ەلىمىزدە قارجى پيراميدالارىنا قاتىستى قىلمىس سانى ءوستى
سوڭعى بەس جىلدا الاياقتىق پەن قارجى پيراميدالارىنا قاتىستى قىلمىستار 26 پايىزعا ءوستى. بۇل تۋرالى سەناتتىڭ كونستيتۋسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ وتىرىسىندا دەپۋتات ۆلاديمير ۆولكوۆ ايتتى، دەپ حابارلايدى almaty-akshamy.kz
كوميتەت ءتوراعاسى ۆ. ۆولكوۆ وتىرىستى اشا كەلىپ، سوڭعى بەس جىل ىشىندە وسى سالاداعى قىلمىستىڭ 26%-عا كوبەيگەنى تۋرالى دەرەكتى كەلتىردى. ولاردىڭ قاتارىنا عالامتورداعى قىلمىستار دا بار. وتكەن جىلدىڭ قورىتىندىسى بويىنشا، ول قىلمىستاردىڭ سانى 2،5 ەسە ءوسىپ، 4 250 مىڭنان 10 مىڭعا دەيىن كوبەيىپ كەتكەن.
«قازىرگى جاعدايدا كيبەرقىلمىستا تەرگەۋ شەكاراسى جوق جانە ول ترانسشەكارالىق ساناتقا اۋىسىپ كەتەدى. بۇل ەلدەردى حالىقارالىق دەڭگەيدە بىرلەسكەن ءىس-قيمىل جاساۋعا ءماجبۇر ەتەدى. وسىعان بايلانىستى كيبەرقىلمىسپەن كۇرەس سالاسىنداعى حالىقارالىق ساراپشىلاردىڭ حالىقارالىق ستاندارتتار تالاپتارىنا ساي كەلەتىن قازاقستاندىق زاڭناما نورمالارىن قايتا قاراۋ جانە پىسىقتاۋ جونىندەگى ۇسىنىمدارىن زەردەلەۋ جانە تالقىلاۋ ماڭىزدى بولىپ وتىر»، - دەدى سەناتور.
سەناتور ءلاززات سۇلەيمەن ءوز كەزەگىندە الاياقتىقتىڭ قۇرباندارى كوبىنەسە حالىقتىڭ الەۋمەتتىك وسال توپتارىنىڭ وكىلدەرى ەكەنىن اتاپ ءوتتى. دەپۋتات وسىعان بايلانىستى قازاقستاندىقتاردىڭ قارجىلىق ساۋاتىن ارتتىرۋ اياسىندا قارجى پيراميدالارىنا قارسى ءىس-قيمىل بويىنشا بۇقارالىق اقپارات قۇرالدارىندا ءتۇسىندىرۋ جۇمىستارىن كۇشەيتۋدى ۇسىندى.
باس پروكۋراتۋرانىڭ اقپاراتى بويىنشا، قىلمىستىڭ وسى تۇرلەرىنە قارسى ءىس-قيمىل جاساۋ ءۇشىن مەكەمەارالىق جۇمىس توپتارى قۇرىلدى، ىنتىماقتاستىق تۋرالى مەموراندۋمدار، ادىستەمەلىك قۇرالدار ازىرلەندى. سونداي-اق ميكروكرەديتتەر بەرۋ قاعيدالارىنا وزگەرىستەر ەنگىزىلىپ، قىلمىستاردى اشۋ جانە تەرگەۋ بويىنشا جەدەل تەرگەۋ توپتارى قۇرىلعان ەكەن.
ىشكى ىستەر مينيسترلىگىنىڭ وكىلى مۇددەلى مەملەكەتتىك ورگاندار شەتەلدىك كيبەرقىلمىسقا قارسى ءىس-قيمىل جونىندەگى قۇقىق قورعاۋ ورگاندارىمەن 2018 جىلدان باستاپ ەۋروپا كەڭەسىنىڭ كومپيۋتەرلىك قىلمىستار جونىندەگى بۋداپەشت كونۆەنسياسىنا قازاقستاننىڭ قوسىلۋى جونىندە ءىس-شارالار جۇرگىزىپ جاتقانىن حابارلادى. بۇگىنگى كۇنى كونۆەنسيا وسى سالادا حالىقارالىق ءوزارا ءىس-قيمىلدى قامتاماسىز ەتەتىن امبەباپ قۇجات بولىپ سانالادى.
سەناتورلار وتىرىس ناتيجەسى بويىنشا قورىتىندى دايىندادى. ولاردىڭ قاتارىندا الاياقتىق ارەكەتتەر مەن قارجى پيراميدالارىنا قارسى ءىس-قيمىل سالاسىنداعى حالىقارالىق قۇجاتتار مەن ستاندارتتاردىڭ تالاپتارىن ەسكەرە وتىرىپ، زاڭنامانى جەتىلدىرۋ جونىندەگى مەكەمەارالىق جۇمىس توبىن قۇرۋ، سونداي-اق ناقتى تەرمينولوگيانى ازىرلەۋ، كيبەركەڭىستىكتەگى قۇقىقتىق قاتىناستار سۋبەكتىلەرىنىڭ قۇقىقتارى مەن جاۋاپكەرشىلىگىن ايقىنداۋ، كيبەر قۇقىق بۇزۋشىلىقتىڭ بەلگىلەرىن، ءىس جۇرگىزۋ ەرەكشەلىكتەرىن سارالاۋ تۋرالى ۇسىنىستار بار.