ىلە-الاتاۋ ۇلتتىق پاركىندە 2 524 مەتر بيىكتىكتە ورنالاسقان فۋرمانوۆ شىڭىنىڭ ەتەگىندەگى اتاقتى اتكەنشەكتىڭ قايتا جاڭعىرتۋ جۇمىستارى اياقتالدى. بۇل نىسان ۇزاق جىل بويى الماتى تۇرعىندارى مەن تۋريستەرى ءۇشىن تاۋداعى ەڭ تانىمال ورىننىڭ ءبىرى رەتىندە جاقسى تانىس.
جاڭعىرتۋ جۇمىستارى تۋريزم سالاسىنداعى ۇلتتىق جوبا اياسىندا جۇرگىزىلدى. باستى ماقسات – قاۋىپسىزدىك پەن قولايلىلىقتى ارتتىرۋ، سونداي-اق اتكەنشەكتى ەرەكشە ەتەتىن اتموسفەرانى ساقتاۋ ارقىلى تاۋداعى دەمالىستىڭ جانە جارقىن اسەردىڭ الاڭىنا اينالدىرۋ.
«جۇمىس بارىسىندا تىرەۋىشتەر كۇشەيتىلىپ، زاماناۋي ۆاندالعا ءتوزىمدى ءارى ەكولوگيالىق ماتەريالدار قولدانىلىپ قايتا قۇراستىرىلدى. 500 كەلىگە دەيىنگى سالماق كوتەرە الاتىن جاڭا ورىندىقتار ورناتىلدى. سونىمەن قاتار اۋماق اباتتاندىرىلدى: جاڭا ورىندىقتار مەن قوسىمشا دەمالىس ەلەمەنتتەرى ورناتىلدى. تابيعي لاندشافتپەن ۇيلەسەتىن شاعىن ساۋلەت نىساندارى پايدا بولدى»، – دەپ حابارلادى الماتى قالاسىنىڭ تۋريزم باسقارماسى.
جاڭعىرتۋدان كەيىن اتكەنشەك قايتادان الماتىلىقتار مەن قالا قوناقتارىنىڭ يگىلىگىنە بەرىلدى.
جاڭارتىلعان نىسان بۇرىنعىداي اتموسفەراسى مەن تارتىمدىلىعىن ساقتاپ قانا قويماي، تاۋداعى دەمالىسقا بارىنشا ىڭعايلى، سەنىمدى ءارى ءقاۋىپسىز ورىنعا اينالدى. نىسانعا كەلگەن قوناقتارعا تاۋدا اباي بولۋدى جانە قۇرىلىسقا ۇقىپتى قاراۋدى ۇسىنامىز.
ايتا كەتەيىك، اتكەنشەكتەردى جاڭارتۋ جۇمىستارى الماتى تاۋ كلاستەرىن دامىتۋعا باعىتتالعان كەشەندى شارالاردىڭ ءبىر پاراسى. جوبا قالا تۇرعىندارى مەن قوناقتارى ءۇشىن تاۋ باعىتتارىنىڭ تارتىمدىلىعىن ساقتاۋعا نەگىزدەلگەن.