اۋدان ەكونوميكالىق تۇرعىدان دامىعان.
تۇركسىب اۋدانى قالانىڭ ونەركاسىپتىك جانە كولىكتىك-لوگيستيكالىق حابى بولىپ قالىپتاسقان. ول الماتىنىڭ ونەركاسىپ كولەمىنىڭ تورتتەن ءبىر بولىگىن (24،4%) قۇرايدى. بۇل تۋرالى الماتى قالاسى اكىمى ەربولات دوسايەۆ تۇرعىندارمەن كەزدەسۋ بارىسىندا ايتتى، دەپ حابارلايدى Almaty-akshamy.kz.
«تۇركسىب اۋدانى الماتىنىڭ ونەركاسىپ كولەمىنىڭ تورتتەن ءبىر بولىگىن (24،4%) قۇرايدى جانە جىل سايىن 7 ملن. جۋىق ادامدى اۋە كولىگىمەن تاسىمالداۋدى قامتاماسىز ەتەدى. اۋدان ەكونوميكالىق تۇرعىدان دامىعان. اعىمداعى جىلدىڭ 5 ايىنىڭ قورىتىندىسى بويىنشا، ونەركاسىپتە (+31،6%)، ينۆەستيسيا تارتۋدا (+34،8%) وڭ ديناميكا بايقالادى. قۇرىلىس جۇمىستارىنىڭ كولەمى 2 ەسە ۇلعايدى»، – دەدى دوسايەۆ.
سونىمەن قاتار قالا اكىمى تۇركسىب اۋدانىندا 8 مىڭنان استام بيزنەس سۋبەكتىسى جۇمىس ىستەيتىنىن ايتتى.
«اۋداندا 8 مىڭنان استام بيزنەس سۋبەكتىسى جۇمىس ىستەيدى. وندا 47 مىڭعا جۋىق ادام نەمەسە اۋداننىڭ ەڭبەككە قابىلەتتى حالقىنىڭ ۇشتەن ءبىر بولىگى ەڭبەك ەتەدى.دەگەنمەن، تۇركسىب اۋدانىندا ينجەنەرلىك جانە تۇرعىن ءۇي ينفراقۇرىلىمى جوعارى دەڭگەيدە توزعان. جىلۋمەن، سۋمەن جابدىقتاۋ جانە سۋ بۇرۋ جەلىلەرىن جاڭارتۋ، تۇرعىن ءۇي قورىن رەنوۆاسيالاۋ (594 ەسكى ءۇي)، اباتتاندىرۋ جانە الەۋمەتتىك ينفراقۇرىلىمدى دامىتۋ قاجەت»، – دەدى ول.