كورشى ەلدەن كەلەدى دەپ بولجانعان 10،3 ملرد تەكشە مەتر سۋدىڭ ورنىنا بيىل 7،3 ملرد تەكشە مەتر سۋ جەتكىزىلۋى مۇمكىن.
تۇركىستان وبلىسىنا جۇمىس ساپارىمەن بارعان ق ر ەكولوگيا، گەولوگيا جانە تابيعي رەسۋرستار ۆيسە-مينيسترى سەرىك قوجانيازوۆ ەلىمىزدىڭ وڭتۇستىك وڭىرلەرىندە اعىن سۋ تاپشىلىعى بولۋى مۇمكىن ەكەنىن اتاپ ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ماقتاارال جانە جەتىساي اۋداندارىنداعى سۋ نىساندارىنىڭ جاي-كۇيىمەن تانىسقان ۆيسە-مينيستر كورشىلەس ەلدەگى توقتاعۇل قويماسىندا سۋدىڭ قورى جوسپارلاعاننان 1،6 ملرد تەكشە مەترگە كەم جينالعانىن جەتكىزدى. ەلىمىزگە كەلەدى دەپ بولجانعان 10،3 ملرد تەكشە مەتر سۋدىڭ ورنىنا بيىل 7،3 ملرد تەكشە مەتر سۋ جەتكىزىلۋى مۇمكىن ەكەنىن ايتىپ ءوتتى. سالدارىنان شاردارا مەن كوكساراي سۋ قويمالارىنداعى سۋدىڭ كولەمى بىلتىرعىعا قاراعاندا 1 ملرد تەكشە مەترگە از جينالىپ، كوكساراي سۋ قويماسىندا سۋدىڭ مولشەرى تىم تومەن بولادى دەگەن بولجام بار. وسى قيىندىقتان شىعۋ جولدارىن تالقىلاۋ كەزىندە سەرىك قوجانيازوۆ ديقاندارعا كوكتەمگى جاۋىن شاشىن از بولسا اعىن سۋدى از قاجەت ەتەتىن داقىلدارعا كوشۋ كەرەكتىگىن ەسكەرتتى.
«بيىل وسى كوكسارايسىز شىعاتىن امالدار تابۋىمىز كەرەك. مىندەتتى تۇردە قوسىمشا شارا، وعان جىلداعى ناسوسىمىز بار، كەزەككە تۇراتىنىمىز بار. سۋدى كوپ تالاپ ەتەتىن داقىلداردى ەگۋدى ازايتۋ ماسەلەسى بار دەگەندەي. ەكى اۋداننىڭ ءتورت مىڭداي گەكتار جەرىندە كۇرىش ەگىلەدى. بيىل وسى كۇرىشتى مەيلىنشە ەكپەۋ كەرەك. ويتكەنى ماقتا سياقتى باسقا داقىلدارعا سۋ جەتپەيدى. سوسىن تاعى ءبىر قيىندىق كوكسارايدىڭ ماڭىندا 2،5 مىڭ گەكتار جەرگە ارىس اۋدانىنىڭ شارۋالارى داقىل ەگەدى. ولارعا بيىل ەگىن ەگۋگە جاعداي بولمايدى. سول سەبەپتى سونداي قيىنشىلىقتار بولادى. دەگەنمەن جاعداي ۇكىمەتتىڭ ءجىتى باقىلاۋىنا الىنىپ، كورشىلەس ەلدەرمەن كەلىسسوزدەر جۇرگىزىلەدى»، - دەدى سەرىك قوجانيازوۆ.
تىعىرىقتان شىعۋدىڭ جولدارىن قاراستىرعان ماماندار كوكسارايدا سۋ بولماسا، ءبىر عانا شاردارانىڭ سۋى تۇركىستان مەن قىزىلوردا وبلىستارىنا جەتپەيدى دەپ وتىر. سوندىقتان اعىن سۋ ماسەلەسى بويىنشا وڭىردەگى جاعدايدى زەردەلەپ، سۋ تاپشىلىعىنا بايلانىستى قولعا الىناتىن جۇمىستاردى پىسىقتاپ ءوتتى. ۆيسە-مينيستر اعىن سۋ جەتكىزۋ الدىمىزداعى اقپان جانە ناۋرىز ايلارى قارلى ءارى جاڭبىرلى بولسا، جاعداي رەتتەلۋى مۇمكىن ەكەنىن دە اتاپ ءوتتى.
«دەگەنمەن ءبىز بيىل مەيلىنشە سۋدى از قاجەت ەتەتىن كوكونىستەر مەن داقىلداردى ەگىپ، سۋدى پايدالانۋ ءتارتىبىن رەتتەۋىمىز قاجەت. ءىسساپارىمىزدا وبلىس، اۋدان، قالا اكىمدىكتەرىمەن وسى ماسەلە بويىنشا كەڭەسىپ، تىعىرىقتان شىعاتىن جولداردى قاراستىردىق. ءتيىستى نۇسقاۋلار بەرىلدى. سىرداريا وزەنىنىڭ سۋى بويىنشا ۇكىمەتارالىق دەڭگەيدە قارالاتىن دا ماسەلەلەر بار»، – دەدى سەرىك قوجانيازوۆ.
ايتا كەتەيىك، تۇركىستان وبلىسىندا 44 سۋ قويماسى، 105 ماگيسترالدى كانال، 1699 شارۋاشىلىقارالىق جانە شارۋاشىلىقىشىلىك ارنا، 1200-دەي تىك درەناجدى ۇڭعىما بار. قازىرگى تاڭدا مينيسترلىك پەن وبلىس اكىمدىگى تاراپىنان وڭىردە سۋ ۇنەمدەۋ تەحنولوگيالارىن قولدانۋ جانە ونى جاپپاي ەنگىزۋ بويىنشا ۇيىمداستىرۋ، تۇسىندىرمە جۇمىستارى جۇرگىزىلىپ جاتىر.