ەۋروپاداعى 46 ەل قازاقستانعا قۇقىقتىق كومەك كورسەتۋ جانە اكتيۆتەردى قايتارۋ مۇمكىندىگىن اشپاق

18 ماۋسىمدا ەۋروپا كەڭەسىنىڭ مينيسترلەر كوميتەتى قازاقستان رەسپۋبليكاسىنىڭ باس پروكۋراتۋراسى باستاماشىلىق ەتكەن قىلمىستىق ىستەر بويىنشا قۇقىقتىق كومەك كورسەتۋ تۋرالى ەۋروپا كەڭەسىنىڭ كونۆەنسياسىنا قوسىلۋ جونىندەگى ءوتىنىمدى ماقۇلدادى، - دەپ حابارلايدى aqshamnews.kz. 
 
كونۆەنسياعا قاتىسۋ قازاقستاندىق قۇقىق قورعاۋ ورگاندارىنا قىلمىستىق ىستەر بويىنشا دالەلدەمەلەر الۋعا، زاڭسىز جولمەن شەتەلگە شىعارىلعان اكتيۆتەردى ەلگە قايتارۋعا، قىلمىسقا قارسى كۇرەس جانە حالىقارالىق قاۋىپسىزدىكتى قامتاماسىز ەتۋ سالاسىندا 46 ەۋروپالىق مەملەكەتپەن ىنتىماقتاستىقتىڭ تيىمدىلىگىن ارتتىرۋعا مۇمكىندىك بەرەدى. بۇل ەلىمىزدە «زاڭ مەن ءتارتىپ» تۇجىرىمداماسى اياسىندا حالىقارالىق ىنتىماقتاستىقتى دامىتۋ ارقىلى زاڭدىلىقتى نىعايتۋعا باعىتتالعان مەملەكەتتىك ساياساتقا سايكەس كەلەدى.

سونىمەن قاتار، بۇل كوپجاقتى حالىقارالىق قۇجاتقا قوسىلۋ قازاقستاندى قىلمىسقا قارسى ءىس-قيمىل سالاسىندا ءاربىر ەۋروپالىق مەملەكەتپەن جەكە ەكىجاقتى شارتتار جاساسۋ قاجەتتىلىگىنەن بوساتادى.

ايتا كەتەيىك، قازاقستان وسى كونۆەنسياعا قوسىلۋ ءۇشىن 20 جىلدان استام ۋاقىت بويى قادامدار جاساپ كەلەدى، الايدا بۇرىنعى وتىنىمدەر ەۋروپا كەڭەسىنە مۇشە كەيبىر مەملەكەتتەردىڭ قارسىلىقتارىنا بايلانىستى ۇنەمى قابىلدانباعان.

مۇنداي شاقىرتۋدى الۋ - قازاقستاننىڭ قىلمىستىق قۇقىقتىق جۇيەسىنە، ونىڭ ىشىندە زاڭ ۇستەمدىگىنە، ادام قۇقىقتارى مەن بوستاندىقتارىنىڭ ساقتالۋىنا ەۋروپالىق قاۋىمداستىق تاراپىنان سەنىمنىڭ بەلگىسى جانە قازاقستاندىق پروكۋرورلار مەن ديپلوماتتاردىڭ كوپجىلدىق قاجىرلى ەڭبەگىنىڭ ناتيجەسى.