30 كۇن بۇرىن ەسكەرتۋ جاسالادى.
Push-حابارلاما تەحنيكالىق بايقاۋ قۇجاتىنىڭ جارامدىلىق مەرزىمى اياقتالاتىنىن ەسكەرتەدى، دەپ حابارلايدى Almaty-akshamy.kz
«eGov mobile ءموبيلدى قوسىمشاسى كولىك جۇرگىزۋشىلەرىنە تەحنيكالىق بايقاۋ قۇجاتىنىڭ مەرزىمى وتەتىنى تۋرالى push-حابارلامالار جىبەرەدى»، دەلىنگەن "ۇات" اق قوعاممەن بايلانىس باسقارماسى تاراتقان اقپاراتتا.
قازاقستاندىقتار بۇگىننەن باستاپ push-حابارلامالاردىڭ جاڭا ءتۇرىن الادى. حابارلامالار دياگنوستيكالىق تەكسەرۋ كارتاسىنىڭ جارامدىلىق مەرزىمى اياقتالاتىنى تۋرالى الدىن الا حابارلايدى.
"بۇل ازاماتتارعا قۇجاتتىڭ جارامدىلىق مەرزىمى تۋرالى 30 كۇن بۇرىن ەسكەرتۋگە مۇمكىندىك بەرەدى. جىبەرىلگەن push-حابارلامالار eGov mobile ءموبيلدى قوسىمشاسىنىڭ "حابارلامالار" بولىمىندە قولجەتىمدى. ەگەر ءموبيلدى قوسىمشا ورناتىلماعان بولسا، پايدالانۋشىعا قوسىمشانى جۇكتەۋگە سىلتەمەسى بار 1414 نومىرىنەن جاڭا حابارلاما كەلگەنى تۋرالى SMS جىبەرىلەدى"، - دەلىنگەن حابارلامادا.
"ۇلتتىق اقپاراتتىق تەحنولوگيالار" اق باسقارما ءتوراعاسى روستيسلاۆ كونياشكيننىڭ ايتۋىنشا، push-حابارلاما جۇرگىزۋشىلەر ءۇشىن ىڭعايلى، سەبەبى ول ءبىر اي بۇرىن جىبەرىلەدى، ياعني ازاماتتاردىڭ جاڭا قۇجاتتى قايتا راسىمدەۋگە ۋاقىتى بولادى.
"وسىلايشا ءبىز كولىك يەلەرىنە كوپتەگەن ءقاۋىپتىڭ الدىن الۋعا كومەكتەسەمىز. بۇگىندە eGov mobile ءارتۇرلى ومىرلىك جاعدايلارعا ارنالعان push-حابارلاندىرۋلاردىڭ 15 ءتۇرىن ۇسىنادى. ۋاقىت وتە بۇل سان ارتادى"، - دەپ اتاپ ءوتتى كونياشكين.
سونداي-اق eGov ءموبيلدى قوسىمشاسىندا سيفرلىق قۇجات – "دياگنوستيكالىق تەحنيكالىق بايقاۋ كارتاسى" قولجەتىمدى. جاڭا قۇجاتتا تەحنيكالىق جاي-كۇي پارامەترلەرىنىڭ تىزبەسى مەن مىندەتتى تەحنيكالىق بايقاۋدىڭ ناتيجەلەرى كورسەتىلگەن كولىك پەن ونىڭ تىركەمەلەرىنىڭ يەسى تۋرالى مالىمەتتەر بار. قۇجاتتىڭ مەرزىمى ءوتىپ كەتسە، ول سيفرلىق قۇجاتتاردا كورسەتىلمەيدى.
كولىك يەلەرى ەلەكتروندى قۇجاتتى قاعاز قۇجاتپەن قاتار ۇسىنا الادى. سيفرلىق قۇجاتتى eGov mobile قوسىمشاسىنىڭ باستى بەتىندەگى "سيفرلىق قۇجاتتار" بولىمىنەن تابۋعا بولادى. قۇجات يەسى وعان QR كودى ارقىلى قول جەتكىزە الادى، بۇل قۇجاتتى سۇراعان تاراپقا ونىڭ ءتۇپنۇسقالىعىن تەكسەرۋگە كومەكتەسەدى.