"ەرلەر ءجيى كىنالى بولادى". جول اپاتتارىنا قاتىستى جۇرت بىلمەيتىن دەرەكتەر

الماتىدا جول اپاتى ءجيى بولاتىن كوشەلەردى بىلەسىز بە؟ كوپ جاعدايدا كىمدەر كىنالى؟ ەرلەر مە، ايەلدەر مە؟ قانداي كولىك يەلەرى ءجيى اپاتقا سەبەپكەر بولادى؟ اqshamnews.kz ءتىلشىسى ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنەن رەسمي دەرەكتەردى سۇراپ ءبىلدى. تولىعىراق ماتەريالدان ءبىلىڭىز. 

جول اپاتىنا كىمدەر ءجيى كىنالى بولادى؟

باس پروكۋراتۋرا ۇسىنعان دەرەككە سەنسەك، الماتىداعى جول-كولىك وقيعالارىنىڭ ورتا ەسەپپەن 80 پايىزىنا ەر ادامدار كىنالى. ايەل جۇرگىزۋشىلەرءدىڭ ۇلەسى بار بولعانى - 12 پايىز، ال 8 پايىزى - وقيعا ورنىنان بوي تاسالاعاندار.

كوميتەت كەلتىرگەن ستاتيستيكاعا سۇيەنسەك، اپاتقا ءجيى سەبەپ بولاتىندار - 30-39 جاس ارالىعىنداعى جۇرگىزۋشىلەر (30%) جانە 20-29 جاس ارالىعىنداعىلار (25%).

رەسمي دەرەكتەر بويىنشا، الماتىداعى جكو(جول كولىك وقيعاسى)-لاردىڭ 87 پايىزى جەڭىل كولىكتەردىڭ قاتىسۋىمەن تىركەلەدى.
قالعاندارى:

• 4% — اۆتوبۋستار

• 5% — موتوسيكلدەر مەن موپەدتەر

• 3% — جۇك كولىكتەرى

• 1% — وزگە كولىكتەر

ءجيى سوعىلاتىن كولىكتەر: كوش باسىندا Camry

زارداپ شەككەندەر مەن جكو ءجيى جاسالعان جەڭىل اۆتوكولىكتەردىڭ ءتىزىمىن Toyota Camry باستاپ تۇر. 

• 1-ورىندا - Toyota Camry:
  2024 جىلى — 2241 اپات،
  2025 جىلدىڭ 7 ايىندا — 1427 اپات.

• 2-ورىندا - Chevrolet Cobalt:
  2024 جىلى — 1460 اپات،
  2025 جىلدىڭ 7 ايىندا — 875 اپات.

• 3-ورىندا - Daewoo Nexia:
  2024 جىلى — 877 اپات،
  2025 جىلدىڭ 7 ايىندا — 484 اپات.

كوميتەت تۇسىندىرگەندەي، بۇل كولىكتەردىڭ جيىلىگى ەلدەگى اۆتوپاركتىڭ قۇرىلىمىمەن دە تىكەلەي بايلانىستى. دەمەك قالا كوشەلەرىندە ءدال وسى ماركالى كولىكتەر كوپ.

"جىل باسىنان بەرى 1200-دەن استام ادام جول اپاتىنان قازا بولعان"

2024 جىلى جكو سانى 2023 جىلمەن سالىستىرعاندا ەكى ەسەگە جۋىق ارتقان.

قاي كوشەلەر ەڭ ءقاۋىپتى؟

كوميتەت دەرەگىنشە، الماتىدا ءجيى اپات بولاتىن كوشەلەردىڭ قاتارىندا: رىسقۇلوۆ داڭعىلى، اباي داڭعىلى، سايىن كوشەسى، ءال-فارابي داڭعىلى، دوستىق داڭعىلى، ءاشىموۆ كوشەسى، سەيفۋللين كوشەسى بار. 

ال ەڭ اپاتتى قيىلىستاردىڭ ىشىندە: رىسقۇلوۆ–سايىن، اباي–سەيفۋللين، سايىن–اباي، ءال-فارابي–مۇستافين، دوستىق–اباي، سەيفۋللين–شولوحوۆ جانە باسقا دا قوزعالىسى تىعىز نۇكتەلەر بار.

الماتىلىقتاردىڭ ايىپپۇل سوماسى 99 ميلليارد تەڭگەدەن استى

رەسمي دەرەككە سەنسەك، 2025 جىلدىڭ العاشقى 7 ايىندا الماتىدا جول ەرەجەسىن بۇزعانى ءۇشىن جۇرگىزۋشىلەرگە 99،6 ملرد تەڭگە ايىپپۇل سالىنعان. ونىڭ 82 پايىزى تولەنىپ قويعان، تولەنگەن سومانىڭ 85 پايىزى قىسقارتىلعان تارتىپپەن (7 كۇن ىشىندە) وتەلگەن.

جالپى الار بولساق، 2014 جىلدان بەرى الماتىدا 215 مىڭنان استام جكو تىركەلىپ، 27 مىڭنان استام ادام قازا تاۋىپ، 279 مىڭنان استام ادام جاراقات العان.