ەۋروپادا كۇن ىسىپ جاتىر

اپتاپ ىستىقتان ەۋروپانىڭ ورتالىق جانە وڭتۇستىك ايماقتارىنداعى اۋانىڭ تەمپەراتۋراسى 40 گرادۋسقا دەيىن كوتەردى. يتاليا، رۋمىنيا جانە باسقا ەلدەردە بيلىك كۇننىڭ ەڭ ىستىق ساعاتتارىندا اباي بولۋ، سۋدى كوپ ءىشۋ جانە سىرتقا شىقپاۋ كەرەكتىگى ەسكەرتىلۋدە. 

بەيسەنبىدە يتاليا ۇكىمەتى جەتى قالادا، نەگىزىنەن ەلدىڭ ورتالىق ايماقتارىندا، سونداي-اق ەل استاناسى ريم مەن سولتۇستىك-شىعىستاعى تريەستتە كۇن رايىنا بايلانىستى قاۋىپتىلىكتىڭ «قىزىل» دابىل دەڭگەيىن جاريالادى. جىلۋ ىلعالدىلىق اسەرىنەن كۇشەيىپ جاتىر جانە دەنى ساۋ، سونداي-اق دەنساۋلىعى ناشار ادامدارعا دا اسەر ەتۋى مۇمكىن، دەپ ەسكەرتتى بيلىك.

جازدىڭ اپتاپ ىستىعى قالىپتى نورمادان ەرتەرەك جانە رەكوردتىق تەمپەراتۋرا 13 اي قاتارىنان ساقتالىپ وتىرعانىنا بايلانىستى كەيبىر ساراپشىلار بۇل ەۋروپاداعى ەڭ ىستىق جاز بولۋى مۇمكىن دەپ ويلايدى.

وسىعان ۇقساس ەسكەرتۋلەر كورشىلەس حورۆاتيادا، سونداي-اق ەلدىڭ شىعىسى مەن وڭتۇستىگىندە شىعارىلدى. حورۆاتيانىڭ باستى تۋريستىك كۋرورتى، ادريات تەڭىزىندەگى وڭتۇستىك دۋبروۆنيك قالاسىندا تاڭ اتقاندا اۋانىڭ تەمپەراتۋراسى سەلسيي بويىنشا 28 گرادۋس بولدى، بۇل كۇن باتقان كەزدە جەڭىلدىك بولمايتىنىن كورسەتىپ وتىر. 

وسى اپتادا البانياداعى گرەكيا شەكاراسىنا جاقىن جەردە، سونداي-اق بوسنيا مەن يتاليادا ورمان ءورتى تىركەلدى. بەيسەنبىدە گرەكيانىڭ وڭتۇستىگىندەگى كورينف اۋدانىندا جانە ەگەي تەڭىزىندەگى شىعىس لەسبوس ارالىندا بىرنەشە ءورت بولدى.

سارسەنبىدە چەحيا استاناسى پراگادا اۋانىڭ تەمپەراتۋراسى 34 گرادۋسقا جەتىپ، بەيسەنبىدە ازداپ تومەندەدى. قالالىق حايۋاناتتار باعىنىڭ قىزمەتكەرلەرى جانۋارلارعا جوعارى تەمپەراتۋرا جاعدايىندا جەڭىل بولۋ ءۇشىن ون توننا مۇزدى پايدالاندى. مۇز حايۋاناتتار باعىنىڭ ءار جەرىنە قويىلىپ، جانۋارلار پانالايتىن سالقىن جەرلەر جاسالدى. 

سەيسەنبى مەن سارسەنبىدە رۋمىنيا استاناسى بۋحارەستتە كوشەدەگى تەرمومەتر باعانالارى 42 گرادۋستى كورسەتتى، دەگەنمەن رەسمي كورسەتكىشتەر بىرنەشە گرادۋس تومەن بولعان.

كورشىلەس سەربيا وسى جازدا رەكوردتىق تەمپەراتۋرا تۋرالى حابارلادى: بەيسەنبى كۇنى تاڭەرتەڭ ەلدىڭ سولتۇستىگىندە تەرمومەتر باعاناسى 35س-قا دەيىن جەتتى.