قازاقستاندا تۇماۋ جانە جرۆي بويىنشا اعىمداعى ماۋسىمدا تۇراقتى ەپيدەميولوگيالىق جاعداي قالىپتاستى.
سىرقاتتانۋشىلىقتىڭ ماۋسىمدىق ءوسۋى بايقالادى، دەگەنمەن رەسپۋبليكا بويىنشا جانە وڭىرلەر بولىنىسىندە دە اۋرۋدىڭ بولجامدى شەكتى دەڭگەيىنەن اسىپ كەتۋ دەرەكتەرى انىقتالعان جوق، دەپ حابارلايدى Almaty-akshamy.kz سانيتارلىق - ەپيدەميولوگيالىق باقىلاۋ كوميتەتىنە سىلتەمە جاساپ.
سانيتارلىق-ەپيدەميولوگيالىق باقىلاۋ قىزمەتى سىرقاتتانۋشىلىقتى، تۇماۋ ۆيرۋسىنىڭ اينالىمىن مونيتورينگتەۋ جانە ۆيرۋستىڭ جاڭا شتامدارىن انىقتاۋ تۇرىندە تۇماۋ مەن تۇماۋ ءتارىزدى اۋرۋلاردى (جرۆي) ەپيدەميولوگيالىق قاداعالاۋدىڭ ءتيىمدى جۇيەسىن قامتاماسىز ەتكەن.
ەپيدەميالىق ماۋسىم باستالعاننان بەرى، ياعني 2021 جىلعى 1 قازاننان باستاپ رەسپۋبليكا بويىنشا جرۆي جۇقتىرۋدىڭ 2 ملن 730 مىڭ جاعدايى تىركەلدى. ءجىتى رەسپيراتورلىق ۆيرۋستى ينفەكسياعا شالدىققانداردىڭ باسىم ۇلەسىن 14 جاسقا دەيىنگى بالالار قۇرايدى - 2 ملن 23 مىڭ جاعداي، بۇل جالپى انىقتالعان دەرەكتەردىڭ 74% قۇرايدى. سونىمەن قاتار اعىمداعى ەپيدماۋسىمدا تۇماۋدىڭ 547 جاعدايى تىركەلدى، ونىڭ ىشىندە 14 جاسقا دەيىنگى 237 بالا وسى ىندەتكە شالدىقتى.
رەسپۋبليكا اۋماعىندا ا/H3N2 جانە B تۇماۋى ۆيرۋستارىنىڭ اينالىمى بەلگىلەنگەن، سونىمەن قاتار سيركۋلياسيادا تۇماۋ ۆيرۋسىمەن قاتار باسقا دا تۇماۋ ەمەس ۆيرۋستار انىقتالى: پاراگريپپ، رس-ۆيرۋس، مەتاپنيەۆموۆيرۋس، رينوۆيرۋس، بوكوۆيرۋس، ادەنوۆيرۋس.
باسقا تۇماۋ ەمەس ۆيرۋستاردان رينوۆيرۋستار، رس ۆيرۋسى جانە پاراگريپپ اينالىمى باسىم. تۇماۋعا قارسى ەكپە-اۋرۋدىڭ الدىن الۋدىڭ ەڭ ءتيىمدى شارالارىنىڭ ءبىرى. ۆيرۋس جۇقتىرعان جاعدايدا الىنعان ۆاكسينا اۋرۋدىڭ اۋىر اعىمىنان جانە اسقىنۋلاردان قورعايدى.
جرۆي ماۋسىمىنا دايىندىق شەڭبەرىندە رەسەيدە وندىرىلگەن «گريپپول پليۋس» ۆاكسيناسى ساتىپ الىندى. ۆاكسينانىڭ قۇرامىندا ماۋسىمدىق ا(H3N2) جانە ا(H1N1) تۇماۋىنا جانە ۆ ءتيپتى تۇماۋ ۆيرۋسى شتامىنا قارسى انتيگەندەر بار.
قازاقستاندا تۇماۋعا قارسى ۆاكسيناسيا ناۋقانى 15 قىركۇيەكتە باستالدى. بۇگىنگى تاڭدا ەلىمىزدە 2،6 ملن-نان استام ادام تۇماۋعا قارسى يممۋنيتەتىن نىعايتتى. ولاردىڭ ىشىندە جەرگىلىكتى بيۋدجەت قاراجاتى ەسەبىنەن 2 ملن 577 مىڭ ادام، جۇمىس بەرۋشىلەر ەسەبىنەن 66 مىڭ ادام، سونداي-اق اقىلى نەگىزدە 56 مىڭ ادام ەكپە سالدىردى. بۇگىنگى كۇنى ۆاكسينادان كەيىنگى اسقىنۋ جاعدايلارى تىركەلگەن جوق.