الماتىدا ۇلى وتان سوعىسىنداعى جەڭىستىڭ 80 جىلدىعىنا وراي 28 گۆاردياشى-پانفيلوۆشىلار اتىنداعى ساياباقتا قالا باسشىلىعىنىڭ، ۇوس ارداگەرلەرىنىڭ جانە قوعام وكىلدەرىنىڭ قاتىسۋىمەن سالتاناتتى ءىس-شارالار ءوتتى.
ماڭگىلىك الاۋعا گۇل شوقتارىن قويعاننان كەيىن الماتى اكىمى ەربولات دوسايەۆ مايدانگەرلەر مەن ولاردىڭ جاقىندارىمەن بىرگە 9 مامىر قارساڭىندا اشىلعان ۇلى وتان سوعىسى ارداگەرلەرىنىڭ اللەياسىنا باردى.
مۇندا ەستەلىك، ۇزاق عۇمىر مەن ومىرشەڭدىكتى بىلدىرەتىن جوكە اعاشتارى وتىرعىزىلىپ، ولاردىڭ قاسىنا باتىرلاردىڭ قۇرمەتىنە ارنالىپ ەسىمى جازىلعان تاقتايشالار ورناتىلدى. مۇنداي اللەيالار جەڭىستىڭ 80 جىلدىعىنا ارنالعان ەكولوگيالىق اكسيا اياسىندا قالانىڭ بارلىق سەگىز اۋدانىندا ءبىر مەزگىلدە اشىلدى.
اللەيانى ارالاۋ بارىسىندا قالا اكىمى ارداگەرلەرمەن ەمەن-جارقىن اڭگىمەلەسىپ، بەيبىت ءومىر مەن ۇرپاققا سىيلاعان تىنىشتىق ءۇشىن شىن جۇرەكتەن العىس ءبىلدىردى. ەربولات دوسايەۆ بۇل اللەيا قالانىڭ اجىراماس ءبىر بولىگىنە اينالاتىنىن، بولاشاق ۇرپاق — بالالار، نەمەرە مەن شوبەرەلەر ءۇشىن اتا-بابا ەرلىگىن ەسكە سالىپ تۇراتىن جاندى ەسكەرتكىش بولاتىنىن اتاپ ءوتتى. ول وتكەننىڭ داڭقىن دارىپتەپ، حالىقتىڭ جەڭىس ءۇشىن توككەن قانى مەن كوز جاسىن ۇمىتتىرمايتىن بەلگى بولماق.
«بۇگىن سىزدەرمەن بىرگە 28 گۆاردياشى-پانفيلوۆشىلار اتىنداعى ساياباقتا بولىپ، ەسكەرتكىشكە گۇل قويۋ مەن ءۇشىن ۇلكەن مارتەبە. بۇل ەسكەرتكىش بىزگە جىل سايىن بەيبىت ءومىردىڭ ءقادىرىن ەسكە سالادى. بۇگىن ءبىز اشىق اسپان مەن تىنىشتىقتىڭ قانشالىقتى ماڭىزدى ەكەنىن جاقسى تۇسىنەمىز — مۇنى بالالارىمىزعا، سىزدەردىڭ نەمەرە-شوبەرەلەرىڭىزگە شىن جۇرەكتەن تىلەيمىن. قالاداعى سەگىز اۋداننىڭ بارىندە ارداگەرلەرگە ارنالعان اللەيالار اشىلدى، ءبىراق ءدال وسى ساياباقتا ورنالاسقانىنىڭ ورنى ەرەكشە. ءبىز ۇرپاقتار اراسىنداعى بايلانىستى ساقتاۋ ءۇشىن بۇل اللەيانى ومىرشەڭ ەستەلىككە اينالدىرۋعا تىرىستىق، – دەدى ەربولات دوسايەۆ.
مايدانگەرلەر ءوز كەزەگىندە جەڭىستىڭ 80 جىلدىعىنا ارنالعان ءىس-شارالاردى جوعارى دەڭگەيدە ۇيىمداستىرعانى جانە ارداگەرلەر اللەياسىن اشقانى ءۇشىن اكىمگە العىس ءبىلدىردى.
«كەلەسى 85 جىلدىق مەرەيتويعا ءبىز، سوعىس ارداگەرلەرى، بولماۋىمىز مۇمكىن. ءبىراق ءبىزدىڭ ۇرپاعىمىز كەلىپ، بۇل اعاشتاردى اتالارى ەككەنىن ەسكە الىپ، تاعزىم ەتەر، – دەدى ۇوس ارداگەرى قامبار ءامىر ۇلى سارسەنوۆ.