«جولاۋشىلار تاسىمالى» اكسيونەرلىك قوعامىنىڭ باس ديرەكتورى جانىبەك تايجانوۆ الداعى ءۇش جىلدا جولاۋشىلار پويىزدارىنىڭ ءبارى بەينەكامەرامەن جابدىقتالاتىنىن ايتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«جولاۋشىلار تاسىمالىنىڭ قاۋىپسىزدىگىن نىعايتىپ، شتاتتان تىس جايتتاردى ازايتۋ ءۇشىن كومپانيا بەينەباقىلاۋ جۇيەسىن كەزەڭ-كەزەڭىمەن ەنگىزىپ جاتىر. ءقازىر كولىكتەگى پوليسيا دەپارتامەنتىمەن بىرگە جول كارتاسىنا قول قويىلعان. بىرلەسكەن جوبا اياسىندا ءبىرىنشى كەزەڭدە مەيرامحانا-ۆاگونداردا بەينەباقىلاۋ كامەرالارى ورناتىلعان ەدى. 25 مارشرۋتتاعى پويىزدارعا 146 دانا كامەرا ورناتىلدى. 2022 جىلدىڭ قاراشاسى مەن 2023 ناۋرىزى ارالىعىندا پيلوتتىق جوبا اياسىندا ستاندارتتى ۆاگوندار مەن «تالگو» پويىزدارىندا دا كامەرالار ورناتىپ باستادىق»، - دەدى ول.
كومپانيا باسشىسى بۇل ىلكى جاقسى ناتيجە بەرگەنىن ايتىپ وتىر.
«ءقازىر تەحنيكالىق نەگىزدەمە ازىرلەپ جاتىرمىز. بيىل باستاپ، ءۇش جىلدىڭ ىشىندە بۇكىل پويىزداردى بەينەكامەرامەن جابدىقتاۋدى جوسپارلاپ وتىرمىز»، - دەدى جانىبەك تايجانوۆ.