مەملەكەت باسشىسىنىڭ تاپسىرماسىن ورىنداۋ ءۇشىن ق ر ەڭبەك جانە حالىقتى الەۋمەتتىك قورعاۋ مينيسترلىگى دۇنيەجۇزىلىك بانكتىڭ ساراپشىلارىمەن بىرلەسىپ ەڭ تومەن جالاقىنى ايقىنداۋ ادىستەمەسىنىڭ جوباسىن ازىرلەدى.
ادىستەمەگە سايكەس ەتج مولشەرى مەديانالىق جالاقى مەن ەڭبەك ونىمدىلىگىنە قاراي ايقىندالاتىن بولادى. ەتج ايقىنداۋ ادىستەمەسىنىڭ جوباسى جاريا تالقىلاۋ ءۇشىن «اشىق نقا» پورتالىندا ورنالاستىرىلعان، دەپ حابارلايدى Almaty-akshamy.kz.
ەڭبەكمينى دۇنيەجۇزىلىك بانكتىڭ ساراپشىلارىمەن بىرلەسىپ حالىقارالىق تاجىريبەگە تالداۋ جۇرگىزدى، ول ەڭ تومەن جالاقىنى (بۇدان ءارى – ەتج) بەلگىلەۋ بويىنشا نەعۇرلىم كەڭ تارالعان ءۇش ءتاسىلدىڭ بار ەكەنىن كورسەتتى: ءبىرىڭعاي ۇلتتىق ەتج؛ وڭىرلەر، سالالار جانە كاسىپورىندار بويىنشا ەتج سارالانعان مولشەرى؛ قىزمەتكەرلەردىڭ ءارتۇرلى ساناتتارى ءۇشىن ەتج.
بۇگىنگى كۇنى حالىقارالىق ەڭبەك ۇيىمىنا (بۇدان ءارى – حەۇ) مۇشە ەلدەردىڭ 90 %-دا ەتج بەلگىلەنەدى. ونىڭ 84 %-دا ەتج دەڭگەيى زاڭمەن بەلگىلەنەدى، قالعان 6 %-دا – جۇمىس بەرۋشىلەر، قىزمەتكەرلەر، كاسىپوداقتار جانە باسقا دا مۇددەلى تاراپتار اراسىندا ۇجىمدىق شارت جاساسۋ جولىمەن بەلگىلەنەدى.
ءوز كەزەگىندە. حەۇ بارلىق ەلدەرگە زاڭمەن بەلگىلەنگەن ەتج-نىڭ مەديانالىق جالاقىعا قاتىناسى بولىپ تابىلاتىن كەيس يندەكسىن كەمىندە 50 پايىز دەڭگەيىندە ۇستاۋدى ۇسىنادى.
حەۇ دەرەكتەرىنە سايكەس الەمنىڭ دامىعان ەلدەرىندەگى كەيس يندەكسى شامامەن 55 %-دى قۇرايدى. قازاقستاندا ول ايتارلىقتاي تومەن – 2023 جىلى 34% بولدى.
حەۇ-نىڭ حالىقارالىق تاجىريبەسى مەن ۇسىنىمدارىن ەسكەرە وتىرىپ، ەتج مولشەرىن مەديانالىق جالاقى مەن ەڭبەك ونىمدىلىگىنىڭ كورسەتكىشتەرىن پايدالانا وتىرىپ انىقتاۋ ۇسىنىلادى.
بارلىق جالدامالى قىزمەتكەرلەردىڭ 50% جالاقى مولشەرىن جانە تۇزەتۋ كورسەتكىشى رەتىندە ارەكەت ەتەتىن ەڭبەك ونىمدىلىگىن كورسەتەتىن مەديانالىق تابىستى كريتەرييلەر رەتىندە پايدالانۋ ەتج مولشەرىنىڭ تەڭگەرىمدىلىگىن قامتاماسىز ەتەدى. وسىنداي ءتاسىل قىزمەتكەرلەردىڭ كىرىستەرى مەن وندىرىلەتىن تاۋارلار، جۇمىستار مەن قىزمەتتەر كولەمى اراسىندا ناقتى بايلانىس ورناتۋعا مۇمكىندىك بەرەدى.