وليمپيادانىڭ اشىلۋ سالتاناتى باستالدى

اراعا 14 جىل سالىپ، قىتايلىقتار قىسقى ويىنداردى وتكىزۋدە.

وليمپيادا «جىلدامىراق، بيىگىرەك، مىقتىراق - بىرگەمىز» دەگەن ۇرانمەن وتۋدە، دەپ حابارلايدى Almaty-akshamy.kz Olympic.kz سايتىنا سىلتەمە جاساپ. 

بەيجىڭدە 2022 جىلعى قىسقى وليمپيادانىڭ اشىلۋ سالتاناتى باستالدى. 

سوڭعى رەت جۇڭگو ەلى 2008 جىلعى جازعى وليمپيادانى قابىلداعان بولاتىن. وسىلايشا، جازعى جانە قىسقى وليمپيادانى قابىلداعان العاشقى مەملەكەت رەتىندە تاريحتا قالماق. 

اشىلۋ سالتاناتىن قويۋشى رەجيسسەر – ايگىلى چجان يموۋ. 2008 جىلعى جازعى ويىنداردىڭ اشىلۋ سالتاناتىن دا يموۋ ۇيىمداستىرعان بولاتىن. 

وسى جولى كوۆيدكە قارسى شارالاردى ساقتاۋ بارىسىندا قويىلىمعا قاتىسۋشىلار سانى مەيلىنشە قىسقاردى. شوۋعا 3 مىڭ اكتەر قاتىسادى. 

ءاربىر وليمپيادانىڭ ەڭ ماڭىزدى ساتتەرىنىڭ ءبىرى – وليمپيادا الاۋى جاعىلاتىن ءسات. ۇيىمداستىرۋشىلاردىڭ ايتۋىنشا، الاۋدى جاعۋ ءراسىمى سوڭعى 100 جىلدا بولماعان ادىسپەن ورىندالماق. 

وليمپيادا «جىلدامىراق، بيىگىرەك، مىقتىراق - بىرگەمىز» دەگەن ۇرانمەن وتۋدە. 

2022 جىلعى قىسقى وليمپيادا ويىندارىندا قازاقستان نامىسىن 34 سپورتشى قورعاۋدا. ەلىمىزدىڭ كوك تۋىن ابزال اجىعالييەۆ پەن ەكاتەرينا ايدوۆا الىپ شىقتى.