ق ر مەملەكەتتىك حاتشىسى ەرلان قارين اقش مەملەكەتتىك حاتشىسىنىڭ ازاماتتىق قاۋىپسىزدىك، دەموكراتيا جانە ادام قۇقىقتارى ماسەلەلەرى جونىندەگى ورىنباسارى ۋزرا زەيامەن كەزدەستى، دەپ حابارلايدى اlmaty-akshamy.kz akorda.kz سىلتەمە جاساپ.
ەرلان قارين ەلىمىزدى ساياسي جانە الەۋمەتتىك-ەكونوميكالىق تۇرعىدا جۇيەلى جاڭعىرتۋعا باعىتتالعان اۋقىمدى رەفورمالار تۋرالى ايتىپ بەردى.
سونىڭ ىشىندە، مەملەكەتتىك حاتشى قازاقستان پرەزيدەنتى قاسىم-جومارت توقايەۆتىڭ جولداۋى ەلدى جاڭارتۋدى كوزدەيتىن ۇزاقمەرزىمدى باعداردىڭ جانە جالپى ساياسي جاڭعىرۋ ۇدەرىسىنىڭ اجىراماس بولىگى ەكەنىن اتاپ ءوتتى. ول بيلىك تارماقتارى قۇزىرەتتەرىنىڭ بارىنشا ءتيىمدى تەپە-تەڭدىگىن قالىپتاستىرۋ، كوپ پارتيالى جۇيەنى، ازاماتتىق قوعام ينستيتۋتتارىن جانە ادام قۇقىعىن قورعاۋ سالاسىن ودان ءارى دامىتۋ جونىندەگى مەملەكەت باسشىسىنىڭ نەگىزگى باستامالارىنا توقتالدى.
ۋزرا زەيا پرەزيدەنت قاسىم-جومارت توقايەۆتىڭ ساياسي جانە ەكونوميكالىق باستامالارىنا اقش-تىڭ قولداۋ بىلدىرەتىنىن جەتكىزدى. اقش مەملەكەتتىك حاتشىسىنىڭ ورىنباسارى قازاقستاننىڭ دەموكراتيالىق ۇدەرىستەردى ودان ءارى ىلگەرىلەتۋ جولىنداعى ىس-ارەكەتىنە الداعى ۋاقىتتا دا قولداۋ كورسەتۋگە دايىن ەكەنىن اتاپ ءوتتى.
كەزدەسۋ سوڭىندا تاراپتار ەكىجاقتى ىنتىماقتاستىقتىڭ ءتۇرلى باعىتى بويىنشا سىندارلى ديالوگتى جالعاستىرۋعا ىقىلاستى ەكەنىن تانىتتى.