قازاقستان، ورتالىق ازيا جانە تمد ەلدەرىندە العاش رەت «Eurasian Journal of Physics and Functional Materials» عىلىمي جۋرنالى Digital Commons Elsevier پلاتفورماسىندا شىعارىلا باستادى.
Elsevier الەمدەگى ەڭ ءىرى عىلىمي باسپالاردىڭ ءبىرى جانە دۇنيە جۇزىندەگى عىلىمي جۋرنالداردىڭ بارلىق ماقالالارىنىڭ تورتتەن ءبىرىن شىعارادى، دەپ حابارلايدى Almaty-akshamy.kz عىلىم جانە جوعارى ءبىلىم مينيسترلىگىنە سىلتەمە جاساپ.
«Eurasian Journal of Physics and Functional Materials» جۋرنالى ەۋرازيا ۇلتتىق ۋنيۆەرسيتەتىندە 2017 جىلدان باستاپ اعىلشىن تىلىندە شىعارىلادى. عىلىمي باسىلىمنىڭ بارلىق ماقالالارى Scopus حالىقارالىق عىلىمي دەرەكتەر بازاسىنا دا ەنگىزىلگەن. جۋرنال يادرولىق فيزيكا، جوعارى ەنەرگيا فيزيكاسى، بالامالى جانە سۋتەگى ەنەرگەتيكاسى، ت.ب. سالاداعى عىلىمي زەرتتەۋلەردىڭ ناتيجەلەرى تۋرالى ماتەريالداردى قامتيدى.
جۋرنالدىڭ حالىقارالىق رەداكسيا القاسىنىڭ قۇرامىنا قازاقستان، رەسەي، اقش، فرانسيا، جاپونيا، فينليانديا، شۆەسيا، يتاليا، وزبەكستان، انگليا عالىمدارى، سونداي-اق CERN جانە بىرىككەن يادرولىق زەرتتەۋلەر ينستيتۋتى سياقتى الەمدىك دەڭگەيدەگى عىلىمي ۇيىمدار كىرەدى.
«Elsevier كومپانياسى جۋرنالدى بازاعا قوسۋ جانە ەلەكتروندىق نۇسقاسىن شىعارۋ تۋرالى بىزگە ۇسىنىسپەن وزدەرى شىقتى. Elsevier پلاتفورماسىندا «Eurasian Journal of Physics and Functional Materials» جۋرنالىنىڭ جاريالانۋى جۋرنالدىڭ عانا ەمەس، قازاقستاننىڭ بۇكىل عىلىمي قوعامداستىعىنىڭ دامۋى ءۇشىن جاڭا پەرسپەكتيۆالار اشادى. بۇل ل.گۋميليەۆ اتىنداعى ەۇۋ-دا جانە قازاقستاندا جۇرگىزىلىپ جاتقان عىلىمي زەرتتەۋلەر ساپاسىنىڭ حالىقارالىق دەڭگەيىن مويىنداۋ»، - دەپ اتاپ ءوتتى جۋرنالدىڭ باس رەداكتورى، ەۇۋ «ەۋرازيالىق فيزيكا-ەنەرگەتيكالىق زەرتتەۋلەر جانە جوعارى تەحنولوگيالار ينستيتۋتى» عزي ديرەكتورى قايرات كۇتەربەكوۆ.