مۇنداي ءوسىم 2011 جىلدان بەرى العاش رەت بايقالىپ وتىر، دەپ حابارلايدى aqshamnews.kz
قازاقستاندا ەت پەن قۇس ەتى تامىز ايىندا كەيىنگى 14 جىلداعى ەڭ جوعارى قارقىنمەن قىمباتتادى.
ۇلتتىق ستاتيستيكا بيۋروسىنىڭ دەرەگىنشە، شىلدەمەن سالىستىرعاندا بۇل ساناتتاعى ونىمدەر 3،2% وسكەن.
باعانىڭ جوعارى ءوسىمى سيىر ەتىنە تيەسىلى. سۇيەكتى ەت ءبىر ايدا 3،7%، سۇيەكسىز – 3،6% قىمباتتادى. جايا باعاسى دا 3،5% ءوستى. قوي ەتى دا ارتتا قالعان جوق: سۇيەكتى ەت 3،3% قىمباتتادى.
ستاتيستيكاعا قاراعاندا، جىلدىق ماندە سيىر ەتى شامامەن 25% كوتەرىلگەن: سۇيەكتى ەت – 23،2%، سۇيەكسىز – 24،8%. قوي ەتى دە وسى دەڭگەيدە – 23،3%.
اۋىل شارۋاشىلىعى مينيسترلىگى باعانىڭ ءوسۋىن، ەڭ الدىمەن، ەكسپورتتىڭ كۇرت ارتۋىمەن جانە تاريفتەردىڭ كوتەرىلۋىمەن بايلانىستىرىپ وتىر. سالا ماماندارى بۇعان قوسىمشا جۇيەلى پروبلەمالاردى – كادر تاپشىلىعى مەن وندىرىستەگى قۇرىلىمدىق ماسەلەلەردى العا تارتادى.
قوي ەتىنىڭ قىمباتتاۋىنا قاتىستى رەسمي تۇسىنىكتەمەلەر از بولعانىمەن، ەكسپورت فاكتورى مۇندا دا شەشۋشى ءرول ويناعان. بيىلعى العاشقى جارتىجىلدىقتا قوي ەتى ەكسپورتى 2،6 ەسە وسكەن.
بۇعان دەيىن قازاقستاندا وندىرىلگەن سيىر ەتىنىڭ وزىندىك قۇنى مەن دۇكەندەردەگى باعاسى اراسىندا ايتارلىقتاي ايىرماشىلىق بارىن جازعان ەدىك. ال سيىر ەتىنە باعانىڭ ءوسۋى جىل باسىنان بەرى 20%-دان استى.
جالپى، بىلتىر ەلدەگى 400 مىڭ توننا ەتتىڭ 22 مىڭ تونناسى عانا ەكسپورتتالعان.