سەناتور عالياسقار سارىبايەۆ مەكتەپ پسيحولوگتارىنىڭ مارتەبەسىن كوتەرۋ ماسەلەسىن كوتەردى.
ول ۇكىمەت باسشىسىنىڭ اتىنا دەپۋتاتتىق ساۋال جولدادى، دەپ حابارلايدى Almaty-akshamy.kz
دەپۋتاتتىڭ ايتۋىنشا، ەلىمىزدە، اسىرەسە اۋىلداردا پسيحولوگيالىق كومەك كورسەتۋ جۇيەسىنىڭ ناشارلىعىنان پروبلەمالار ۋاقىتىلى انىقتالمايدى.
سەناتوردىڭ پىكىرىنشە، بالالاردىڭ مىنەز-قۇلقىنداعى العاشقى پروبلەمالار مەكتەپكە دەيىنگى جانە مەكتەپ جاسىندا انىقتالادى. سوندىقتان پەداگوگ-پسيحولوگتاردىڭ وقۋشىلارعا جەكە-دارا قولداۋ كورسەتۋگە قول جەتكىزۋ مۇمكىندىگىنە جانە ونىڭ ساپاسىن ارتتىرۋ ماسەلەسىنە ەرەكشە نازار اۋدارۋ قاجەت.
«ورتا ەسەپپەن 1،5 مىڭ بالا وقيتىن مەكتەپتەردە 60، ال 4500 جانە ودان دا كوپ وقۋشىلارى بار ءبىلىم وشاقتارىندا 170-تەن كوپ سىنىپ بار. ياعني، ءبىر پسيحولوگ 2000 وقۋشىعا جانە ەرەكشە ءبىلىم بەرۋ قاجەتتىلىكتەرى بار بالالارعا قىزمەت كورسەتىپ وتىر. پسيحولوگتىڭ جۇكتەمەسى ۇلكەن بولۋىنا بايلانىستى، ناقتى مۇقتاج ادامعا كومەك بەرىلمەي جاتادى»، - دەدى سەناتور.
سەناتور ماسەلەنى شەشۋ ءۇشىن مەكتەپ پسيحولوگتارىنىڭ سانى جونىندەگى ءنورماتيۆىن ەسەپتەۋدى قايتا قاراۋدى جانە سىنىپ سانىنا سايكەس تۇزەتۋلەر ەنگىزۋدى ۇسىندى.
«پسيحولوگ شتاتتارى مەكتەپتەرگە 1987 جىلى ەنگىزىلسە دە ولاردىڭ زاڭدى مارتەبەسى ءالى انىقتالماعان. ەڭبەك اقى تولەۋ جۇيەسىندە ولار قوسىمشا ماماندىق رەتىندە بەلگىلەنگەن. پسيحولوگ ەرەكشە ماماندىق ەكەنىن ەسكەرە وتىرىپ، نەگىزگى ماماندار تىزبەسىنە ەنگىزۋدى ويلاستىرۋ قاجەت»، - دەدى عالياسقار سارىبايەۆ.