مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ءمىنسىز قىزمەت اتقارعاندارعا اتاق بەرىلەتىنىن ايتتى، - دەپ حابارلايدى aqshamnews.kz ءتىلشىسى.
"قۇقىق قورعاۋ ورگاندارىندا ۇزدىكسىز ءارى ءمىنسىز قىزمەت اتقارعاندارعا "قۇرمەتتى قىزمەتكەر" اتاعى بەرىلەدى. الايدا كەيبىر قۇرىلىمداردا بۇل جوعارى اتاق باسشىلارعا عانا بۇيىرادى. قاتارداعى قاراپايىم قىزمەتكەرلەر اراسىندا ۇزاق جىلدار بويى كاسىبي بورىشىن ادال اتقارىپ جۇرگەن لايىقتى كانديداتتار جەتكىلىكتى. قىزمەتكەرلەردىڭ كاسىبي دەڭگەيىن ارتتىرىپ، مورالدىق رۋحىن كۇشەيتۋ ماڭىزدى"، - دەدى توقايەۆ.
سونداي-اق، پرەزيدەنت كوشەلەرگە قىزمەت بابىندا قازا بولعان قاھارمانداردىڭ ەسىمىن بەرۋدى ۇسىندى.
"وسى ورايدا، مەن مەكەمەلىك ناگرادالارعا قىزمەت بابىندا قازا بولعان قاھارمانداردىڭ ەسىمىن بەرۋ ماسەلەسىن قاراستىرۋدى ۇسىنامىن. سونداي-اق كوشەلەر مەن قۇقىق قورعاۋ مەكەمەلەرىن باتىرلاردىڭ اتىمەن اتاۋعا بولادى.
مۇنداي تاجىريبە ەلىمىزدە بۇرىننان بار. لاڭكەستى ۇستاۋ كەزىندە ەرلىكپەن قازا تاپقان حالىق قاھارمانى عازيز بايتاسوۆتىڭ ەسىمى تارازداعى ورتالىق كوشەلەردىڭ بىرىنە بەرىلدى. سونداي-اق قالاداعى وقۋ-جاتتىعۋ پوليگونى دا باتىردىڭ اتىمەن اتالعان. تاياۋدا ونىڭ ءومىرى مەن ەرلىگى تۋرالى "كاپيتان بايتاسوۆ" اتتى كوركەم فيلم كورەرمەن نازارىنا ۇسىنىلماق.
ءورت ءسوندىرۋ كەزىندە وپات بولعان اسقار زابيكۋلين دە ەلدىڭ ەسىندە. استاناداعى ءورت ءسوندىرۋ بولىمىنە جانە سول ءبولىم ورنالاسقان كوشەگە ونىڭ ەسىمى بەرىلدى. بۇل ازاماتتاردى ناعىز بەيبىت كۇننىڭ باتىرلارى دەۋگە بولادى. ولار اقتىق دەمى قالعانشا انتقا ادال بولدى، قىزمەتتىك پارىزىن وتەۋ جولىندا ءوز ومىرلەرىن قۇربان ەتتى"، - دەدى توقايەۆ.