قازاقستان رەسپۋبليكاسىنىڭ مادەنيەت جانە اقپارات مينيسترلىگىندە گەندەرلىك سەزىمتال بيۋدجەتتى (گسب) ەنگىزۋ ماسەلەسىنە ارنالعان وتىرىس ءوتتى. ءىس-شاراعا قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وكىلى جۇلدىزاي ىسقاقوۆا، ق ر پارلامەنتىنىڭ دەپۋتاتتارى، ەلىمىزدەگى بۇۇ-ايەلدەر قۇرىلىمىنىڭ وكىلدەرى، سونداي-اق گەندەرلىك ساياسات سالاسىنداعى حالىقارالىق ساراپشىلار قاتىستى.
كەزدەسۋ بارىسىندا قازاقستانداعى قازىرگى جاعدايعا جاسالعان تالداۋ ناتيجەلەرى مەن حالىقارالىق ستاندارتتار مەن وزىق تاجىريبەلەردى ەسكەرە وتىرىپ ازىرلەنگەن گسب ەنگىزۋ جونىندەگى جول كارتاسىنىڭ جوباسى تالقىلاندى، دەپ حابارلايدى aqshamnews.kz.
اتالعان باستاما بارلىق دەڭگەيدەگى بيۋدجەتتەردى ءتيىمدى جوسپارلاۋ جۇيەسىن ازىرلەۋ، زاڭنامالىق بازانى جەتىلدىرۋ، گەندەرلىك ساراپتاما ەنگىزۋ، مەملەكەتتىك ورگاندار قىزمەتكەرلەرىنىڭ بىلىكتىلىگىن ارتتىرۋ جانە باسقا دا باعىتتاردى قامتيدى.
گەندەرلىك سەزىمتال بيۋدجەتتى ەنگىزۋ قازاقستان رەسپۋبليكاسىنىڭ 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىندا بەلگىلەنگەن. بۇل باستاما الەۋمەتتىك ادىلەتتى بيۋدجەتتى قالىپتاستىرۋعا جانە ينكليۋزيۆتى قوعام قۇرۋعا باعىتتالعان.
ايتا كەتۋ كەرەك، گەندەرلىك سەزىمتال بيۋدجەتتەۋ – بيۋدجەتتى جوسپارلاۋ كەزىندە ايەلدەرگە قانداي دا ءبىر ارتىقشىلىق بەرۋ ەمەس، ايەلدەر، جاستار، بالالار مەن الەۋمەتتىك وسال توپتاردىڭ مۇددەلەرىن بارىنشا ەسكەرۋ ارقىلى بيۋدجەت قاراجاتىنىڭ تيىمدىلىگىن ارتتىرۋعا مۇمكىندىك بەرەدى.