الماتىلىق قۇتقارۋشىلار كوكتەمگى سۋ تاسقىنىنا دايىندىق ۇستىندە، دەپ حابارلايدى Almaty-akshamy.kz وڭىرلىك كوممۋنيكاسيالار قىزمەتىنە سىلتەمە جاساپ.
الماتى قالاسى تجد توتەنشە جاعدايلاردىڭ الدىن الۋ باسقارماسىنىڭ باسشىسى المات جانىسپايەۆ بارلىق تەحنيكانىڭ جارامدى ەكەنىن، جەكە قۇرامنىڭ بولۋى مۇمكىن سۋ تاسقىنى كەزىندە جەدەل جۇمىسقا دايىن ەكەنىن ايتتى.
قۇتقارۋشىلار اۋا رايىنىڭ توسىن مىنەزىن ەسكەرىپ، «قازگيدرومەت» مەتەورولوگتارىمەن جانە «كازسەلدەنقورعاۋ» ماماندارىمەن ۇنەمى بايلانىستا.
ازاماتتىق قورعاۋ پودپولكوۆنيگى المات جانىسپايەۆ بيىلعى 16 قاڭتاردا الماتى قالاسى اكىمىنىڭ توراعالىعىمەن تابيعي جانە تەحنوگەندىك سيپاتتاعى توتەنشە جاعدايلاردىڭ الدىن الۋ جانە سۋ تاسقىنى كەزەڭىنە دايىندىق جانە الماتى قالاسىنداعى گيدروتەحنيكالىق قۇرىلىستاردىڭ جاعدايى ماسەلەلەرى بويىنشا كوميسسيا وتكەنىن ايتتى. جيىن قورىتىندىسى بويىنشا قالا اكىمى ءبىرقاتار تاپسىرمالار بەردى.
«قازگيدرومەت» رمك الماتى قالاسى بويىنشا فيليالىنىڭ گيدرومەتەورولوگيالىق مونيتورينگىنىڭ مالىمەتتەرى بويىنشا 2022 جىلدىڭ 1 قازانىنان باستاپ جاۋعان جاۋىن-شاشىن مولشەرى 226 مم بولاتىن نورمادان ءسال اسقان - 260 مم، بۇل نورمادان 13 پايىزعا ارتىق، الماتى قالاسىندا توپىراقتىڭ قاتۋى 37 مم نورمادا 44 سم قۇرايدى (بۇل جاعدايدا ورتا تاۋلى ايماقتاردا قاتۋ 30 سم-دەن اسپايدى، بۇل قالىپتى شەكتەردە). 31 قاڭتارداعى قار جامىلعىسىنىڭ بيىكتىگى 35 سم، ياعني قالىپتى جاعدايدا (ماكسيمالدى ماندەر 2018-2019 جىلدارى بايقالعان – 100 سم-دەن استام)، ىلعال قورى 57 مم، نورما بويىنشا 76 مم ( -25%).
جۇيەلى مونيتورينگتى ۇيىمداستىرۋ جانە سۋ تاسقىنىنىڭ سالدارىن الدىن الۋ جانە سۋ باسۋ زارداپتارىن جويۋ شارالارىن ازىرلەۋ ماقساتىندا مۇددەلى مەملەكەتتىك ورگاندارمەن بىرلەسىپ كوميسسيالىق زەرتتەۋ جۇرگىزىلىپ، ونىڭ بارىسىندا سۋ باسۋ ءقاۋپى بار 102 اۋماق انىقتالدى.
«بۇگىنگى تاڭدا 62 مەكەنجايدا كانال جەلىلەرىن قايتا جاڭارتۋ جانە سالۋ جۇمىستارى اياقتالدى، بۇل 49 ۋچاسكەدەگى قاۋىپ-قاتەردى جويۋعا مۇمكىندىك بەردى. قازىرگى ۋاقىتتا 7 ۋچاسكەدە قۇرىلىس-مونتاج جۇمىستارى جۇرگىزىلۋدە، ولار وسى جىلدىڭ ناۋرىز ايىنىڭ سوڭىنا دەيىن اياقتالادى»، - دەدى وكق بايانداماشىسى.
المات جانىسپايەۆ 2021 جىلى «سۋ تاسقىنىنا قارسى 2021-2023 جىلدارعا ارنالعان ءىس-شارالار كەشەنى» رەسپۋبليكالىق جول كارتاسى بەكىتىلگەنىن، وعان سايكەس، الماتىدا 4 ءىس-شارا قاراستىرىلعانىن ەسكە سالدى. بۇگىنگى كۇنى كىشى الماتى، تىكساي، ەسەنتاي جانە جاربۇلاق وزەندەرى ارنالارىنىڭ جەكەلەگەن ۋچاسكەلەرىن قايتا جاڭعىرتۋ جۇمىستارى اياقتالدى.
ايتا كەتەرلىگى، الماتى قالاسىندا بالقاش-الاكول باسسەيندىك ينسپەكسياسىنىڭ باقىلاۋىندا 39 گيدروتەحنيكالىق قۇرىلىس بار. تجد مەن «كازسەلدەنقورعاۋ» مەكەمەسىنىڭ قىزمەتكەرلەرى كۇن سايىن قالانىڭ بارلىق اۋداندارىنداعى سۋ قويمالارىنا، وزەن ارنالارىنا باقىلاۋ جۇرگىزەدى. اقساي، ۇلكەن جانە كىشى الماتى وزەندەرىنىڭ بويىندا جىلجىمالى پوستتار ورناتىلعان.
قازىرگى تاڭدا اۋدان اكىمدىكتەرى ارىقتار مەن وزەن ارنالارىن قار مەن مۇزدان تازارتۋ جۇمىستارىن قارقىندى جۇرگىزىپ جاتىر. ارىق جۇيەسىنىڭ جالپى ۇزىندىعى 1300 شاقىرىمنان اسادى. بۇگىنگى تاڭدا 460 شاقىرىمنان استام جەر تازارتىلدى.
«2023 جىلعى سۋ تاسقىنى كەزەڭىندە الماتى قالاسى تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا توتەنشە جاعدايلار مينيسترلىگىنىڭ اۋماقتىق بولىمشەلەرى مەن الماتى قالاسىنىڭ ازاماتتىق قورعاۋ قىزمەتتەرىنىڭ كۇشتەرى مەن قۇرالدارىنىڭ جالپى سانى 1609 ادام بار، ءارتۇرلى ماقساتتاعى 618 بىرلىك تەحنيكا، 85 موتوپومپا، سونىمەن قاتار 99 بىرلىك اۆتونومدى ەلەكتر ستانسيالارى بار»، - دەپ تولىقتىردى الماتى قالاسى توتەنشە جاعدايلار دەپارتامەنتىنىڭ وكىلى.
قالالىق ازاماتتىق قورعاۋ قىزمەتتەرىنە 13 700 قاپ پەن 590 توننا ينەرتتى ماتەريال ساتىپ الىندى. ناۋرىز ايىندا قالادا «كوكتەم-2023» رەسپۋبليكالىق كوماندالىق-شتابتىق وقۋ-جاتتىعۋى وتەدى، وسى وقۋ-جاتتىعۋلار اياسىندا قالانىڭ وزەندەر مەن ارنا جۇيەلەرىن قار مەن قوقىستان تازارتۋ بويىنشا قوسىمشا جۇمىستار جۇرگىزىلمەك. جالپى، الداعى سۋ تاسقىنى كەزەڭىنە دايىندىق باسقارمانىڭ ەرەكشە باقىلاۋىندا.
الماتى قالاسى توتەنشە جاعدايلار دەپارتامەنتى توتەنشە جاعدايلاردىڭ الدىن الۋ باسقارماسىنىڭ باسشىسى المات جانىسپايەۆ ازاماتتاردى «دارمەن» ءموبيلدى قوسىمشاسى ارقىلى كەلىپ تۇسەتىن داۋىلدى ەسكەرتۋلەر، اۋا رايى بولجامى، تاۋداعى قار كوشكىنىن الدىن الۋ جانە ت.ب. اقپاراتتاردى دەر كەزىندە الۋعا شاقىردى.