اق شۋدا قىسىر بۇلتتار ەمەس، نوسەر تىلەگەن كوكالا باس قورعاسىن بۇلتتار شىڭ باسىن قىمتاپ العان.
الماتىدا بيىلعى جاز جاۋىن-شاشىندى، نايزاعايلى بولىپ، اۋا رايى قۇبىلمالى قالپىن ءالى ساقتاۋدا. الاتاۋدىڭ باسىنان بۇلت كەتپەي تۇر. بۇلت بولعاندا دا اق شۋدا قىسىر بۇلتتار ەمەس، قورعاسىن تۇستەس كوكالا بۇلتتار. تاۋ بوكتەرلەرى مەن شاتقالدارىن سالقىن سامال ەنشىلەگەن. تۇنگە قاراي ءتىپتى سالقىنداپ كەتەتىن كورىنەدى.
«الداعى اپتادا اپتاپ ىستىقپەن بىرگە نوسەرلى جاۋىن، وكپەك جەل، سالقىن سامال بولۋى ابدەن مۇمكىن. نايزاعاي ويناپ، كۇن كۇركىرەۋى دە عاجاپ ەمەس...» دەگەنبىز وتكەن جولعى پايىمىمىزدا. سولاي بولدى دا، 24 ماۋسىمدا ەكىنتى كەزىندە ەكپىندەتە باستالعان نوسەر الماتىلىقتاردىڭ ەسىن شىعاردى...
ەرتەڭنەن باستاپ شىلدە ايى تابالدىرىقتان اتتايدى.
«قۇرت، ىرىمشىك قاينالدى،
قۇلىندار دا بايلاندى.
جاپىراقتار جالپايدى،
جاس قوزىلار مارقايدى...»، –
دەپ باستالاتىن شىلدە كورىنىسى تۋرالى تاماشا جىر بار. تابيعات جىرشىسى ءىلياس اقىننىڭ (جانسۇگىروۆ) «جازعى شىلدە» دەگەن ولەڭى بۇل. شىلدە وتە ىستىق اي، ونىڭ ىستىعى 40 گرادۋسكا جەتەتىن بولعاندىقتان ءارى 40 كۇنگە سوزىلاتىندىقتان، بۇرىنعىلار «قىرىق كۇن شىلدە» دەپ اتاعان. ماۋسىم ايىنىڭ 26 جۇلدىزىنان تامىز ايىنىڭ 5 جۇلدىزىنا دەيىن اۋا رايى وتە ىستىق بولادى. ءيا، بۇل بولجام بويىنشا، قازاقى پايىم وسىلاي دەيدى. ال شىن مانىندە ءالى اسپان تولىق ءارى تۇراقتى اشىلار ەمەس، جاڭبىر باسىلار ەمەس.
ءوتىپ بارا جاتقان ايدىڭ 26-سىنان بەرى «باس شىلدە» امالى ءجۇرىپ جاتىر. امال كەزىندە قاپىرىق ىستىق بولادى. كەيبىر جىلدارى قوڭىرجاي قالىپتا وتەدى. ەل اراسىنداعى اۋا رايىن باقىلايتىن ەسەپشىلەر باس شىلدەنىڭ قالاي وتۋىنە قاراپ، شىلدە ايىنداعى كۇن رايىن بولجايتىن بولعان.
«ارۋدان اسقان جان بار ما؟
جىلقىدان اسقان مال بار ما؟
بيەنىڭ ءسۇتى – سارى بال،
قىمىزدان اسقان ءدام بار ما؟»، – دەپ، اقتامبەردى جىراۋ تولعاعانداي، ەل جايلاۋلارىندا قۇلىن بايلانىپ، بيە ساۋۋ ءجۇرىپ جاتىر. قىمىزدىڭ ءجۇز اۋرۋعا ەم ەكەنىن دارىگەرلەر ايتىپ ءجۇر.
ساۋمال – سال اۋرۋلارىنا، جۇرەك پەن اسقازان جاراسىنا، باۋىر مەن وكپە اۋرۋلارىنا مىڭ دا ءبىر شيپا. بۋىن مەن قانازدىق دەرتىنە دە داۋا.
بۇگىن اي كۇنتىزبەسى بويىنشا، جاڭا ايدىڭ 1ء-ى. ال قولدانىستاعى كۇنتىزبە ايدىڭ سوڭعى كۇنىن – 30-ىن كورسەتىپ تۇر. ءار ايدىڭ ورتاسى مەن باسقى كەزى، البەتتە، وزگەرىسسىز بولمايدى. دەمەك، الداعى اپتانىڭ جاڭبىرلى بولاتىنىن مەڭزەپ تۇر.