ەكس-پرەزيدەنت تاعى ءبىر اتاعىنان ايىرىلدى

«قۇرمەتتى سەناتور» مارتەبەسى نۇرسۇلتان نازاربايەۆقا 2019 جىلدىڭ 30 مامىرىندا بەرىلگەن.

سەنات ءتوراعاسى ماۋلەن اشىمبايەۆتىڭ ايتۋىنشا، ەندى «قۇرمەتتى سەناتور» اتاعى ەشكىمگە بەرىلمەيدى، دەپ حابارلايدى Almaty-akshamy.kz

«بۇعان دەيىن «قۇرمەتتى سەناتور» اتاعى ءبىر-اق ادامعا بەرىلگەن. ەندى زاڭداردا «قۇرمەتتى سەناتور» دەگەن اتاق جوق. ونى بىردەن ايتايىن. سەنات رەگلامەنتىنە وزگەرىس ەنگىزىلدى. وسى رەگلامەنتتە قاراپ، ونى الىپ تاستادىق. بۇعان دەيىن ول ءبىر-اق ادامعا بەرىلدى. ەندى مۇنداي اتاق ەشكىمگە بەرىلمەيدى. ويتكەنى ءقازىر بىزدە ونداي قۇقىقتىق نەگىز جوق، ونى الىپ تاستادىق»، - دەدى اشىمبايەۆ.

ونىڭ ايتۋىنشا، وسىدان ءۇش اپتا بۇرىن سەنات رەگلامەنتىنە ءتيىستى وزگەرىس ەنگىزىلگەن.

«وسىعان بايلانىستى ءبىز «قۇرمەتتى سەناتور» اتاعىن رەگلامەنتتەن الىپ تاستادىق. ەندى بىزدە ونداي ينستيتۋت جوق. 2022 جىلى وتكەن رەفەرەندۋمدا بۇكىل حالىق قولداپ، كونستيتۋسيادان ەلباسىنا قاتىستى نورمالار الىنىپ تاستالدى. ەرتەڭ "تۇڭعىش پرەزيدەنت – ەلباسى تۋرالى" زاڭ كۇشىن (پارلامەنت پالاتالارىنىڭ بىرلەسكەن وتىرىسىندا) جويادى»، - دەدى سەنات ءتوراعاسى.