بۇگىن ىسكە قوسىلعان تۋريستىك پويىز 2023 جىلعى قاڭتاردىڭ سوڭىنا دەيىن جۇرەدى
جاڭا جىل مەرەكەسى قارساڭىندا ەلوردادان بۋرابايعا دەيىن ارنايى تۋريستىك ەلەكتر پويىزى ىسكە قوسىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جاڭا جىل مەرەكەسى قارساڭىندا استانا – كوكشەتاۋ ەلەكتر پويىزىنىڭ 2 ۆاگونى تاڭەرتەڭ جولعا شىقتى. سونداي-اق، ۆاگوندار ۇلتتىق ستيلدە بەزەندىرىلگەن.
جولدا بۋرابايعا توقتايتىن ەلەكتر پويىزى كۇن سايىن تاڭعى ساعات 06:03-تە «نۇرلى جول» ۆوكزالىنان شىعىپ، كۋرورتتى ايماققا ساعات 09:57-دە جەتەدى.
كەرى قاراي ساعات 19:15-تە اتتانىپ، استانا-1 ستانسياسىنا ساعات 22:18-دە، ال «نۇرلى جول» ۆوكزالىنا ساعات 23:00-دە كەلەدى.
«مەرەكەلىك پويىز جوباسىن «قازاقستان تەمىر جولى» ۇلتتىق كومپانياسىمەن بىرلەسىپ جۇزەگە اسىرىپ جاتىرمىز. ناۋرىز مەرەكەسى قارساڭىندا جالعاسىن تابادى. سونداي-اق، الداعى ۋاقىتتا پويىز باعىتتارىنىڭ اياسىن كەڭەيتۋ جوسپارىمىز بار. مىسالى، الماتى -ماڭعىستاۋ باعىتىندا تۋريستىك پويىزدى ىسكە قوسۋ. وسىلايشا، باسقا باعىتتار دا اشىلا باستايدى. ارينە، ءبىر كۇندىك جۇمىس ەمەس، جوسپار بار»، - دەدى «Kazakh Tourism» اق ۇلتتىق كومپانياسىنىڭ باسقارۋشى ديرەكتورى دانيەل سەرجان ۇلى ب ا ق وكىلدەرىنە ارنالعان باسپا ءسوز تۋرى بارىسىندا.
ۇيىمداستىرۋشىلاردىڭ ايتۋىنشا، مەرەكەلىك بەزەندىرىلگەن ۆاگونداردىڭ باعا ايىرماشىلىعى جوق.
بۇگىن ىسكە قوسىلعان تۋريستىك پويىز 2023 جىلعى قاڭتاردىڭ سوڭىنا دەيىن جۇرەدى.
«مەرەكەلىك پويىز تۋريستەر ءۇشىن ىڭعايلى. تۋرپاكەتتى ساتىپ العاندا پويىزدىڭ قۇنى ىشىنە كىرەدى. ياعني، بولەك بيلەت الۋدىڭ قاجەتى جوق. مىسالى، ءسىز بۋرابايعا تۋرپاكەت ساتىپ الساڭىز كولىك جاعىن ۋايىمداماساڭىز بولادى. ءسىزدى بۋرابايدان كۇتىپ الادى. جاڭا جىلدىق ەلەكتر پويىزىن ىسكە قوسۋداعى ماقسات – وڭىرلەرگە تۋريستەر اعىنىن تارتۋ جانە جەرگىلىكتى تۋروپەراتورلاردىڭ بەلسەندىلىگىن قامتاماسىز ەتۋ»، - دەيدى ول.
ايتا كەتسەك، اتالعان جوبانى ق ر پرەزيدەنتىنىڭ ءىس باسقارماسىنا قاراستى «بۋراباي دامۋ» ج ش س، «Kazakh Tourism» ۇلتتىق كومپانياسى جانە «جولاۋشىلار تاسىمالى» اق بىرلەسىپ قولعا الىپ وتىر.