قازاقستاندا قىزدى تۇرمىسقا شىعۋعا زورلاپ ماجبۇرلەۋ ءۇشىن قىلمىستىق جاۋاپكەرشىلىك رەسمي تۇردە ەنگىزىلدى، - دەپ حابارلايدى اqshamnews.kz ءتىلشىسى.
ءىىم مالىمەتىنشە، 16 قىركۇيەكتەن باستاپ ەلىمىزدە ازاماتتاردىڭ قۇقىعىن قورعاۋدى كۇشەيتەتىن قىلمىستىق زاڭناماعا وزگەرىستەر كۇشىنە ەندى.
نەگىزگى وزگەرىستەردىڭ ءبىرى – قىلمىستىق كودەكستىڭ 125-بابىنداعى ەسكەرتپەنى الىپ تاستاۋ. بۇعان دەيىن جابىرلەنۋشىنى ءوز ەركىمەن بوساتقان ادام قىلمىستىق جاۋاپكەرشىلىكتەن قۇتىلا الاتىن. ەندى بۇل مۇمكىندىك جويىلدى: كىنالىلەر كەيىنگى ارەكەتتەرىنە قاراماستان جازالانادى.
نەكە قيۋعا ماجبۇرلەۋ تۋرالى جاڭا باپ
كودەكسكە 125-1-باپ «نەكە قيۋعا ماجبۇرلەۋ» ەنگىزىلدى. ەندى مۇنداي ارەكەت قىلمىستىق قۇقىقبۇزۋشىلىق بولىپ سانالادى. جاعدايعا بايلانىستى جازا 2000 اەك-كە دەيىن ايىپپۇل، تۇزەۋ نەمەسە قوعامدىق جۇمىستار، بوستاندىقتى شەكتەۋ نە ەكى جىلعا دەيىن باس بوستاندىعىنان ايىرۋدى قامتۋى مۇمكىن.
ەگەر قىلمىس سالدارىنان ابايسىزدا اۋىر زارداپ كەلسە، بەس جىلدان ون جىلعا دەيىن باس بوستاندىعىنان ايىرىلۋى مۇمكىن. ەگەر زورلىقپەن ماجبۇرلەنسە، كامەلەتكە تولماعاندارعا قاتىستى بولسا، توپپەن جاسالسا، قىزمەتتىك وكىلەتتىگىن نەمەسە جابىرلەنۋشىنىڭ تاۋەلدىلىگىن پايدالانسا، قاتاڭىراق شارالار قولدانىلادى.
قۇقىق قورعاۋشىلاردىڭ ايتۋىنشا، ءاربىر مۇنداي جاعداي – تەك زاڭبۇزۋشىلىق ەمەس، قىز بەن ونىڭ وتباسى ءۇشىن اۋىر سىناق. جابىرلەنۋشىلەر تەك فيزيكالىق جانە پسيحولوگيالىق زورلىققا ەمەس، سونىمەن قاتار، «وتباسىڭدى ۇياتقا قالدىرما» دەپ قىسىم كورسەتەتىن تۋىستارىنىڭ سوزىنە تاپ بولادى.
اۋىر پسيحولوگيالىق زارداپتار
مامانداردىڭ ايتۋىنشا، مۇنداي وقيعالاردان كەيىن قىزداردا مازاسىزدىق، دەپرەسسيا، ۇرەي جانە اينالاسىنداعىلارعا سەنىمسىزدىك قالىپتاسادى.
ەسكە سالايىق، 16 شىلدەدە پرەزيدەنت قاسىم-جومارت توقايەۆ «قازاقستان رەسپۋبليكاسىنىڭ قىلمىستىق زاڭناماسىن وڭتايلاندىرۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعان بولاتىن. سول تۇزەتۋلەردىڭ ءبىرى – قالىڭدىقتى ۇرلاۋ ءۇشىن قىلمىستىق جازا ەنگىزۋ ەدى.