رەسمي دەرەكتەرگە سۇيەنسەك، ەلىمىزدە ەكونوميكالىق ءوسىم بايقالادى. قازاقستاندا ءارتاراپتاندىرۋ جۇمىستارى ءجۇرىپ، اگروسەكتورعا، قايتا وڭدەۋ ونەركاسىبىنە جانە جاڭارتىلاتىن ەنەرگيا كوزىنە ينۆەستيسيا تارتىلىپ جاتىر. بۇل تۋرالى ەكونوميست لياززات جانمولدايەۆا اqshamnews.kz تىلشىسىنە ەگجەي-تەگجەي ءتۇسىندىرىپ بەردى. ونىڭ سوزىنشە، ەكونوميكانىڭ تۇراقتى دامۋى دايىن ءونىم ءوندىرىسىن ارتتىرىپ، تەڭگەنىڭ تۇراقتىلىعىنا، جاڭا جۇمىس ورنىنىڭ اشىلۋىنا جانە يمپورتقا تاۋەلدىلىكتىڭ ازايۋىنا اكەلەدى.
"ءقازىر ەكونوميكانى ءارتاراپتاندىرۋ ءۇشىن ناقتى جۇمىستار جۇرگىزىلىپ جاتىر. بۇل تەك ءسوز جۇزىندە ەمەس، كوپ سالادا بايقالادى. سىرتتان تارتىلعان ينۆەستيسيا اۋىل شارۋاشىلىعىن دامىتۋعا باعىتتالعان. بۇدان بولەك، ەلىمىزگە كەلىپ جاتقان الەمدىك دەڭگەيدەگى انشىلەر مەن مادەني ءىس-شارالار دا تۋريستەر اعىنىن ارتتىرىپ، قوسىمشا تابىس كوزىنە اينالىپ وتىر"، – دەيدى ول.
ساراپشىنىڭ ايتۋىنشا، بىلتىرعى قورىتىندى بويىنشا قازاقستاندا ءجىو ادام باسىنا شاققاندا 13 250 اقش دوللارىنان اسقان. بۇل – ەكونوميكانىڭ قۇلدىراپ ەمەس، ءوسىپ جاتقانىنىڭ ايعاعى.
"بۇعان دەيىن ەلىمىزدىڭ تابىسى سىرتتاعى مۇناي باعاسىنا تاۋەلدى بولدى. ەندى ءبىز دايىن ونىمنەن پايدا تابۋعا كوشىپ كەلەمىز. اگروونەركاسىپ كەشەنىن دامىتۋ ارقىلى ىشكى سۇرانىستى قامتىپ قانا قويماي، ەكسپورتقا دا جۇمىس ىستەيتىن بولامىز. دايىن ءونىم ءوندىرىسى - تەڭگە تۇراقتىلىعى، جاڭا جۇمىس ورىندارى مەن يمپورتقا تاۋەلدىلىكتى ازايتۋدىڭ جولى. بۇل – ۇزاقمەرزىمدى ەكونوميكالىق تۇراقتىلىققا باستار باعىت"، – دەدى ساراپشى.
ول شاعىن جانە ورتا بيزنەستى دامىتۋدا دا ۇلكەن الەۋەت بار ەكەنىن اتاپ ءوتتى.
"ەگەر بۇل سالادا جەمقورلىققا جول بەرىلمەسە، ناقتى ناتيجە بەرەدى. حالىقتىڭ قارجى ساۋاتىن ارتتىرۋ، تابىس تابۋعا جاعداي جاساۋ - تۇرمىس ساپاسىن جاقسارتۋدىڭ نەگىزى"، – دەيدى لياززات جانمولدايەۆا.
ينۆەستيسيا قايدا باعىتتالىپ جاتىر؟
ساراپشىنىڭ ايتۋىنشا، بۇرىن ينۆەستيسيالار نەگىزىنەن جەراستى بايلىقتارىن يگەرۋگە باعىتتالسا، ءقازىر ولار اۋىل شارۋاشىلىعى، قايتا وڭدەۋ ونەركاسىبى، جيھاز ءوندىرىسى، ءتىپتى جەل ەنەرگەتيكاسى سياقتى سالالارعا تارتىلىپ جاتىر.
"ينۆەستورلار ەكونوميكاسى مەن ىشكى ساياساتى تۇراقسىز ەلدەرگە قاراجات سالعىسى كەلمەيدى. ال قازاقستاندا ساياسي جانە ەكونوميكالىق تۇراقتىلىق بار. سوندىقتان بىزگە ينۆەستيسيا تارتۋعا مۇمكىندىك تە، الەۋەت تە جەتەدى"، – دەپ تۇيىندەدى ساراپشى.
رەسمي دەرەكتەر نە دەيدى؟
ۇلتتىق ستاتيستيكا بيۋروسىنىڭ الدىن الا دەرەكتەرىنە سايكەس، 2025 جىلعى قاڭتار–مامىر ايلارىندا قازاقستاننىڭ جالپى ىشكى ءونىمى بىلتىر وسى كەزەڭىمەن سالىستىرعاندا 6 پايىزعا وسكەن. بۇل وسىمگە ونەركاسىپ، قۇرىلىس، ساۋدا، كولىك جانە بايلانىس سالالارىنداعى بەلسەندىلىك تۇرتكى بولعان.