پروديۋسەر بايان الاگوزوۆا جۋرناليست دانا نۇرجىگىتكە بەرگەن سۇحباتىندا ون جىل بۇرىن قازاقستاننىڭ حالىق ءارتىسى ماقپال ءجۇنىسوۆا تۋرالى فيلم ءتۇسىرۋدى جوسپارلاعانىن، الايدا ءانشى ۇسىنىستان باس تارتقانىن ايتتى، - دەپ حابارلايدى Aqshamnews.kz.
الاگوزوۆانىڭ ايتۋىنشا، ول ءجۇنىسوۆادان ءومىر جولىن ەكراندا كورسەتۋگە رۇقسات سۇراعان.
"ماقپال، ءسىزدىڭ تاعدىرىڭىزدى فيلمگە تۇسىرگىم كەلەدى دەدىم. ون جىل بۇرىن بولعان جاعداي. ول كەزدە دە، ءقازىر دە بۇل وڭاي ەمەس ەكەنىن تۇسىنەمىن. ءبىراق ءبىر كۇنى ءسىز تۋرالى ۇلكەن ەكرانعا شىعاراتىن دۇنيە جاساعىم كەلەتىنىن ايتتىم. سوندا ول: “ماعان ەشتەڭە كەرەك ەمەس. ەشكىمگە ەشتەڭە بەرمەيمىن. مەمۋاردىڭ دا قاجەتى جوق” دەپ جاۋاپ بەردى"، – دەدى پروديۋسەر.
ول ءانشىنى كوز تىرىسىندە باعالاۋ قاجەتتىگىن اتاپ ءوتتى.
"ءبىز كوبىنە ادام ءتىرى كەزىندە سىناپ، كەتكەن سوڭ عانا “قانداي جاقسى ەدى” دەپ ايتاتىن قوعامبىز. سول سەبەپتى تالانتتى جانداردى بار كەزدە قادىرلەيىك"، – دەپ تۇيىندەدى الاگوزوۆا.
ەسكە سالايىق، بۇعان دەيىن ماقپال ءجۇنىسوۆا الەۋمەتتىك جەلىدەگى پاراقشاسىندا بايان الاگوزوۆاعا ۇندەۋ جاساپ، مارقۇم كومپوزيتور ارمان دۇيسەنوۆتىڭ وتباسىنا ءۇي الىپ بەرۋگە كومەكتەسۋىن سۇراعان بولاتىن.