ارتىستەرى الماتىدا العاش رەت ونەر كورسەتىپ جاتىر. بۇل مەن ءۇشىن ۇلكەن جەتىستىك. سونىمەن قاتار، وسى تاريحي تەاتردىڭ ارتىستەرى الماتى حورەوگرافيالىق ۋچيليششەسىنىڭ وقۋشىلارىنا شەبەرلىك ساعاتىن وتكىزدى. بۇل دا ۇلكەن ناتيجە" دەدى مەيرامبەك.
سۋرەتتە: دانيا كورولدىك تەاترىنىڭ ارتىستەرى
الداعى ۋاقىتتا مەيرامبەك ءوزىنىڭ دوستارىمەن بىرگە بىرنەشە جوبانى جۇزەگە اسىرىپ، قازاقستان مادەنيەتىنىڭ دامۋىنا ۇلەس قوسۋدى ماقسات ەتىپ وتىر. ونىڭ سوزىنشە، ولاردىڭ بىرلەسكەن Nomad Ballet Project جوباسى اياسىندا بىرنەشە قىزىقتى باستامانى جۇزەگە اسىرۋ ويدا بار.
"الداعى ۋاقىتتا ەلىمىز ءۇشىن تاعى دا بىرنەشە جوبانى جۇزەگە اسىراتىن بولامىز. سول ءۇشىن قازاقستاندىق دوستارىممەن بىرگە Nomad Ballet Project دەگەن جوبانى ىسكە قوسىپ جاتىرمىز. بۇل جوبانىڭ اياسىندا بىرنەشە ماڭىزدى جوبانى جارىققا شىعارساق دەگەن نيەتىمىز بار" دەدى نازارعوجايەۆ.