الماتىدا رىسقۇلوۆ داڭعىلىنىڭ ءبىر بولىگىندەگى جوندەۋ جۇمىستارىنا بايلانىستى ريەۆەرسيۆتى قوزعالىس ەنگىزىلەدى
رىسقۇلوۆ داڭعىلىنا ورتاشا جوندەۋ جۇمىستارىنا بايلانىستى قوزعالىسقا ۋاقىتشا شەكتەۋ ەنگىزىلەدى، دەپ حابارلايدى aqshamnews.kz
11 تامىز ساعات 23:00-دەن 13 تامىز ساعات 11:00-گە دەيىن رىسقۇلوۆ-كۇدەرين جولايىرىعىنان باستاپ، رىسقۇلوۆ-بوكەيحانوۆ جولايىرىعىنا دەيىنگى داڭعىلدىڭ وڭتۇستىك جاعىندا قوزعالىس جابىلادى.
كولىكپەن داڭعىلدىڭ سولتۇستىك جاعىمەن جۇرۋگە بولادى، مۇندا ريەۆەرسيۆتى قوزعالىس ۇيىمداستىرىلادى. باتىس جانە شىعىس باعىتتاعى جولاق سانىن پاترۋلدىك پوليسيا قىزمەتكەرلەرى قالىپتاسقان جاعدايعا بايلانىستى رەتتەيدى.
ۋچاسكەدە ەكى جاقتى قوزعالىس تۋرالى ەسكەرتۋ بەلگىلەرى ورناتىلادى. جولاقتار جارىق شاعىلىستىرعىش كونۋستارمەن بولىنەدى. ريەۆەرسيۆتى قوزعالىس باستالار الدىندا شىعىس جانە باتىس جاقتا كولىك ورتاسىن بولەتىن تەمىر قورشاۋ ورناتىلادى.
12 تامىز ساعات 8:00-دە رىسقۇلوۆ داڭعىلىنان كۇدەرين كوشەسىنە جانە سولتۇستىك اينالما كوشەسىنەن شىعىس باعىتقا بۇرىلاتىن جولدار اشىلادى. 12 تامىز ساعات 12:00-دە بوكەيحانوۆ كوشەسىنەن رىسقۇلوۆ داڭعىلىنا شىعىس باعىتقا بۇرىلاتىن جول اشىلادى.
ايتا كەتەيىك، كولىك قوزعالىسىن شەكتەۋ تۋرالى بارلىق اقپاراتتار Almaty.kz سايتىندا، @AlmatyJoly Telegram-ارناسىندا، اۋدان اكىمدىكتەرى مەن باسقارمالاردىڭ الەۋمەتتىك جەلىلەرىندە، سونداي-اق 2GIS جانە «ياندەكس كارتا» سەرۆيسىندە كورسەتىلگەن.