ەلىمىزدە كەدەيلەر كوبەيگەن

ولاردىڭ باسىم بولىگى الماتى مەن شىمكەنتتە جانە تۇركىستان وبلىسىندا.

قازاقستاندىقتاردىڭ تۇرمىسى تومەندەپ بارادى، دەپ حابارلايدى Almaty-akshamy.kz Finprom.kz-كە سىلتەمە جاساپ.

بىلتىرعى ءۇشىنشى توقساننىڭ قورىتىندىسى بويىنشا، تابىسى ەڭ تومەنگى كۇنكورىس دەڭگەيىنەن تومەن ۇيلەردىڭ سانى ءبىر جىلدا 4،5%-عا ءوسىپ، 180،9 مىڭعا جەتتى. مۇندا ادام سانى 1 ملن. بۇل 2021 جىلمەن سالىستىرعاندا 2،9%-عا كوپ. ءبىر جىل بۇرىنعى وسى ۋاقىتتا ەلدە تابىسى تومەن 173،2 مىڭ ءۇي  (ءبىر جىلدا 7،5% ازايعان) بولعان.

2022 جىلعى ءۇشىنشى توقساننىڭ قورىتىندىسى بويىنشا ەلىمىزدەگى 3،6 مىڭ ءۇيدىڭ (ءبىر جىلدا  62،7%-عا ازايعان) تابىسى ازىق-تۇلىك سەبەتى قۇنىنان تومەن بولدى. ول ۇيلەردە 24،8 مىڭ ادام تبار. بۇل – ءبىر جىل بۇرىنعى كورسەتكىشتەن 2،2 ەسە از.

تابىسى ەڭ تومەنگى كۇنكورىس دەڭگەيىنەن تومەن ۇيلەردىڭ ەڭ كوبى  تۇركىستان وبلىسىندا ورنالاسقان: جالپى سانى 25،4 مىڭ ءۇي، ياعني ءبىر جىلدا 1%-عا ازايعان. سونداي-اق كەدەيلىك شەگىنەن تومەن تۇراتىن حالىق سانى دا وسى وڭىردە: 191،1 مىڭ ادام.

تۇركىستان وبلىسىنان كەيىن ەڭ ناشار كورسەتكىشتەر الماتى قالاسى (15،9 مىڭ ءۇي، ءبىر جىلدا 3،1%-عا ازايدى)، شىمكەنت قالاسى (14،6 مىڭ ءۇي، 26%-عا كوبەيدى)، ماڭعىستاۋ (12،9 مىڭ ءۇي، 21،3% كوبەيدى) جانە اقمولا (12،6 مىڭ ءۇي، 28،7% ارتتى) وبلىستارىندا تىركەلگەن.

2022 جىلعى ءۇشىنشى توقساندا جان باسىنا شاققانداعى ورتاشا كۇنكورىستىڭ ەڭ تومەنگى دەڭگەيى 46،7 مىڭ تەڭگە بولدى. بۇل – ءبىر جىل بۇرىنعى كورسەتكىشتەن 26،9%-عا ارتىق. بۇل رەتتە تۇتىنۋعا جۇمسالعان تابىس – 80،2 مىڭ تەڭگە، كورسەتكىش ءبىر جىلدا 14،3%-عا ءوستى.