قىلمىستىق كودەكسكە پارا الۋعا كەلىسىم بەرگەنى ءۇشىن قىلمىستىق جاۋاپكەرشىلىككە تارتۋدى كوزدەيتىن جاڭا 366-1-بابى ەنگىزىلمەك.
اشىق نقا پورتالىندا جاريالانعان كودەكستىڭ جاڭا رەداكسياسىندا سىبايلاس جەمقورلىققا قارسى ءىس-قيمىل اگەنتتىگى وسىنداي باستاما كوتەرگەن، دەپ حابارلايدى Almaty-akshamy.kz Astanatv.kz-كە سىلتەمە جاساپ.
«مەملەكەتتiك فۋنكسيالاردى ورىنداۋعا ۋاكiلەتتiك بەرىلگەن ادامنىڭ نە وعان تەڭەستiرiلگەن ادامنىڭ نەمەسە جاۋاپتى مەملەكەتتىك لاۋازىمدى اتقاراتىن ادامنىڭ نە لاۋازىمدى ادامنىڭ، سول سياقتى شەت مەملەكەتتىڭ نەمەسە حالىقارالىق ۇيىمنىڭ لاۋازىمدى ادامىنىڭ پارا ۇسىنعان نەمەسە ۋادە ەتكەن ادامنىڭ نەمەسە ول وكىلدىك ەتەتىن ادامداردىڭ پايداسىنا جاساعان ارەكەتتەرى ءۇشىن پارا الۋعا كەلىسىم بەرۋى – بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرا وتىرىپ، 1 000 اەك-كە (3 450 000 تەڭگەگە) دەيىن ايىپپۇل سالۋ، سول مولشەردە تۇزەۋ جۇمىستارىنا نە 400 ساعاتقا دەيىنگى مەرزىمگە قوعامدىق جۇمىستارعا تارتۋعا نە 1 جىلعا دەيىن باس بوستاندىعىن شەكتەۋمەن جازالانادى»، - دەلىنگەن اشىق نقا پورتالىندا جاريالانعان كودەكستىڭ جاڭا رەداكسياسىندا.
قۇجاتتا كورسەتىلگەندەي، پارا الۋعا كەلىسىم بەرۋ تۇسىنىگى اۋىزشا، نەمەسە جازباشا نۇسقادا جانە وسىنداي ارەكەتكە بارۋعا نيەتىن انىق ءارى ناقتى ءبىلدىرۋى، ءۇنسىز كەلىسىم بەرۋىن مەڭزەيدى.
«ەگەر سىيلىقتىڭ قۇنى 2 اەك-تەن (6 900 تەڭگەدەن) اسپاسا، ادامنىڭ ءوزىنىڭ مىندەتىنە كىرەتىن جۇمىستاردى بۇرىن ورىنداعانى نەمەسە قىزمەت كورسەتكەنى ءۇشiن الدىن الا ۋاعدالاستىق بولماعان كەزدە سىيلىق رەتىندە ءبىرىنشى رەت ماتەريالدىق سىياقى، جەڭىلدىك نەمەسە ءمۇلiكتiك سيپاتتاعى قىزمەتتى، مۇلىككە قۇقىقتى الۋعا كەلىسىم بەرۋى ماڭىزى از بولۋىنا بايلانىستى قىلمىستىق قۇقىق بۇزۋشىلىق بولىپ تابىلمايدى. ءبىراق ول ءتارتiپتiك نەمەسە اكىمشىلىك جاۋاپكەرشىلىكپەن قۋدالانادى. پارا الۋعا كەلىسىم بەرگەن ادام، ەگەر ول قۇقىق قورعاۋ ورگانىنا نەمەسە ارناۋلى مەملەكەتتىك ورگانعا پارا الۋعا كەلىسىم بەرگەنى تۋرالى اتالعان ورگاندارعا وسى فاكت تۋرالى بەلگىلى بولعانعا دەيىن ءوز ەركىمەن حابارلاسا، قىلمىستىق جاۋاپتىلىقتان بوساتىلاتىن بولادى»، - دەپ كورسەتىلگەن كودەكستىڭ وزگەرىس ەنگىزىلگەلى وتىرعان نۇسقاسىندا.
قۇجات 17 شىلدەگە دەيىن كوپشىلىك تالقىلاۋدا بولادى.