الەۋمەتتىك وسال توپقا جاتاتىنداردان تولەم الىنبايدى.
ەكولوگيالىق تولەم سوماسى ءار وڭىردە ءارتۇرلى، دەپ حابارلايدى Almaty-akshamy.kz
ەلىمىزدىڭ 27 ەرەكشە قورعالاتىن تابيعي اۋماعىنا كىرۋ اقىسىن كوتەرىلەدى.
قازاقستاننىڭ ەكولوگيا مينيسترلىگى رەسپۋبليكالىق ماڭىزى بار ەرەكشە قورعالاتىن تابيعي اۋماقتار ۇسىناتىن قىزمەتتەر ءۇشىن تاريفتەرگە وزگەرىستەر ەنگىزىلەتىن بۇيرىق دايىندادى. قۇجات ءماتىنى اشىق نقا پورتالىندا جاريالاندى. ورمان شارۋاشىلىعى جانە جانۋارلار دۇنيەسى كوميتەتىنىڭ رەسپۋبليكالىق مەملەكەتتىك مەكەمەلەرى ۇسىناتىن قىزمەتتەر ءۇشىن، ەرەكشە قورعالاتىن تابيعي اۋماقتارعا كىرگەندە الىناتىن تاريفتەردىڭ مولشەرى كورسەتىلگەن.
وندا كۇنىنە ءبىر ادامعا شاققاندا جەكە تۇلعالار ءۇشىن اۋماقتاردى سانيتارلىق تازالاۋ جانە اباتتاندىرۋ جونىندەگى قىزمەت كورسەتۋ، موتوسيكلدەردىڭ، موپەدتەردىڭ، كۆادروسيكلدەر مەن جەڭىل اۆتوموبيلدەردىڭ كىرۋى ءۇشىن الىناتىن تولەم كورسەتىلگەن. سونداي-اق 16 ورىنعا دەيىنگى شاعىن اۆتوبۋستار مەن جۇك اۆتوموبيلدەر، 32 ورىنعا دەيىن اۆتوبۋستار جانە 32 دەن اسا ورنى بار اۆتوبۋستاردىڭ كىرۋى ءۇشىن تولەم سوماسى بەلگىلەنگەن. ماسەلەن، «شارىن» مەملەكەتتىك ۇلتتىق تابيعي پاركىندە ءبىر ادامعا ەكوتولەم 0،2 اەك (2024 جىلى 738 تەڭگەنى) قۇرايدى. ال موتوسيكل، موپەدتەرمەن كىرۋ 0،4 اەك (1476 تەڭگە)، جەڭىل اۆتوكولىك 0،7 اەك (2584 تەڭگە)، 16 ورىنعا دەيىنگى ميكرواۆتوبۋستار 2،5 اەك (9230 تەڭگە)، 32 ورىنعا دەيىنگى اۆتوبۋستار 5 اەك (18 460 تەڭگە) بولسا، 32 ورىننان كوپ اۆتوبۋستار 7 اەك (25 844 تەڭگە) تولەيتىن بولادى.
ايتا كەتەيىك، ۇلتتىق پاركتەر اۋماعىنا كىرگەندە الەۋمەتتىك وسال توپقا جاتاتىن تۇلعالاردان تولەم الىنبايدى. اتاپ ايتقاندا زەينەتكەرلەردەن، مۇگەدەكتىگى بار ادامداردان، ۇلى وتان سوعىسىنىڭ ارداگەرلەرىنەن، باسقا مەملەكەتتەر اۋماعىنداعى ۇلى وتان سوعىسىنىڭ ارداگەرلەرىنەن، جەڭىلدىكتەرى بويىنشا تەڭەستىرىلگەن ارداگەرلەردەن، ەڭبەك ارداگەرلەرىنەن، مەكتەپ جاسىنا دەيىنگى بالالار تەگىن كىرەدى.