حالقىمىز «ەستىمەگەن ەلدە كوپ» دەپ بەكەر ايتپاسا كەرەك. شىنىمەن دە، جەر جۇزىندە كوپشىلىك بىلە بەرمەيتىن ەرەكشە قۇبىلىس، تۋىندى نە جان-جانۋارلار بار. ولاردىڭ كەيبىرى قولدان جاسالسا، تاعى ءبىرى تۋا ءبىتتى تابيعاتىنان دارىعان. بۇگىندە مۇنداي ەرەكشە فاكتىلەردىڭ ءبىرازى گيننەسس رەكوردتار كىتابىندا تىركەلگەن. ءبىز وسى ءبىر ەرەكشە كىتاپتا جازىلعان ەڭ ەرەكشە رەكوردتاردى قاراپ كوردىك.
باسىمەن باعىندىرعان
مەدەۋدەگى «دەنساۋلىق باسپالداعىنىڭ» شىڭىنا اياقپەن شىققاندا ەنتىگىپ قالاتىندار بار. ال گيننەسس رەكوردتار كىتابىندا ەنگەن قىتايلىق گيمناست لي لونگلونگ ءبىرشاما باسپالداقتى باسپەن باعىندىرعان. سپورتشى باسىمەن تىك تۇرىپ، 36 باسپالداقتى بىرتىندەپ باسىپ شىققان. لي لونگلونگتىڭ ەرەكشە رەكوردى بەينەجازباعا تۇسىرىلگەن، ونى عالامتوردان كورۋگە بولادى.
ەرەكشە دجوستيك
كيبەرسپورت الەمىندە «RockyNoHands» لاقاپ اتىمەن تانىمال روككي ستاۋتەنبۋرگ الەمدىك رەكوردتار كىتابىنا ەرەكشە دجوستيك ارقىلى ەڭ كوپ جەڭىسكە جەتكەن ادام رەتىندە ەنگەن. ول كومپيۋتەر ويىندارىن اۋىز ارقىلى باسقاراتىن دجوستيكپەن وينايدى. سەبەبى، روككي 2006 جىلدان بەرى مويىننان تومەن سال بولىپ قالعان. بۇل قۇرىلعىنى وعان باۋىرى اكەپ بەرگەن. ەرەكشە دجوستيككە ۇيرەنىپ العان سوڭ، روككي Battle Royale، PlayerUnknown Battlegrounds (PUBG) جانە Fortnite سىندى ويىنداردى كاسىبي دەڭگەيدە ويناي باستاعان. بۇگىندە ونىڭ Fortnite ويىنىندا 500-دەن استام جەڭىسى بار. ول ءوز ويىندارىن تىكەلەي ەفيردە كورسەتەدى.
قايىققا اينالعان اسقاباق
وتكەن جىلى اقش-تىڭ نەبراسكا شتاتىندا ەڭ جاڭا ءارى ەرەكشە رەكوردتاردىڭ ءبىرى تىركەلدى. دۋەين حانسەن 60 جاسقا تولعان مەرەيتويىن ەرەكشە اتاپ وتكەن. ول سالماعى 846 فۋنت (1865 كگ) بولاتىن اسقاباققا وتىرىپ ميسسۋري وزەنىندە 38 ميل (61 كم) ءجۇزىپ وتكەن. امەريكالىق رەكوردشى «ۇلكەن بەرتانىڭ» (قايىققا اينالعان اسقاباق اتاۋى) ىشىندە جالپى ەسەپپەن 11 ساعات وتكىزگەن. مۇنداي ەرەكشە جەتىستىگى ءۇشىن دۋەين حانسەن گيننەس رەكوردتار كىتابىندا ەندى.
شىمىر شىناشاق
يتالياندىق تاسيو گاۆيولي ءوزىنىڭ كىشكەنتاي ساۋساعىمەن تەمىرگە ءۇزىلىسسىز 36 رەت تارتىلعان. ونىڭ رەكوردى 2018 جىلى 7 قازان كۇنى رەسمي تىركەلدى. تاسيونىڭ ايتۋىنشا، بۇل رەكوردتى ورناتۋعا ونىڭ مىسىعى سەبەپ بولعان.
«مەنىڭ العاشقى رەكوردىمدى ورناتۋعا مىسىعىم تۇرتكى بولدى. ول كولىك اپاتى كەزىندە ءبىر اياعىنان ايىرىلعان ەدى. كەيىن ونىڭ ءۇش اياقتاپ اعاشقا شىققانىن كورگەندە جۇرەگىم اۋىراتىن. سوندىقتان مەن دە ونىڭ قۇرمەتىنە ءبىر قولمەن تەمىرگە تارتىلا باستادىم. ءبىراز ۋاقىتتان كەيىن قولدارىم كۇشەيىپ، شىناشاقپەن تارتىلاتىن دەڭگەيگە جەتتىم»، – دەيدى رەكورد يەسى.
ازىرلەگەن دوسبول اتاجان.