ءىىم ەسىرتكى قىلمىسىنا قارسى ءىس-قيمىل دەپارتامەنتى استانا جانە اقمولا وبلىسىنداعى ارىپتەستەرىمەن بىرگە 2023 جىلدىڭ تامىز ايىندا سينتەتيكالىق ەسىرتكى ءوندىرىسىن ۇيىمداستىرعان بىرنەشە شەتەلدىكتىڭ قىلمىستىق ارەكەتىنە توسقاۋىل قويدى.
ءتارتىپ ساقشىلارىنىڭ كاسىبيلىگىنىڭ ارقاسىندا ەسىرتكى زەرتحاناسى اشكەرەلەنىپ، زاڭسىز اينالىمعا 40 كگ-نان استام “سينتەتيكا” جىبەرىلمەدى، دەپ حابارلايدى aqshamnews.kz Polisia.kz-كە سىلتەمە جاساپ.
كۇدىكتىلەر قازاقستانعا ەسىرتكى ءوندىرىسىن ۇيىمداستىرۋ ءۇشىن كەلگەن. سونىمەن قاتار استانادا ەسىرتكى وتكىزۋ ارناسىن جولعا قويماق بولعان. الدىمەن ەلگە قىلمىستىق بيزنەستى ۇيىمداستىرۋشى كەلدى. ول ەلوردادا پاتەردى جالعا الىپ، ەسىرتكى زەرتحاناسىن ىسكە قوسۋعا دايىندالعان. ارنايى ماقساتتا اقمولا وبلىسى ەرەيمەنتاۋ قالاسىنىڭ شەتىندە ءۇي الىنعان. قازاقستانعا شەتەلدەن كەلەتىن سىبايلاستارى ءۇشىن اۆتوكولىك تە ساتىپ العان.
ۇيىمداستىرۋشى بارلىق قاجەتتى جابدىقتار مەن پرەكۋرسورلارعا ەسىرتكى وندىرىسىنە ماشىقتانعان سايتتار ارقىلى تاپسىرىس بەرگەن. ولار كونتراباندالىق جولمەن جەتكىزىلگەن. ءدال وسى كەزەڭدە قاسكويلەر پوليسيانىڭ نازارىنا ىلىكتى. سوت ۇستالعانداردى ق ر قك-نىڭ 264-بابىنىڭ 1-بولىگى (ترانسۇلتتىق ۇيىمداسقان توپ قۇرۋ جانە وعان باسشىلىق ەتۋ)، 28-بابىنىڭ 3-بولىگى، 297-بابىنىڭ 4-بولىگى (ەسىرتكى زاتتارىن وتكىزۋ ماقساتىندا زاڭسىز دايىنداۋعا، قايتا وڭدەۋگە، ساقتاۋعا، تاسىمالداۋعا قاتىسۋ) بويىنشا كىنالى دەپ تانىدى.
ۇيىمداستىرۋشىعا 23 جىلعا باس بوستاندىعىنان ايىرۋ جازاسى تاعايىندالدى. ونىڭ سىبايلاستارى 21 جانە 22 جىلعا باس بوستاندىعىنان ايىرىلدى. بيىل 38 ەسىرتكى زەرتحاناسى جويىلدى، ونىڭ ىشىندە 24ء-ى سينتەتيكالىق ەسىرتكى ءوندىرىسى بويىنشا. 183 كەلىدەن استام “سينتەتيكالىق” ەسىرتكى، جارتى توننادان استام پرەكۋرسور تاركىلەندى. ۇيىمداسقان قىلمىستىق توپ قۇرۋ جانە وعان باسشىلىق ەتۋ فاكتىلەرى بويىنشا 11 قىلمىستىق ءىس قوزعالدى.