ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ قىزمەتكەرلەرى مەگاپوليستەر مەن وبلىس ورتالىقتارىنىڭ ەڭبەك موبيلدىلىگى ورتالىقتارىنىڭ باسشىلارىنا ارنايى وقىتۋ سەمينارىن وتكىزدى. ءدارىس بارىسىندا حالىققا قىزمەت كورسەتۋ جۇمىستارىن جەڭىلدەتۋگە مۇمكىندىك بەرەتىن «Enbek سيفرلىق ەكوجۇيەسىنىڭ» نەگىزگى قۇرالدارى ۇسىنىلدى، دەپ حابارلايدى Almaty-akshamy.kz.
ەمو باسشىلارى جۇمىسپەن قامتۋ سالاسىنىڭ اقپاراتتىق جۇيەلەرىن پايدالانۋ جانە «Enbek سيفرلىق ەكوجۇيە» پلاتفورمالارىمەن (Enbek.kz ەلەكتروندىق ەڭبەك بيرجاسى، Business.Enbek گرانتتارعا ونلاين-وتىنىمدەردى قاراۋ پورتالى، Hr.Enbek ەڭبەك رەسۋرستارى پورتالى، Skills.Enbek ونلاين-كۋرستارىنىڭ ماركەتپلەيسى جانە ت. ب.) جۇمىس ىستەۋ بويىنشا تەوريالىق جانە پراكتيكالىق داعدىلارعا يە بولدى.
«سەمينارعا قاتىسۋشىلارعا وڭىرلىك دەڭگەيدە جۇمىس كۇشىنە سۇرانىس پەن ۇسىنىستى تالداۋ، ءارى بولجاۋ جۇرگىزۋدىڭ نەگىزگى ەرەكشەلىكتەرى ۇيرەتىلىپ، جاڭا ۇلتتىق بىلىكتىلىك جۇيەسى مەن Career.Enbek سيفرلىق پلاتفورماسىن ەنگىزۋ پەرسپەكتيۆالارى تۋرالى نەگىزگى اقپارات بەرىلدى»، – دەدى ەڭبەكمينى حالىقتى جۇمىسپەن قامتۋ دەپارتامەنتىنىڭ ديرەكتورى اسقار نيازوۆ.
ەستەرىڭىزگە سالا كەتەيىك، 2023 جىلدىڭ 1 شىلدەسىندە قازاقستاندا ەڭبەك موبيلدىلىگى ورتالىقتارى قۇرىلدى. ولاردىڭ نەگىزگى مىندەتى وبلىستىڭ نەمەسە رەسپۋبليكالىق ماڭىزى بار قالانىڭ ەڭبەك نارىعىن ۇيلەستىرۋ.
ءوز كەزەگىندە، جۇمىس ىستەپ تۇرعان حالىقتى جۇمىسپەن قامتۋ ورتالىقتارى جۇمىسپەن قامتۋعا جاردەمدەسۋ، ەرىكتى قونىس اۋدارۋ، اتاۋلى الەۋمەتتىك كومەك تاعايىنداۋ بويىنشا ءىس ماكەتتەرىن قالىپتاستىرۋ بويىنشا كورسەتىلەتىن قىزمەتتەردىڭ بارلىق سپەكترلەرىن ساقتاي وتىرىپ، مانساپ ورتالىقتارى بولىپ قايتا قۇرىلدى.