بۇل قازاق تىلىندەگى ءدىني سوزدەردىڭ العاشقى ورفوگرافيالىق سوزدىگى دەپ ايتۋعا بولادى.
سوزدىكتىڭ قۇراستىرۋشىسى جانە رەداكتورى – فيلولوگيا عىلىمدارىنىڭ كانديداتى راشيد مۇحيتدينوۆ، جاۋاپتى رەداكتورى – فيولولوگيا عىلىمدارىنىڭ دوكتورى، پروفەسسور قۇرالاي كۇدەرينوۆا، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
الماتىدا ءوتىپ جاتقان عۇلامالار كەڭەسىنىڭ ءحححىىى ماجىلىسىندە «MUFTIYAT» باسپاسىنان جارىق كورگەن «قازاق تىلىندەگى ءدىني سوزدەر مەن تەرميندەردىڭ ورفوگرافيالىق سوزدىگى» كىتابىنىڭ تانىستىرىلىمى ءوتتى.
جيناقتىڭ تانىستىرىلىمىنا باس ءمۇفتي ناۋرىزباي قاجى تاعان ۇلى باستاعان عۇلامالار كەڭەسى مۇشەلەرى قاتىستى.
«تاۋەلسىزدىكتەن كەيىن شىققان ءدىني ادەبيەتتەردە، اۋدارمالاردا، عىلىمي ەڭبەكتەردە، الەۋمەتتىك جەلىلەردە، ءتىپتى قازاقستان مۇسىلماندارى ءدىني باسقارماسىنىڭ ماقۇلداۋىمەن جارىققا شىققان ەڭبەكتەر مەن قمدب-عا قاراستى سايتتاردا دا ءدىني سوزدەردىڭ، تەرميندەردىڭ جازىلۋىندا بىرىزدىلىكتىڭ جوق ەكەندىگى بايقالىپ تۇرادى. اسىرەسە، ءدىني ەڭبەكتەردى اۋدارما جاساعاندا اراب، تۇرىك، پارسى، ورىس تىلدەرىنىڭ ىقپالى كورىنىس بەرىپ جاتادى. وسىنى ەسكەرىپ، قازاقستان مۇسىلماندارى ءدىني باسقارماسى قازاق ءتىلىنىڭ ەرەجەلەرىنە ساي ءدىن سالاسىنداعى سوزدەر مەن تەرميندەردىڭ جازىلۋىن ءبىر ىزگە ءتۇسىرۋ ءۇشىن ءدىني سوزدەر مەن تەرميندەرىنىڭ ورفوگرافيالىق سوزدىگىن قۇراستىرۋدى قولعا الدى. بۇل قازاق تىلىندەگى ءدىني سوزدەردىڭ العاشقى ورفوگرافيالىق سوزدىگى دەپ ايتۋعا بولادى»، – دەدى باس ءمۇفتي.
سوزدىكتە قازاق ماتىندەرىندەگى ءدىني سوزدەر مەن ءسوز تىركەستەرىنىڭ جانە ءدىني تەرميندەردىڭ دۇرىس جازىلۋ ەملەسى كورسەتىلگەن. سوزدىكتىڭ نەگىزگى ماقساتى – يسلامي ديسكۋرستاعى جانە جالپى ادەبي ءتىل ماتىندەرىندەگى ءدىني سوزدەردىڭ دۇرىس جازىلۋ نورماسىن كورسەتۋ. ءدىني سوزدەردەگى اراب تىلىنە ءتان كەي ارىپتەردىڭ جازىلۋىنا قاتىستى ەسكەرتۋلەر جەكە ەرەجە رەتىندە بەرىلدى. سونداي-اق سوزدىكتى قۇراستىرۋدا قازاق تىلىندەگى 500-دەن استام ءدىني جانە ادەبي ەڭبەكتەر، وقۋ قۇرالدارى، مونوگرافيالار، عىلىمي ماقالالار، ب ا ق ماتەريالدارى، ءدىني رەسمي سايتتار پايدالانىلدى.
«قازاق تىلىندەگى ءدىني سوزدەر مەن تەرميندەردىڭ ورفوگرافيالىق سوزدىگى» جيناعى قازاقستان مۇسىلماندارى ءدىني باسقارماسىنىڭ ساراپتاۋ كومميسسياسىنىڭ ماقۇلداۋىنان وتكەن. ا.بايتۇرسىن ۇلى اتىنداعى ءتىل ءبىلىمى ينستيتۋتى عالىمدار كەڭەسىنىڭ №16 حاتتاماسىمەن باسپاعا ۇسىنىلعان.