الماتىدان ءۇش شاقىرىم جەردە، ىلە الاتاۋىنىڭ ەتەگىندە تابيعات-انانىڭ سىيىمەن ۇيلەسىم تاپقان «Almaty Resort» شيپاجايى ورنالاسقان. كۋرورت 1960 جىلدارى قۇرىلعان. الەمدىك ستاندارتقا ساي، ەڭ وزىق زاماناۋي مەديسينالىق قۇرىلعىلارمەن جابدىقتالعان، دەپ حابارلايدى اlmaty-akshamy.kz. 
پرەزيدەنت ءىس باسقارماسىنىڭ مەديسينالىق ورتالىعىنا قاراستى «Almaty Resort» شيپاجايىنىڭ اشىلعانىنا 56 جىلدان استام ۋاقىت ءوتتى. شيپاجاي تەڭىز دەڭگەيىنەن 1 052 مەتر بيىكتىكتە ورنالاسقان. ونىڭ جالپى اۋدانى – 21 گەكتار. قوناقتاردىڭ ايتۋىنشا، بۇل اۋماقتى ءبىر كۇندە ارالاپ شىعۋ مۇمكىن ەمەس. اۋماعىندا 6500 اعاش بار، قىزىل كىتاپقا ەنگىزىلگەنى دە جەتەرلىك. تازا اۋا مەن جاسىل جەلەكتەردە سەرۋەندەۋ ادام دەنساۋلىعىن جاقسارتىپ، كوڭىل كۇيىن جايلاندىرادى دەسەدى. 
«Almaty Resort» شيپاجايى – «وقجەتپەس» ەمدەۋ-ساۋىقتىرۋ كەشەنى» اكسيونەرلىك قوعامىنىڭ فيليالى. مۇندا قوناقتارعا ەۋروپالىق ستاندارتتار بويىنشا دايىندالعان جايلى بولمەلەر، تاماشا ەمدەۋ بازاسى، ءتۇرلى مازىرلەر، سپورت زالدارى جانە تاعى دا باسقا قىزمەتتەر ۇسىنىلادى. عيماراتتىڭ ءبىرىنشى قاباتىندا رەسەپشن ورنالاسقان. مۇندا ساعات 10.30-دان 12.30-عا دەيىن بارلىق دەمالۋشىلارعا فيتوشاي جانە وتتەگى كوكتەيلى ۇسىنىلادى. فيتوشاي مەن ءشوپ شاي ءارتۇرلى شوپتەردەن جيناقتالىپ ازىرلەنەدى. ونىڭ قۇرامىندا گۇل جانە قۇرعاق جاپىراقتار، جەمىس، وسىمدىك تۇقىمدارى بار. كەلۋشىلەر عيماراتتىڭ ءبىرىنشى قاباتىندا وتىرىپ، تىنىعا الادى.
شيپاجاي Kazakh Nomad Resort تۇجىرماداماسىمەن جۇمىس ىستەيدى
شيپاجايدا دەمالۋشىلارعا تاڭعى اسپەن بىرگە قىمىز بەرەدى. قىمىز ادام دەنەسىن قىزدىرىپ، يمۋنيتەتىن قالىپتاستىرادى دەسەدى. قىزمەتكەرلەردىڭ ايتۋىنشا، قىمىز ىشكەندەردىڭ الداعى ءۇش كۇندە ءىشى ءوتىپ، ادام اعزاسى تازارادى ەكەن. ساناتوريي قىزمەتكەرلەرى تاڭەرتەڭ قىمىز، ال كەشكە ايران بەرىلەتىنىن ايتادى. سەبەبى، ايران ادامنىڭ قان اينالاسىن قالىپتاندىرىپ، ۇيقىڭىزدىڭ قانىپ تۇرۋىنا ىقپال ەتەدى. شيپاجايعا قىمىز ەسىك قالاسىنان جەتكىزىلەدى ەكەن. سەبەبى ەسىك قالاسىنداعى جىلقىلار جۋسانمەن قورەكتەنگەندىكتەن، ءسۇتى دە ادام دەنساۋلىعىنا وڭ اسەرىن تيگىزەتىن كورىنەدى. وسى رەتتە، شيپاجاي باسشىلىعى Kazakh Nomad Resort تۇجىرىمداماسىن قارقىندى ەنگىزىپ جاتقانىن اتاپ ءوتتى. ماسەلەن، شيپاجايدا ۇلتتىق ستيلدە بەزەندىرىلگەن سەنسورلىق بولمە بار ەكەن. مۇندا وتىرعان ادامنىڭ پسيحيكالىق جانە مورالدىق تىنىشتاندىرىپ، جۇيكە جۇيەسىن قالپىنا كەلتىرۋگە مۇمكىندىك بەرەدى.
3000 م تەرەڭدىكتەن شىعاتىن قاينار بۇلاق
جاياۋ سەرۋەندەۋگە ارنالعان جولداردىڭ بويىنداعى الۋان ءتۇرلى جاسىل جەلەك، تاماشا ورمان القابى تىنىس جولدارىن جاقسارتۋعا ىقپال ەتەدى. 3000 م تەرەڭدىكتەن شىعاتىن قاينار بۇلاقتىڭ مينەرالدى سۋى دا دەنساۋلىققا تيگىزەر اسەرى وراسان زور. تابيعي يودتىڭ 600-750 مكگ/دم3 پروفيلاكتيكالىق مولشەرىندە بولۋى قاينار سۋىنىڭ ساپاسىن ارتتىرا تۇسەدى. وسى دەڭگەيدە سۋ 42°س تەمپەراتۋرادا شىعادى. سۋ ارنايى قويمادا ساقتالادى جانە كلينيكا ۆاننالارىنا 36°س تەمپەراتۋرادا بەرىلەدى.
-شيپاجايدا 135 ورىن بار. جىلىنا 11500 ادام دەمالادى. ونىڭ ىشىندە 45%-ى اقىلى، قالعان 50%-ى قىزمەتتەگى ادامدار، جولداما ارقىلى كەلەدى. دەمالىس ورنى اۋماعىنداعى جاسىل جەلەك د.قونايەۆتىڭ كەزىندە، 1962 جىلدارى، ارنايى مامانداردىڭ نۇسقاۋلىعىمەن ەگىلگەن. بۇل اعاشتار تەك ادەمى كورىنىس ءۇشىن ەمەس، ەمدىك ءۇشىن دە وتىرعىزىلعان. ادامداردىڭ دەنساۋلىعىن جاقسارتۋ ماقساتىندا جاسالعان. ءقازىر شيپاجايدا 6500 ءتۇپ اعاش بار، ونىڭ 200ء-ى قىزىل كىتاپقا ەنگەن. شيپاجايدا الماتى وبلىسىنداعى 3000 م تەرەڭدىكتەن شىعاتىن قاينار بۇلاق بار. بۇل سۋدىڭ پايدالى تۇستارى وتە كوپ، ادامنىڭ تىنىس جولدارىن اشادى. قۇرامىندا كوپتەگەن پايدالى دارۋمەندەر دە بار. قوناقتار دارىگەردىڭ نۇسقاۋىنا ساي، دەرتتىڭ دەڭگەيىنە بايلانىستى بالشىقپەن ەمدەلەدى. ول الماتى وبلىسىنداعى تۇزكول كولىنەن جەتكىزىلەدى، - دەدى «Almaty resort» ەسك ديرەكتورى بۇعىبايەۆا گۇلجانات.
مينەرالدى سۋدىڭ قۇرامىندا يود، فتور، بروم، مارگانەس، كرەمنيي قىشقىلى سياقتى ماڭىزدى ميكروەلەمەنتتەر بار. سۋ – اس قورىتۋ جۇيەسىنىڭ، اسقازان-ىشەك جولدارىنىڭ جانە باسقا دا ورگانداردىڭ دەرتتەرىن ەمدەۋدە تاپتىرماس شيپا. سونىمەن قاتار، ول ءتۇرلى پروسەدۋرالارعا، ياعني مينەرالدى ۆاننا، گينەكولوگيالىق، ىشەك جانە اۋىز قۋىسىنىڭ اۋرۋلارى مەن ينگالياسيا ءۇشىن قولدانىلادى. مينەرالدى سۋدى پايدالانۋدان باسقا، مۇندا بالشىقپەن ەمدەۋ پروسەدۋرالارى بار.
مەديسينالىق بلوك زاماناۋي قۇرىلعىلارمەن جابدىقتالعان
بۇل جەردىڭ كليماتى كونتينەنتتىك، تەمپەراتۋراسى ەرەكشە، جازدا بىر-ەكى گرادۋسقا تومەن جانە قىستا بىر-ەكى گرادۋسقا جىلىراق. وتتەگىنىڭ اتموسفەرالىق جانە پارسيالدىق قىسىمى تەڭىز دەڭگەيىنە قاراعاندا تومەن. شيپاجايدىڭ مەديسينالىق بلوگىندا 99 مامان بار. ونىڭ ىشىندە 27ء-سى – دارىگەر، 46-سى – ورتا مەديسينالىق پەرسونال، 18ء-ى – كىشى مەديسينالىق پەرسونال. مەديسينالىق بلوك زاماناۋي قۇرىلعىلارمەن جابدىقتالعان. ساناتوريي دارىگەرلەرى پاسيەنتتىڭ دياگنوزىنا سايكەس، ەمدەۋ جوسپارىن ازىرلەيدى. بۇل جەردە كارديولوگ، تەراپيەۆت، نيەۆروپاتولوگ، ەندوكرينولوگ، ديەتولوگ، فيزيوتەراپيەۆت، ۋرولوگ، وفتالمولوگ، ستوماتولوگ سياقتى مەديسينا ماماندارى جۇمىس ىستەيدى. اعزاداعى ءارتۇرلى پاتولوگيالاردىڭ دامۋ ءقاۋپىن انىقتاۋ ءۇشىن «مەدسكانەر بيورس» اپپاراتى قولدانىلادى. بۇل قۇرىلعىداعى Velness (دەنساۋلىق) باعدارلامالىق كەشەنىنىڭ كومەگىمەن 10 ءتۇرلى دياگنوستيكادان وتۋگە بولادى. ساناتوريي دارىگەرلەرى پاسيەنتتىڭ دياگنوزىنا سايكەس، ەمدەۋ جوسپارىن ازىرلەيدى. 
-فۋنكسيونالدىق دياگنوستيكاعا كەلەتىن بولساق، بىزدە بارلىق ورگانداردىڭ، بۋىنداردىڭ، جۇمساق تىندەردىڭ ۋلترادىبىستىق زەرتتەۋى، حولتەر بويىنشا ەكگ-نىڭ تاۋلىكتىك مونيتورينگى، كارديوگرامما، سپيروگرافيا جۇرگىزىلەدى. سونداي-اق ءبىزدىڭ زەرتحانا بارلىق زاماناۋي ستاندارتتارعا ساي كەلەدى. ءبىز سەرولوگيالىق، بيوحيميالىق، يممۋنوفەرمەنتتىك تالداۋلار (يفا)، check-up (چەك اپ) جاسايمىز. ياعني، ءبىزدىڭ كەشەننەن بۇكىل زەرتتەۋلەر مەن كەڭەستەردى الۋعا تولىق مۇمكىندىك بار، – دەدى سالتانات بەيسەمبايەۆا.
مەيرامحانالار 340 ادامعا ارنالعان
شيپاجايدىڭ اۋماعى كەڭ بولۋىنا بايلانىستى، مۇندا ءۇش ۇلكەن مەيرامحانا بار. سولاردىڭ ءبىرى كيىز ءۇي تۇرىندە جاسالىپ، ۇلتتىق ناقىشتاعى ەلەمەنتتەرمەن بەزەندىرىلگەن. بۇعان قوسا، مۇندا مۋزىكالىق اسپاپتار دا قويىلعان. ال ەكىنشى مەيرامحانادا روبوت داياشى بار. ول ادامدارعا تاعام تاسىپ، تۋعان كۇندەرىمەن قۇتتىقتاي الادى. مەيرامحانالار 340 ادامعا ارنالعان. قوناقتار ۇلتتىق تاعامدارمەن قاتار، شەتەلدىك تاماقتاردىڭ دا ءدامىن تاتا الادى. اس مازىرىنە تەك اسپاز عانا ەمەس، شيپاجاي ديرەكتورى گۇلجانات بۇعىبايەۆا دا جاۋاپتى.
ء-بىز ۇلتتىق تاعامدار كۇنىن ەنگىزدىك. جۇما كۇندەرى تاڭعى استان باستاپ، بىزدە ەت، كەسپە، قۋىرداق، باۋىرساق سياقتى ۇلتتىق تاعامدار، سونداي-اق مايسوك، تاعى باسقا ءدامدى دەسەرتتەر دايىندالادى. سونىمەن قاتار، سارسەنبىدە ءبىز وزبەك جانە يتاليان اسحاناسىنىڭ تاعامدارىن ازىرلەيمىز. جالپى، بىزدە كۇن سايىن ءمازىر وزگەرىپ تۇرادى جانە ولار بىر-بىرىنە ۇقسامايدى، قايتالانبايدى. مۇنىڭ ءبارى ءبىزدىڭ كەلۋشىلەرىمىز ءۇشىن جاسالادى، - دەدى گۇلجانات بۇعىبايەۆا.
الدىمەن ەم، سوسىن دەمالۋ ءۇشىن استانادان كەلدىم. ءوزىم 37 جىل مەملەكەتتىك قىزمەتتە ىستەدىم. ونىڭ 25 جىلىن سوت تورەلىگىنە ارنادىم. وسى شيپاجايعا بەس جىلدان بەرى تۇراقتى تۇردە كەلىپ تۇرامىن. شيپاجايداعى مەدبيكەلەرىنىڭ قىزمەتىنە ەرەكشە ريزامىن. جاعدايىڭدى ءبىلىپ، كوڭىلگە دەمەۋ بەرىپ تۇرادى. بارلىعى ءوز ورنىندا، مىندەتتەرىن مۇلتىكسىز اتقارادى. دارىگەرلەر بىلىكتى، مەدبيكەلەر مەيىربان. ەمدەلىپ، دەمالىپ، دەنساۋلىعىڭدى جاقسارتا الاسىڭ. جالپى، ءوزىم جۇرەگىمنىڭ اقاۋىنا، قانت ديابەتىنە بايلانىستى دارىگەردىڭ ەسەبىندە تۇرمىن. وسى دەرتتەرىمە ەم الۋ ءۇشىن وسى جاققا كەلەمىن. جۇرەك اۋىرعانان كەيىن تازا اۋا، كوڭىلگە تىنىشتىق كەرەك دەگەندەي. كەلگەنىمە ءبىر اپتاعا جۋىقتادى. وسى ۋاقىتتىڭ ىشىندە دەنساۋلىعىمداعى وڭ وزگەرىستەر سەزىلىپ جاتىر. كوڭىل كوتەرىلىپ، ەرەكشە ءبىر كۇيگە ەنىپ جاتقانىمدى جاسىرمايمىن، - دەيدى دەمالۋشى بايدۋلا قوشانوۆ.
