ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ قازاقستاندا ەڭ تومەنگى جالاقى دەڭگەيىندە (2025 جىلى – 85 مىڭ تەڭگە) 790 مىڭ ادام ەڭبەك ەتەتىنىن، تاعى 329 مىڭ ادامنىڭ ايلىعى وسى دەڭگەيدەن دە تومەن ەكەنىن مالىمدەدى، دەپ حابارلايدى Aqshamnews.kz ءتىلشىسى. بۇل تۋرالى ول ماجىلىستە ايتتى.
مينيستر ناقتى ەسەپتەۋلەر مىندەتتى اۋدارىمدارعا، زەينەتاقى، الەۋمەتتىك جانە مەديسينالىق تولەمدەرگە سۇيەنىپ جۇرگىزىلەتىنىن اتاپ ءوتتى. سونىمەن بىرگە جاقىپوۆا كەيبىر ازاماتتارعا ەڭ تومەنگى جالاقى "قاعاز جۇزىندە" راسىمدەلىپ، قالعانى "كونۆەرتپەن" بەرىلەتىن جاعدايلار بارىن ايتتى. وسى تاۋەكەلدى قىسقارتۋ ءۇشىن ەڭبەك مينيسترلىگى زاڭناماعا وزگەرىستەر ازىرلەپ جاتىر.
بۇعان دەيىن "Amanat" پارتياسى 1،8 ملن قازاقستاندىق ەڭ تومەنگى جالاقى الادى دەگەن دەرەك تاراتقان.
"ەڭبەك مينيسترلىگىنىڭ دەرەگىنە سايكەس، تومەن جالاقى الاتىندار ساناتىنا 1 ميلليون 109 مىڭ ادام كىرەدى، ولاردىڭ 329 مىڭىنىڭ ايلىعى 80 مىڭ تەڭگەدەن دە تومەن"، – دەپ ناقتىلادى مينيستر.
ەسكە سالايىق، 85 مىڭ تەڭگە - ەلدەگى رەسمي ەڭ تومەنگى جالاقى. "2026–2028 جىلدارعا ارنالعان رەسپۋبليكالىق بيۋدجەت تۋرالى" زاڭ جوباسىندا جالاقى مەن زەينەتاقى ءوسىمى قاراستىرىلعانىمەن، ەڭ تومەنگى جالاقى كولەمى وزگەرىسسىز قالماق.